والله حتا انا مالقيت انتهت كل الأسواق جايبين ملابس صيفية
كنت بشتري له أيام الشتا بس ماكنت متأكدة من السفرة
كم عمر بنتك؟؟؟
وايش حتا خدي من الأغراض لها ولك
وكم مدة السفرة
ومووووفقه ان شاءالله بالسفره

والله صراحةماتوقعتكم باردين كذا
الموضوع ماعجبكم ولا ايش ....

اختي كل الكلام اللي البنات قالوه طيب
بس انا انصحك نصيحة مجرب ومريحه

انتي يا اختي رايحه ماليزيا يعني بلد متطور مو بلد متخلف او مقطعه
عشان كذا اي شيء ممكن تتلقيه هناك لا تاخذيه معاك من هنا عشان تخففي على نفسك وعلى وزن الشنط والشيل والحط
واول ما توصلي ماليزيا وتريحو روحو اقرب سوبرماركت وطبي واتخيري اللي يعجبك بتلاقي كل شيء متوفر
مثال على ذلك ( الشامبوهات والصوابين والمناديل المعطره الخ الخ )
بس الشيء اللي تحرصي تاخذيه من السعوديه هو الحليب الخاص بالبيبي والحفايظ واذا كان ولدك جلده ما يتحسس ممكن تاخذي كميه بامبرز قليله من هنا ومن ثم تشتري من هناك ولكن الحليب لا لانه احيانا نوعية حليبنا ما تلقيه هناك خصوصا اذا كان فرنسي مثل نوفلاك

النصيحه الاخرى خذي من السعوديه علبه او علبتين حليب مخصص لحالات الاسهال ما تدري الببيبي لا سمح الله يجيه ااسهال مع تغيير الجو يصير عنك الحليب المخصص للاسهال ..

شنطة السفر اللي بتكون معاك في الطياره
بناء على عمر ولدك
في الطياره لبسيه بربتوز (البجامه الكامله ) مو وقته الشياكه والبناطيل والتيشرتات وكمان اريحله
خذي 3 بيجامات ب 3 غيارات داخليه ..
بامبرز 10 قطع
حليب البيبي ممكن تحطي في المقسم على حسب الرضعات المتوقعه واضيفي عليها رضعتين زياده وانتبهي وانتبهي وانتبهي انك تتاكدي انه المقسم مقفول زي الناس لا ينفك بالشنطه ويضيع الحليب وتحوس الدنيا ... ممكن بدل المقسم تاخذي علبة الحليب كامله بس من المقاس الصغير وكمان اتاكدي انه مقفول كويس..
خذي عدد رضاعات كافيه واعتبري انه ماافي حمام في الطياره لانه عملية تغسيل الرضاعات في الطياره جدا مزعج وصعب وممكن تلقطي جرثومه من الحمام .. فالافضل تاخذي عدد رضاعات كافي 4 او 5 وكلهم عبيها مويه نظيفه من وانتي في البيت بحيث بس يكون عليكي تكبي بودرة الحليب جوى المويه وخلاص ..

شنطة صغيره يكون فيها ميزان حراره الكتروني + تحاميل خافض حراره (كمان شراب) + تحاميل مضاد للاستفراغ + قطره لانسداد الانف
واحب انبه عليك خافض الحراره خذيه تحميله لانه اغلب البيبيات يرجعو في الطياره او لما ترتفع حرارتهم وقتها حتحتاجي تحميله من تحت ولا تنسي كريم فازلين صغير عشان يساعدك تدخلي التحميله ..

اعتمدي في سفرك على الوجبات المعلبه اللي تنباع في الصيدليات والسوبرماركت تلقيها في قسم اغذية الاطفال ( موز مهروس , خضار مشكله , فواكه مشكله) عشان تتفادي قصة النزلات المعويه اللي تجي من الاكل في المطاعم او عدم نظافة ادوات اعدادد الطعام حتى لو عملتيها بنفسك ما تضمني عشان كذا خذي المعلب اللي تضمني انه ما تعرض لاي هوا او ايد ولو بقي شيء من الوجبه ارميها فورا لا تحتفظي فيها لوقت ثاني ..

العربيه لابد منها افضل اخذها من السعوديه ..

كيستين بلاستيك في شنطة يدك عشان ترمي المخلفات او لو حصل استفراغ + مناديل مبلله + فوطه صغيره ناشفه + 3 عدد لهايات اذا كان يستخدمها ..

ان شاء الله اكون افدتك