كيكة الخلاط ولا ألذ

مساء الأنوار
اليوم جبت لكم طريقة كيك أسهل منها مافي وطعمها خيالي
اتمنى تجربوها وتعجبكم...
نبدا بالمقادير +الخطوات
أول شي بالخلاط الي نسوي فيه العصير نحط أربع بيضات وكوب سكر وثلاث أرباع الكوب زيت ونخلطها مع بعض شوي بعدين نضيف كوب دقيق وملعقتين كاكاو وملعقه بيكنج باودر (ونص ملعقه نسكافيه هذي إختياريه )
وكاسة شاي حليب سايل أو حليب السعوديه المهم حليب
بعدين ندخلها الفرن ع حراره متوسطه من تحت عشرين دقيقه أو ع حسب الفرن ومن فوق عشر دقايق وبس تكونين مشغله الفرن من قبل ماتحطين الخليط فيه
وفي ذا الوقت تجهزين خليط التزيين
أنا بالنسبه لي سويت ثلاث أنواع للتزيين اللي هي دريم ويب &والثانيه حطيت دريم ويب بعد ماخلطته وكان جاهز أضفت له قطرات من عصير فيمتو المركز وصار لونه وردي حلو &أما الثالثه كانت كاكاو اللي هي ملعقتين كاكاو ثلاث ملاعق حليب بودره وثلاث ملاعق سكر وأضيف عليها حليب سايل (حليب السعوديه)لغاية ماتكون مخلوطه صح ولا هي ثقيله ولا خفيفه يعني وسط
ألحين نجي للكيك من بعد ما طلعناها وخلينها تبرد نقطعها مربعات صغيره ومتساويه ونجي لكل مربع ونحط فوقه من أي نوع من خلطة التزيين (دريم ويب أبيض أو دريم ويب وردي أو كاكاو)
وصحتين وهنا ع قلوبكم
وبالنسبه للكوب اللي أستخدمته كوب الجبن الصغير (المراعي )
والملاعق (وسط)
ومثل ماقلت أتمنى تجربوها وتدعولي إذا عجبتكم وإذا ماعجبتكم لاتدعون علي



أمزح ولو....... مع تحيات الطباخه اللي ماشاء الله عليها B-)