كيكة الموز بالكراميل ولا أروع

من مطبخــى .. كيكة الموز 🍌🍌🍌🍌 بالكراميل
المقادير كالعاده بالكوب المعيارى أو بالمج الزجاجى الشفاف بتاع الشاى:
الطبقه الأولى (الكراميل) 👇👇
كوب إلا ربع سكر
2 ملعقة طعام ماء
الطبقه الثانيه: الموز 🍌🍌🍌🍌
3 أو 4 أصابع موز مقطعين دواير
عصير نص ليمونه 🍋
الطبقه الثالثه: 👇👇 الكيكه 🎂🎂
كوب ونص دقيق جميع الأغراض
2 ملعقة طعام نشا
كوب إلا ربع سكر
3 بيضه
تلت كوب زيت ذره أو عباد
2 ملعقة طعام ماء ساخن
1 كيس بيكينج بودر
1 كيس فانيليا
ذرة بيكربونات الصودا (كربوناتو)
رشة ملح
ملعقة شاى خل
نص كوب لبن أو زبادى (المتاح عندك)
الطريقه: 👇👇👇🍌👇👇👇
1 - ولعى الفرن على 200 درجه تحت بس دا أولا.
2 - جهزى صينيه مقاس 26 وإدهنيها زيت خفيف جدا بالفرشه أو بمنديل ورق .. على فكره مقاس الصوانى بيبقى مختلف من مصنع لآخر أو من شركه لأخرى.
3 - قطعى الموز دواير ووزعى عليه عصير النص ليمونه.
4 - هاتى كسروله أو طاسه ألومنيوم (الألومنيوم أفضل عشان لو تيفال مش هتعرفى تشوفى لون الكراميل الحقيقى لما السكر يسيح) وحطى فيها السكر ومعلتين الماء وعلى نار هاديه جدا لغاية لما السكر يسيح ويبقى لونه دهبى جميل وإوعى يتحرق منك أحسن هيخلى الطعم مر وإوعى تقلبى سيبيه يسيح براحته.
5 - لما الكراميل يجهز نزليه على طول فى الصينيه وحاولى تخليه يغطى قاع الصينيه كله.
6 - وزعى دواير الموز على الكراميل بطريقه منتظمه عشان لما تقطعى الكيكه فيما بعد يبقى شكلها رقيق وجميل. :)
نيجى بقى لعمل الكيكه:
7 - فى طبق عميق (للعجن) إنزلى بمعلقة الخل وكيس الفانيليا ورشة الملح والـ 3 بيضات وإضربى وبعدين إنزلى بالسكر تدريجى لغاية لما القوام يبقى كريمى ولونه فاتح بعدين إنزلى بالزيت وبعدين اللبن وإضربى برضو وبعد كده سيبى المضرب الكهربى وإمسكى المضرب السلك أو الملعقه الخشب أو الإسباتيول وإنزلى (بالدقيق المنخول مع البيكينج بودر وذرة الكربوناتو تدريجيا) .. آخر حاجه إنزلى بمعلقتين الماء الساخن وقلبى من تحت لفوق فى إتجاه واحد وبعدين صبى خليط الكيك على الموز فى الصينيه.
8 - هاتى صينيه تانيه أكبر ودخلى فيها صينية الكيك ومن الجنب حطى 3 كوب ماء ساخن (عشان هتسوى الكيكه فى حمام مائى) وعلى الفرن يا جميل .. ممكن تاخد من 40 إلى 50 دقيقه حسب فرنك إنتى .. ولما تستوى وتبرد شويه هاتى طبق التقديم وإقلبيها عليه وقطعى وألف هنا وشفا. 🍌🍌