هلا والله بالغاليات عضوات عالم حواء
هذي أول مشاركه لي في قسم الأطباق وإن شاء الله ماتكون الأخيره
اليوم جبت لكم طريقة كيكة خياليه (طعم وشكل) ونادره من نوعها:27:
ما أطول عليكم هذي طريقتها :
المقادير:
** مقادير الكيكه:
أصبع زبده لينه (بدرجة حرارة الغرفه)
1كوب صغير سكر بودره (يعني نص الكوب العادي )
3 أو4 حبات جبن كيري (الأفضل 3) ـ شوي ماء(بفنجان القهوه)
3 بيضات ـ نص ملعقه صغيره فانيلا ـنقطتين خل (عشان ريحة البيض)
كوب واحد طحين أبيض(الكوب العادي) ـ ملعقه كبيره باكنج باودر
** مقادير تغطية الوجه:
نص أصبع زبده ذايبه (مسيّحه على النار)
1 كوب سكر بني
1كوب جوز الهند
1كوب لوز شرائح( اللوز اللي يجي شكله كأنه دمعه ولونه بني هو معروف بس مدري وش أسمه>>>>أعرف أوصف صح؟؟؟؟
(من 15إلى 20) مكعبات توفي( اللي بنص ريال فيها خمس حبات وبعضها أكثر اللي من ديمه وما شابهه أو اللي تنباع بالكيلو مكتوب عليها توفي العليان (عساكم عرفتوها)>>>>>>>> قلت لكم أعرف أوصف!!!
نجي للطريقه:
1ـ نحط الزبدة بالخلاط (الأفضل خلاط الكيك) بعدين حطي عليه السكر وأخفقي زين
2ـأضيفي البيض بالتدريج وأخفقيه بعدين الطحين بالتدريج شوي شوي ثمٍ تضيفين الباكنج باور وتخلطينه ثمٍ الماء وتخلطينه زين
ملاحظه هامه:راح تطلع معك العجينة ثقيله شوي لا تزيدين ماء أبداً(يكفي فنجان) هي كذا تكون متماسكه وثقيله
3ـ ادهني الصينيه بالزيت ورشيها بالطحين ويا حبذا لو تكون الصينيه بايركس عشان تعرفين هي استوت ولالأ
4ـنجي لمقادير الوجه: ناخذ الزبدة والسكر البني ونخلطهم بالخلاط ـخلطه خفيفه بس ـ(هذا إذا كان السكر خشن أما إذا استعملتي السكر اللي كأنه مطحون أو ناعم أو اللي يجي مكعبات وتدقينه اتركي هالنقطه) حطيه بزبديه وحطي عليهم اللوز وجوز الهند وامزجيهم مع بعض بعدين حطي الخلطه هذي على وجه الكيكه
5ـ جيبي التوفي وذوبيه مع ماء على النار(الماء تقريبا نص كوب) بعد مايذوب صبيه على وجه الكيكه يعني فوق خلطة اللوز والجوز
6ـ أخر شي تحطينها في فرن حار مسبقاً (طبعاً هذي النقطه مطلوبه في عمل أي كيكه مثل مأنتم عارفين) وتراها اطوّل بالفرن ومثل أي كيكه لا تفتحين الفرن بالثلث ساعه الأولى من وقت دخولها الفرن (عشان ماتنهفس من النص)
7ـ إذا استوت من تحت يكفي لا تشغلين عليها الغاز من فوق أبداًحرارة الفرن تكفي لنضوجها>>>امحق ياللغه نصه فصحى ونصه عامي (عاد يقولون انه بداية الفلسفة )
8ـ لاطلعتيها من الفرن لا تقطعينها إلا بعد ما تبرد
أتمنى يكون الشرح وافي وأكون وصلت لكم المعلومه صح >>>>>أدري اني هذرت واجد بس أعذروني لاني أحب الشرح الوافي :D
وبألف صحه وعافيه على قلوبكم (*_*) جربوها وردوا لي خبر
بانتظاركم( ^_^ ) تحياتي المقرمشه .....(لوبيز)
اعذروني اذا تأخرت بالردود:icon33:
(لوبيز) @lobyz_1
عضوة
يلزم عليك تسجيل الدخول أولًا لكتابة تعليق.
I_Luv_Sweets
•
تسلمين حبيبتي :)
الصفحة الأخيرة