لاتبخلون علي بالرد تراني جد ضايقة على الدنيا وما اعرف شوي اسوي

مرحبا خواتي....
ترا هذي اول مشاركةلي فهالمنتدي اللي اكثر من رائع واليوم ااانا ياية وعندي امل كبير فالله ثم فيكم القي عندكم الحل لمشكلتي واتمني منك ما تبخلون علي برايكم لاني صدق محتاجه اعرف طريجي وارتاح ....
مشكلتي هي اني انخطبت وعقبال كل وحدة تتمني تنخطب وتتزوج يا رب ... والانسان اللي انخطبت له انسان بمعني الكلمة فيه ولله الحمد كل المواصفات اللي تتمناه اي بنية فهدنيا اخلاق ودين وعلم ومكانة اجتماعية يعني بختصار فارس احلام اي بنية .... وبكل صراحة ترا المشكلة مب فالريال المشكلة فيني انا ...
انا تربيت في بيت ما فيه ريال يعني انا ابوي كان كبير وايد في السن وما شفته الا دوم تعبان ومريض وبعدين توفي وانا تقريبا صغيرة واحنا كلنا بنات مع امي وما عندي اخوان اولاد واختلاطي بالجنس الثاني تقريبا منعدم يعني بختصار ما اعرف اتعامل بالمرة معاه وما عندي اسلوب احس اني جدامه ولا شيء ثقتي في نفسي دوم مهزوزة وهو انسان اجتماعي ومحبوب من كل الناس وانا احس نفسي ما عندي لا صفة وحدة تخليني اكون شيء كبير في حياتة انا بصراحة تعلقت فيه وايد بس احسه مب متعلق فيني بالدراجة اللي تريحني انا ودي اكون شيء له قيمة في حياتة وكل ما حاولت اني اكون شراته ممبدعة في شيء افشل حتى قبل ما ابتدي فالشيء كل شيء فالحياة انا مااعرفه بتصدقوني لوقلتلكم اني ما عندي هواية امارسها واستحي من نفسي يوم يسألني عن شيء واقوله ما اعرفه دايمن يقولي عيل انتي شو تعرفين فالحياة انا مشكلتي ثقتي في نفسي معدومة بالمرة انا الحمد لله ... الله منعم على بالجمال بس دوم اشوف نفسي مب حلوة جدامه وحتى لو فيني شيء الناس تشهد فيه انا ما اشوفه فنفسي وبتصدقوني لوقتلكم اني ما عندي صديقة حقيقية في حياتي كل صداقاتي سطحية زمالة عمل ومعارف العائلة عشان جية شفت فيه الصديق اللي اشتكيلة عن اللي بداخلي من احاسيس ومشاكل بس لقيت انه قام يزهق مني ومن سلبيتي فالحياة واخر شيءصدمني بكلمة قالها لي في مشكلة صارت امبينا انتي متعقدة وانسانه سلبية ادري بتقولون في خاطركم له حق الريال يقول عنج جية بس صدقوني انا ما ودي اعيش جيةولا اكون جية انا بداخلي الكثير من الاحلام اللي للاسف اسيرة لقيود انفرضت على صعب وايد احقق اللي في بالي انا من قلبي ترا ما ابغي اخسرة انا عمري الحين 28سنة واحس اني ما حققت شيء افتخر فيه فحياتي حتى هالانسان اللي قلت انه بيزرع بداخلي شخصية مشابه لشخصيته لقيتة اول واحد يخذلني ويمل مني ودي اعيد الثقة لنفسي او بالمعني الاصح ازرع بداخلي ثقة تخليني فعيون نفسي غير قبل ما اكون فعيونه شيء يفتخر فيه ما ودي اخسره لانه صعب يتعوض دايمن هو يقولي انته فيج شيء من الله كل ما يصير شيء بينا واقرر ابعد اشوف نفسي ما اقدر ابعد عنج انا هالكلام ترا ما يفرحني لانه ما ودي تدخل في قلبه ذرة من التفكير انه يتركني ودي اكون فحياتة شيء صعب يستغني عنه بسهولة خاطري فاشياء كثيرة بس للاسف ما اعرف كيف ابدأ اول خطواتي فهالدرب اللي احس محد واقف فيه معاي ودي اتغير اعرف كيف اتعامل معه انا مرات اتصرف صدق بغباء وما اعرف ليش تصدر مني هالتصرفات ودي تكون لي شخصية حلوة شخصية تقربني لقلبة وتقربني من الناس ودي اترك بصمة حلوة في قلب كل اللي يتقرب مني او يعرفني ...
دخيلكم لا تستسخفون بمشكلتي تراني جد ما عندي حد اكلمة واشكيله اللي فقلبي ...
انتظر ردودكم ....