من غير اي مبالغه سويتها لزوجي بغى ينهبل
مره لذيذه ومقاديرك كمان مضبوطه
الله يسلم يديك وللمعلوميه كفتنا عن العشاء لانه ثقيله شوي لا صارت مع الكفي تكفي ..!!
لكن لاتنسينا من جديدك

عاشقة البر : خلاص بنزلهم بعد شوي انشاءالله .. غاليه و الطلب رخيص :)

ريمـاج : الكاكاو كله انخلط مع المقادير .. و لا ما تسوين الطريقه طبقات .. اهيا طريقتها انها تصير من بره على شكل كيكه و من داخل صوص .. تعرفين ليش ؟ لأن الحراره بالفرن وايد حاميه .. فتخلي الأطراف تصير كيكه . و اللي بالوسط يستوي براحته فيظل شكله سائل .. لكنه مستوي ..
يا ريت اكون وضحت لك الفكره

نديات : لا لا تذوبين الزبده .. خليها بحرارة الغرفه .. و قطعيها بعدين عبي فيها الكوب .. و ممكن كأس البوك ينفع لانه 250 مل ..
الكاكاو هذا صوره اوضح له


أو هذا


و إذا ما حصل دوري على أي ماركه يكون فيها الكاكاو شبه محلى .. و وزنيه .. أو اذا كلش كلش ذوبي كاكاو حلو مثل جالاكسي و استغني عن السكر .. و ضيفي له شويه كاكاو مر باودر

.. الزبده اكثر من 113 جرام . لانك بتسويين كوب .. عموما اشتري الكبيره و قيسيها بمقدار كوب .. ما راح تحتاجينها كلها طبعا

بالنسبه للخلط .. متى ماحسيتي ان البيض انمزج عدل ضيفي الكاكاو .. لا تخلينه يرخي بيصير مو متماسك .. و بعد لما تضيفين الكاكاو و تتأكدين انه انخلط عدل اكتفي .. لا تتقيدين بوقت .. و كذلك الطحين ضيفيه عالخلاط و اخلطي .. الغرض من عدم الخلط الزايد اهو ما نبي الهواء يتخلله لان النتيجه ما راح تحصلين على صوص حلو لأنه بيكون مثل الميلك شيك من داخل .. و هذا ما نبيه :)

أم دانية : ما عليج من الشرح لأنه حيل مفصل .. حبيت انه يكون مفهوم .. الطريقه ماتاخذ ربع ساعه .. صدقيني .. كل المكونات على بعض وخلصنا :) الله يسلمج يا الغاليه

قمـ قـطر ــر : يارب تجربينها و تعجبك :)

فرحـ(عبدالناصر)ـتي : طمنتيني يا الغاليه :) صار لي زمان ما سمعت ان في أحد جربها .. عليج انتي و زوجك يا اااااااااارب .. اسعدتيني بتجربتك و ردك ربي يسعدك :)
و فعلا اهيا تشبع .. و تدفي للشتا بعد :) و على فكره .. انا عندي مواعين فخار صغيييييره ... لي سويت فيهم يكون شكلهم ذرب و صغير :)

هذا انا أخيرا تخلصت من الكسل و قررت أنزل الصور للبنات اللي مو طالعه لهم الصور و من سيرفر ثالث .. والله يستر :)
عاشقة البر اتمنى ان تظهر لج الصور


صورة المولتن :


المقادير:
- 1 كوب زبدة غير مملحة بدرجة حرارة الغرفه " و اذا مو متوفره استخدمي مملحه و استغني عن ذرة الملح "
- 227 جم " 8 أونص " كاكاو مبشور شبه محلى semisweet أو حبيبات الكاكاو الجاهزه chips اللي تستخدم في الكوكيز
- 5 بيضات
- نص كوب سكر
- ذرة ملح
- نصف ملعقة فانيليا سائلة
-4 ملاعق كبيرة طحين
- 8 مواعين فخار صغييرة مثل اللي تستخدم في السوفليه
أو بالصينية الخاصة بعمل كيك المافن واللي فيها 12 مكان للكيك.

الطريقة :

- شغلي الفرن بحرارة 450 درجة فهرنهايتية ( تقريبا 230 درجة سيليزية )
- ذوبي الزبدة مع الكاكاو فوق النار على حرارة متوسطة .ولما يذوب عدل بعديه عن النار .


- في خلاط الكيك حطي البيض و ضربيه


. بعدين ضيفي السكر و الملح .


- ضيفي الكاكاو السائل و لما ينخلط عدل ضيفي الطحين . و الفانيليا

- دهني المواعين بالزبدة . استخدمي الفخار
أو المعدن بس حطي بالمعدن الأوراق الخاصه بالكيك و هم دهنيها .


- حطي الخليط في الاكواب . و لا تعبينها . حطي لي نص الماعون بس .


و دخليها الفرن على الرف الوسطي.

- راقبيها ..راح تستوي ما بين 8 إلى 10 دقايق " انا استوت عندي ب 6 دقايق " .. شلون تعرفينها انها استوت . لما تشوفين جوانبها . غالبا بتشوفين سطحها لين نوعا ما بس مو سائل .. عادي لان راح ييبس شوي بعد ما تطلعينه.



بعد ما تطلعينه قدميه على طول .
ممكن ترشين عليه سكر ناعم أو تحطين فوكه آيس كريم .

للاسف الصوره النهائيه مو واضحه بس و الله ما تفرق عن الجاهز اللي ينباع بمحل chocolate bar أو ب water lemon " الكويتيات يعرفونهم "

شكرا لك شكلها سهل ولذيذ إن شاء الله بجربها وبخبر بالنتيجة

الفففففففففففففف شكر لك ياعزيزتى ماقصرتى والله تعبناك معنا بس ولايهمك ان شاء الله مايروح تعبك خسارة مأجورة باذن الله واوعدك انى اسويها وارد لك خبر
وهذة دعوة لك من القلب اللة يرزقك من اوسع ابوابة ولايحرمك من لقأ وجهة الكريم