كيف ممكن تعيش الوحدة مع زوجها اللي مو مالي عينها.. عطوني السررررر

السلام عليكم بنات
لما كتبت عن مشاكلي مع زوجي
جتني ردود كثيرة.. للاسف تقفل الموضوع قبل اعلق على بعضها..
لكن لفت نظري رد وحدة من الاخوات..
تقول اني كارهه زوجي ولو اني حابته كان مادققت بهالامور..

وعشان اختصر لبعض الاخوات السالفه.. زوجي مو مالي عيني..
للاسباب التالية: عصبي ودايما لسانه منفلت على الناس..
مايلمسني الا مره بالشهر.. ويشوف الوضع عادي..
يغار من صديقاتي.. ومن تعليمي.. يشكك بانوثتي..
يشوف السفر والترفيه كماليات.. ويبيني اعيش حياتي جد 24ساعه..

انا صارحته باللي بخاطري كله.. وما اخفي عليكم اني جرحته بالكلام..
الرجال اقتنع .. ووعد يتغير.. وفعلا احس بهالشي..
بس انا مو متقبلته..

اذا حاول يمزح اتعكنن مزاجي.. احس دمه ثقيل..
اذا دخل البيت يضيق صدري وانكتم.. واقول ليته سهران برا..
حتى اذا اتصل علي ما ارد الا بعد مرتين او ثلاث..
علما بأني كنت زمان افرح بسواليفه واستقبله من الباب بابتسامه او اضمه الخ..
بس كان دايما يستخف بهالاشياء.. يطنشني..
ما ادري اللي فيني تراكمات والا ايش.. صايره مو طايقته..
اقسم بالله اني طلبت منه الطلاق من كم يوم.. قلت له كارهتك..
ورفض وحلفني ما اجيب هالطاري ووعدني يتغير..
وانا والعياذ بالله صرت اتخيل لو اني زوجة فلان والا علان.. من اللي نعرفهم..

مو مقتنعه بزوجي.. احسه مراهق كبير.. واحيانا احسه طفل..
من تعلقه الزايد بأمه اللي يحب يشاورها بكل شي
من عدم اقباله على زوجته بالحلال.. يلبس قميصه وينام وعادي عنده..
حتى لما بطلت شغلات كثيره كنت اسويها له.. عادي عنده..
صار مالي خلق اطبخ له ولا ارتب ملابسه..
برضو ماعنده احساس.. صار يطلب من برا أو يأكل من الدوام..
وانا اول كنت اتفنن له كل يومين بطبق جديد وادلعه عالسفره..
لاني كنت احبه.. الحين هو والكرسي واحد..

انا زعلانه من حياتي.. زعلانه من مشاعري تجاه واحد اسمه زوجي..
احس نفسي احسن منه وافهم اكثر منه.. لان اسلوبه دايم سطحي..
وكل شي يسويه يقول اخوياي قالوا لي.. امي قالت لي..
لان ابوه توفى وهو صغير.. فما جرب يعيش جوى اسره..
هذا غير انه يحب يسولف للناس يأي شي نسويه او نشتريه..
واحيانا يحب يتفاخر بشغلات تخصني او تخص اهلي..
رغم اني الف مره اقول له اترك البربره لانها من طبع الحريم..
وانا صار كلامي معه قلييييل.. والاشياء اللي ماتخصه مستحيل اقولها..

حتى شكله كان عاجبني اول..
الحين صرت اشوفه بشع.. شفايفه سودا من السجاير..
كرشته ناطه على برا..
وفوق كذا يسمع اغاني 24 ساعه.. ما احسه كفو تربيه..
وكذا مره اقول له وشلون بتربي عيالنا وانت كذا..
يقول الهادي الله ويقوم ويتركني..

بختصار.. زوجي رافض ننفصل لانه يقول انه يحبني..
وانا مشكلتي معه نفسيه.. مو قادره أنسى اخطاءه معي..
وصايره اشوف عيوبه بس.. رغم اني مقتنعه بداخلي انه احسن من غيره بكثير..
واسأل نفسي احيانا: لو تزوج علي بأزعل؟
ولما اتخيل السالفه اقول طز يروح يتزوج.. اقلها اتدلع ببيت اهلي بدل الكرف عنده..
وانا فعلا كنت متدلعه كثييييييييييييير ببيت اهلي..
وهالشي يخليني احن كثير لحياتي قبله.. واحسه دائما اضافة سيئة بحياتي..
ودي احب زوجي وبيتي زي باقي الحريم.. بس مو قادره..
هو ياما سوا حركات مع الوقت كرهتني فيه.. لانه جرحني كأنثى اكثر من مره..
حتى وانا عروس كان يحسسني اني ولا شي قدامه.. يعني انا واخوياه واحد..
كان يحسب انه بالثقل يكسبني.. مع الوقت كرهته بدون مايحس..
ويقول لي الحين ابحاول اكسبك من اول وجديد.. وكأن مشاعرنا تتغير بكبسه زر..


وقبل فتره وباحد مشاكلنا قلت لامي عن اللي صار.. لاني كنت واصله حدي
وهي طبعا تعاطفت معي لانها انقهرت على بنتها..
وجرحت بزوجي ونبهتني لعيوب فيه ماقد انتبهت لها..
من بينها التأتأه بالكلام.. تخيلوا لي فوق السنتين متزوجه وماقد انتبهت..
مع اني ورب البيت ماعنده مشكلة مع هالموضوع لأنه خلقه الله..
وطبعا انا وزوجي تراضينا بعدين.. وهو مادرى أني قلت لامي..
بس انا صرت انتبه لكلامه.. وما احب استرسل معه..
ودي اقول له اسكت واللي يرحم والديك..


انا هنا افضفض.. واقول يمكن القى نصيحة تفيدني..
او دعوه لوجه الله من اخواتي الغاليات..