كييف قدرت امي تحتويني وتخليني صديقتها رغم اني مراهقه وهي بأواااخر الخمسينات .استفيدوا

السلام عليكم ياحريم ويابنات وياصغنونات وكل شي =D


قبل ماابدأ بسرد موضوعي


اتمنى من كل قلبي قبل لاتطلعون من هالصفحه تدعون لآمي ( لآن فيها ورم بالصدر ) لكن الحمدلله كنا خايفين انه يكون الخبيث بس طلع ورم يروح مع المداومه على الادويه


..


امي الحبيبه عمرها تقريبا 58 او 59


لكن على كبر سنها وعلى كثر الفارق بين عمري 18 سنه وعمرها


الا انها قدرت تكسبني كصديقه قبل لا اكون بنتها


انا مثلي مثل اي مراهقه لي متطلبات ولي افكار ممكن تكون دخيله على مجتمع الحريم الكبار وممكن الحريم الكبار مايتقبلونها ويشوفونها سخافه وقلة حيا فينا ووو الخ من هالاشياء


انا دايم اسمع ان المراهقين تربيتهم صعبه او المرحله اللي يمرون فيها اي من اصعب المراحل اللي تمر على الاهل



امي قدرت بذكائها تحتويني وقدرت تخليني افضفض لها اي شيء واقولها اي شي بقلبي

حتى لدرجه انها قدرت تخليني اسولف معها اي سالفه وكأنها وحده من صديقاتي ( اكيد مع وجود الاحترام كونها امي )


قدرت كيف تخليني اقولها وش نسوي انا وصديقاتي حتى لو كان اللي نسويه غلط



امي ياجماعة الخير ماهي متعلمه ( شبه اميه ) لانها مادرست الا الابتدائي ودرسته متأخر بعد


امي كانت ساكنه بقريه مع جدي وعاشت طفولتها بقريه


يعني ماعاشت على الانفتاح الي حنا فيه الان



الا انها قدررررررت تفهمني وتفهم العصر اللي عشت فيه



دايم صديقاتي يقولون لي مشاكلهم مع امهاتهم مع ان امهاتهم اصغر من امي بكثير يعني تلقونهم بالثلاثينات والاربعينات




..


من الاشياء اللي امي كسبتني فيها



انها تسسسسسسمعني


ايه تسمعني .. ماعمرها طنشتني بأي موضوع افاتحها فيه



وبحياتي ماقلت لها موضووع وقاطعتني وقالت عيييييييب لاتقولين هالكلام واللي كبرك مايقوولون هالكلام المفروض ماتعرفين هالسوالف ومدري ايش

لالا ابد ماعمرها قالت لي كذا


وهذا حافز يخليني اقولها اي شي لآنها انسانه تسمع لي



..

امي كانت تقولي اسرارها ادق التفاصيل وكانت تعلمني بالمواقف اللي صارت لها وفهموها الناس غلط من خلال هالمواقف .. كانت تقولي بطريقه غير مباشره يابنتي لاتسوين هالموقف اللي انا طحت فيه لان الناس بيفهمونك غلط


..


تخيلو قسم بالله اقول لصديقاتي اني افاتح امي بمواضيع كبار ومواضيع متزوجين


صديقاتي انهبلوا قالو كيف تفاتحين امك بمثل هالمواضيع .. اامهاتنا لو نقولهم بيشكون فينا وبيقولون من وين جبتوا هالكلام وبيقولون لنا عيب ومدري ايش


انا قلت لهم امي بالعكس تفهمني وقدرت تخليني اسولف معها بإي سالفه


..


من الاسباب اللي خلتني مااطول صوتي على امي مثل بنات هالجيل

لانها هي ماعمرها رفعت صوتها علي

اي مشكله بيني وبينها تناقشني من يوم اني صغيره نقاش بهدوء

ودايم نقاشها لي يبدأ .. ب يابنتي ياحبيبتي ياعمري انتي ........ ويبدأ نقاشها



..


امي كانت ماتحرمني من شي .. يعني من اول مادخل علينا الدش ماكانت تسكر عني القنوات االي فيها امور ××


كانت دايم تقولي انتي تعرفين الصح من الغلط وانتي لو رفضت عنك اي شي تقدرين من وراي تسوينه

وانا مابيك تسوين اي شي من وراي

احبك تسوين كل شي قدامي

..

اذكر مره كنت اقلب بالقنوات وخالاتي كانو جالسين عند امي


ويوم راحو خالاتي قالت امي لي


تدرين خالتس جلسو يهاوشوني ويقولون ليش تحطين لها كل القنوات ( طبعا هذا الكلام قبل 8 سنين يوم الناس تقفل كل شي حتى قنوات mbc > يعني لايروح بالكم بعيد انها قنوات ××××××× قويه مره


..

كانت امي ولازالت تقولي كل شي يصير معها .. صرت انا ارتاح لها وصارت ترتاح لي وصرنا نقول لبعض كل شي



..



امي من طلبت لابتوب شرت لياه .. ولاعمرها حسستني انها تراقبني


بس مره من المرات جلست معي وقالت تكفين لاتخلين ثقتي فيك تهتز يابنتي

انتي عارفه ان النت سلاح ذو حدين ان استعملتيه للصح ف انتي صح والله يبارك فيك

وان استعملتيه للغلط تأكدي اني انا مارح احاسبك لاني ماشوفك لكن فيه رب فوقك يحاسبك




كانت تكلمني بكل اريحيه تامه وبكل هدووووء وبكل انسجام



امي احسها مثقفه وهي ماتعلمت


احسها تعرف تحاور تعرف تقنع تعرف تخليني الين بكل شي هي تبيه فيني



..


امي بحياتي ماحسستني انها جالسه تراقب جوالي ومكالماتي


ثقتها فيني مع توجيهها لي الدائم خلاني احس انها مو امي وبس هي صديقتي


غمرتني بعاطفتها ولا خلتني الجأ لحضن احد ثاني او عواطف اشخاص ثانين


.


احيانا وانا اسولف معها او جالسين نتابع التلفزيون تضمني فجأه .. ياعمري هي




..



امي احسها عرفت تكسبني لانها عرفت كيف تواكب عصري .. تجيني بطريقه تحسسني انها وحده من صديقاتي

تسولف معي مثلا تجيني وش سويتي بالمدرسه وتقولي مصطلحات شبابيه



.

ذاك اليوم تقول وصلنا لعام 2012 ومازالت بنتي كذا وكذا << قالت صفه فيني


بس تخيلو حرمه عمرها بأواخر الخمسين .. تقول مصطلحات شبابيه جديده

تحسسني احيانا انها بجد صديقتي




تصدقون صرت ابببببببببببببببببدا مااخاف اني اطرح معها اي موضوع يصير معي


لاني من اول اي شي اقوله لها ماتنفر مني وتسمع لي



..


بعض البنات مايحبون يقولون لامهم اي سالفه


لان مجرد ماتبدأ بمشكلتها او سالفتها تقعد امها تنهرها وتقولها اسكتي وعيب وانتي الغلطانه ومدري ايش


لالا ابد امي من النوع اللي تسمع لي للنهايه ولا خلصت ناقشتني بموضوعي بهدوء وحبه حبه



..







عشان كذا اقول للحريم اللي عندهم بنات كبري .. حاولوا تتقربون من بناتكم بكل الطرق


لاتمنعون البنات من اي شي


قسم بالله قسم بالله ان البنات لو بغو شي بروسهم يجيبونه يعني يجيبونه


منعتيها من الجوال ؟

قسم بالله اني اعرف بنات شاريات جوالات من ورى اهاليهم ولا بعد يكلمون شباب ويشترون مليون شريحه من ورا اهاليهم


..

منعتيها من الطلعات اللي هي تحبها ؟



تقولك مثلا بروح لمكان انتي تسمحين لها فيه

ولا راحت له راحت للمكان اللي هي تحبه



يعني البنات بهالزمن وبهالعصر صعب تمنعونهم من اشياء المفروض ماتمنعونهم فيه


..



يعني مثلا استغرب من الحريم اللي يمنعون بناتهم يسوون ايميلات او يشترون جواالات وو الخ


لانك لو منعتيها وهالشي براسه بتضل تفكر تفكر فيه لمين تسويه ويطيح اللي براسه


..


حاولي تخلين بنتك صديقتك تتفهمينها وتعطينها قلبك ماتخلينها تروح تشكي لآحد غيرك

لان طال الزمن ولا قصر انتي امها انتي اكثر وحده تحبها بالدنيا


وهي مارح تفهم انك تحبينها وتبين مصلحتها الا اذا جيتها بطرق مختلفه

لاتمنعينها من شي الا وانتم متناقشين فيه بهداوه


يمكن تقنعك انها هي صح


ترى مو دايم الامهات معهم حق .. لانها ام ..


افهمي بنتك .. ابني شخصيتها .. خلي عندها استقلاليه بأرائها


لاتغمزين لها وهي تسولف عند الحريم ومتحمسه بالسالفه وتكسحينها تبينها تسكت


خليها تنسجم مع الناس .. خليها تدخل بالمجتمع وتكون محبوبه وانسانه لها كيان ووجود


لاتحاولين تسبينها قدام احد خواتها ولا اخوانها ... انتبهي من هالنقطه


واذا طلبت طلبات لاتقولين انتي دلوعه والبنات اللي غيرك ماعندهم وانا مقدر اجيبلك هذا الشي ومدري ايش

حاولي تفهمينها هذا الشي بهالداوه و

حسسيها انها كبيره فاهمه وعارفه كل شي .. لانك كل ماعاملتي بنتك على انها غبيه وماتفهم ولا تعرف شي بالحياه . . هنا بيخليها تصير اغبى وتبين قدامك انها فعلا ماتعرف شي وهي من وراك تعرف كل شي من صديقاتها ومن مجتمعها المنفتح ..

خوذي رأيها باي شي .. حتى لو ملابسك الشخصيه .. حسسيها ان عندها ذوق وتفهم .

انتبهي تفرقين بينها وبين اخوانها الاولاد .. او تحسسينها ان هي كل شي ممنوع لها والعيال عادي لان عيوبهم بجيوبهم هذا اكبر غلط

بيخليها تحس انك متخلفه وتفكرين بسطحيه ومع مرور الايام مستحيل تفتح لك قلبها .. لان من اول ماتقولين هالكلمه بتحس ان طريقة تفكيرها غير عن تفكيرك


تبين تكسبين بنتك بالنقاش الهادئ


لان فيه بعض الناس يفهمون النقاش انه عصبيه وحديه



حاولي تكونين امها واختها وصديقتها وحبيبتها وكل شي





الله يخلي لي امي .. رغم عمرها الكبير وانها ماتعلمت ولا درست .. ولاتقرأ كتب كيف تربي ابنائك


الا ان فكرها وطريقتها بتريبتي خلتني مااخبي عنها شي وصديقتها وكل اللي تبيه هي



( قسم بالله انا موفر لي جميع انواع الصياعه لو بصيع

النت على كيف كيفي والجوال وعندي ومحد يفتشه واطلع مع صديقاتي واروح واجي وامي ماترفض ابد لو قلت له بروح لفلانه وعلانه حتى لو ماتعرف البنت . وتخليني اروح بلحالي ومعطيتني حريه مطللللللللللللقه )

لكن الى الان والحمدلله محتفظه انا بثقتها فيني ومستحيل اسوي شي غلط لانها علمتني من البدايه

لانها خلتني اقرب الناس لها لانها عطتني كل شي ابيه ليش اروح ادوره عند غيرها

و لأنها احتوتني من البدايه وحسستني بوجودي وكياني وشخصيتي وبنت لي مبدأ وفكر وقبل كل ذا وذا علمتني اني كبيره واعرف الصح والغلط واني حتى لو سويت غلط وهي مادرت عنه فيه رب بيحاسبني .. قالتها لي بطريقه ماهي طريقه تهديد وتخويف طريقه نقاش هادئ بين ام وبنتها بين صديقه وصديقتها


بالنهايه


اادعوا الله ان يسخر لكم عيالكم ويجعلهم يبرون فيكم الى الابد


لكن هذا الشيء ماراح يجي فجأه .. يجي من خلال طريقتكم وتعاملكم مع بناتككم