السلام عليكم ورحمة الله وبركاته
الكيكه دي بالصراحه منقوله من اخت هنا في المنتدي ونفسي افتكر هي مين جزاها الله خير
حلوه اوي وشيك جداااا لو حد جايلك وعايزه تعملي حلو راقي وسهله اوي وخطواتها بسيطه
الاول شوفو الصوره
المقادير
اولا مقادير الكيك
2 بيضه
فانيليا
نصف كوب سكر
كوب زيت
كوب حليب
2 كوب دقيق
معلقة بيكنج بودر
مقادير الحشو
معلقتين كبارسكر بني او عادي
معلقتين قرفه
معلقتين نيسكافيه
معلقتين كاكاو
مقادير التغطيه
4 جبن كيري او مثلثات
علبة حليب مكثف او البديل (علبة قشطه +نصف كوب سكر_نصف كوب حليب بودر)وتخلطيهم في الخلاط وهيبقي زي الحليب المكثف بالظبط
للتزيين صوص شيكولاته وبرضو لو مش عندك ممكن تعملي ربع صباع زبده علي النار ولما يسيح ضيفي 6 معالق ماء +2فنجان سكر+معلقتين كبار حليب بودر +معلقتين كبار كاكاو وقلبي كويس وشيليهم من النار وهيبقي احلي صوص شيكولاته
طريقة الكيك
اولا شغلي الفرن
اخلطي مقادير الكيك (البيض والفانيليا +السكر والزيت والحليب واخر حاجه الدقيق مع البيكنج بودر)وصبي تلت المقدار فقط في البيركس او صينيه مدهونه
ودخليها فرن بس 5 او 7 دقايق هتلاقي الطبقه استوت
طلعيها وضيفي نص مقدار الحشوه كما في الصوره
وضيفي عليه التلت التاني من خليط الكيك
ودخليها الفرن واستني 3 دقايق وبعدين اطفي الفرن من تحت وولعيها من فوق لمدة 5 دقايق
هتلاقي طبعا الطبقه استوت طلعيها وضيفي النص الباقي من الحشوه وعليها التلت الباقي من خليط الكيك ودخليها تاني الفرن واستني 10 دقايق او اقل حسب ما تلاقي الطبقه الاخيره استوت وبعدين خرجيها
اخلطي طبقة التغطيه (4 كيري +الحليب المكثف) وصبيها علي الكيك وزينينها بصوص الشكولاته ودخليها التلاجه لمده ساعتين
ودي صوره بالجنب
وبالف عافيه
(ملحوظه : انا عدلت في مقادير الكيك الاصلي عشان تناسب الصينيه الي عندي)
ولا تنسوني من صالح دعائكم
