كيف نظامكم بالمواجيب والهدايا ؟

السلام عليكم
هههههه ترا ماعندي دوام وتقل أني مروقه شوي ف جاء بالي موضوع نسولف فيه
تعرفون لما تصير مناسبه او احد يجي له مولود
لازم نقدم هديه او حتى مبلغ مالي
انا زمان لما سكنت بيتي صارت لي سالفه😬
بقولكم وشهي
بما انه بيت جديد وملك كل اللي جوني عطوني وجابوا وقدموا ما قصروا آللي فلوس واللي هدايا للبيت
من الناس هذولي اهلي لما جو كلهم أعطوني فلوس ووحده من خواتي فواحة و عطور
المهم انهم قالوا ترا مستحين نمدها لزوجك نحسها قليل
كل شخص فيهم عطاني الف ريال الا اختي الصغيره ٢٠٠😂 حاطينها بظروف صغيره وكاتبين الف مبروك المنزل ابو و ام فلانه يعني انا وزوجي
قالوا انتي خذيها الفلوس وترا له كذا وانتي لك كذا قسموا المبلغ يعني وصراحه مبلغ حلو مب قليل
وابوي تكفل بالاكل ثلاث ايام حالف ع زوجي
المهم اني ع طول طرررررت عند زوجي وعطيته الفلوس كلها🙄
من الغباء صدقوني
بعدها ب ثلاث أسابيع جو اهله ولا عذر ولا شي
كلهم نادوه من المجلس اللي حنا فيه وراحن عمته وخواته لمجلس ثاني بالبيت وعطوه لوحده
وانا مااعتذروا مني ولا شي ابد
ولا وحده من اللي جو اعتذرت او عطتني شي🙄
ولا جابوا شي معاهم
انا ماابي شي بس ابي لو اعتذار يعني انا صاحبة البيت😕
المهم ما علمني نهائي انهم عطوه بعد ما مر شهور مدري وش جاب الطاري وقال لي انهم عطوه مبلغ تقريبا وصل ٧ الاف وفوق قلت ليش ما قلت لي و هم ليه ما اعتذروا حتى؟؟
قال عادي عطو ولدهم لازم تحشرين خشمك
قلت مو عن احشر خشمي بس ابي تقدير واحترام ع الاقل
حريم كبار و بنات يعرفون الأصول ليش ما اعتذروا ع الاقل
وانا اوجبهم دايم واهديهم..
..... انا عقب السالفه ذي جتني عقده من المواجيب ترفع ضغطي
مااحب ادخل ع احد ويدي فاضيه احسها نقاده 😬
واحيانا لا والله ع حسب اكون مطفره او ماعندي وقت اجهز شي ع الاقل اعتذر من الشخص
وكمان اذا مرررره ماعندي وقت مريت اقرب محل شوكولاته وورد وصلى الله وبارك 😂
اما اذا مروقه وفاضيه
قهوه وشاي وحلا وكذا نوع مالح ما يضر
أصعب شي بالحياه مريت فيه ان وحده من قرايب زوجي
لما كنت عروس عزمتني و صلحت لي عزيمه محترمه عشاني انا فقط هي الوحيده اللي عبرتني واحترمتني من اهله وقرايبه
و لما ولدت انا وجبتني وماقصرت الحرمه ابد ابد صراحه اقسم بالله اني استحي ع وجهي اذا جيت اتذكر
تدرون ليه؟
زوجي يكرهها ما يحبها أبد ولما هي ولدت رفض رفض تام ماادخل بيتها او اوجبها لو اموت
مشاكل قديمه بينهم زوجي واهله مع بنت عمهم ذي تصير سلفتي
واصلن صعبه مااقدر اروح ماعندي الا هو يوديني
مرت ٣ شهور ع ولادتها وانا كل يوم اشحده تكفى لا تفشلني ودني ولا ع الاقل اسمح لي بس اروح
قال اسمعي شفتي رقمها احذفيه الحين لا تهرجين معها ياخي افهمي احظريها😿
خلاني احظرها واحذفها غصب عني مرت ٤ سنوات قطاعه الى يومكم ذا ماادري عنها قاطعتها بدون سبب او زعل بيننا
المشكله الحرمه طيبه مره معي الظاهر منها انها كويسه مره
والناس تسبها لدرجة ام زوجي كل شوي تقول لا يكون تهرجين معها قلت ي عمه الله يهديك ترا الحرمه مااشوف اللي تقولون انتم وتزعل علي هي وبناتها لين كرهوني فيها وقاطعتها نهائي
بالمقابل فيه وحده ثانيه يمدحونها ليل نهار ويبوني ازين العلاقه معها وأنها طيبه ومدري ايش
الانسانه ذي يوم انا تزوجت و حملت وولدت وسكنت بيت ملك ما قالت حتى مبروك ما شفت منها الا قلة حياء
ويبون ازبط العلاقه معها
مدري ليه ريموت كنترول ع حسب اللي يرتاحون له يبونك تشبكين معه
احيانا مااحب احد يوجبني او يهديني لانه يبي بالمثل
والوحده صعبه احيانا ظروفها م تساعدها مثل اللي قلته فوق
مو نية رديه بس غصب عنك والناس بيفهمون غلط ليش ما وجبتنا ليش ما بادلتنا الشي نفسه 🤔
وبس اعتبروها سوالف او فضفضه ادري مامنها فايده بس طفش ☺️😅 ماذا عنكم ؟