لاتبخلون علي بنصيحتكم الله يجزاكم خير..

السلام عليكم

سالفتي طويله وان شاء الله تسمعوني للاخر

انا مررره متضايقه ومحتاره ويش اسوي

بصراحه صار لي موقف مافي احد يحسدني عليه

المهم ابدأ قبل يومين زارتني بنت عمي واللي هي متزوجه حديثا (توها جايه من السفر)

هذي مو بس بنت عمي هي اقرب انسانه لي خصوصا ان ماعندي اخوات

جاتني هي مع بنت عمتي وجالسين سوالف وضحك

المهم طق الباب علينا فجأه خالي وكان البيت مافيه احد الا ابوي وهو في غرفه ثانيه

فتحت له الباب وقلت له انه مايدخل لان عندي بنات (خالي اكبر مني بسنتين وهو مو متزوج وقريب مني مره )

المهم راح وجلس مع ابوي وانا بصراحه استغربت وجوده لان البيت مافيه ولااحد من اخواني لان العاده يكون معهم

وصرت اروح للبنات وارجع اجلس معه

لاحظت شي غريب ان بنت عمي طول وقتها ماسكه الجوال وتكتب رسايل وتستقبل وهي تضحك ومبسوطه

وانا ارجع لخالي اشوف جواله تجيه رسايل رحت خذت جواله اسوي نفسي اطالعه لاحظته مرتبك مره وبسرعه خذ الجوال مني

انا هنا حسيت بشي مو عادي المهم رحت المطبخ اسوي شاي له شفته داخل من جهه ثانيه من البيت وراح للمغسله اللي على طول تطل على الغرفه اللي فيها البنات وفجأه بنت عمي فتحت الباب وتسوي نفسها تناديني

وسكرت الباب بسرعه انها ماتدري (انا هنا فار دمي)

دخلت لهم وانا بوجه ثاني ماقدرت اخفي ملامح الغضب من وجهي المهم كملت الجلسه وياهم وهم حاسين اني متغيره ويسالوني وماجاوبت بشي

وبعد فتره قالت لي بنت عمي انها تبي تروح الحمام ورحت وديتها ونفس الحركه تكررت شفت خالي مادري من وين طالع وهي طالعه من الحمام ومو بس كذا تحاول انها تطول المده بالموت تحركت للغرفه وكل هذا وانا اطالع هالمسرحيه القذره وكل على انها صدفه

لساني انربط شي لايصدق رحنا للغرفه اللي جالسين فيها وطول الوقت رسايل وضحك صار ودي اني اطردها من البيت

مش مستوعبه اللي صار المهم حسوا فيني اني متغيره وكل وحده دقت على زوجها بتروح ماحاولت فيهم كثير لاني فعلا بحاله مايعلم فيها الا ربي

واخر موقف صار طق الباب فجأه خالي وطلب مني الابتوب حقي وهذا طلب غريب مو بمحله

قلت له روح غرفتي بعدين هنا دق زوج بنت عمي عليها انها تطلع ولبست عبايتها بعدين اخذتني بره وصارت تسالني وش فيك صرخت عليها انها تطلع ماابي اتكلم قبل لايطلع خالي وفي هالوقت سمعنا صوت خطوات اهلي جايين

راحت بسرعه وطلعت

انا اقولكم هالسالفه وانا مو ستغربه لاني شاكه من قبل فيهم بس اكذب نفسي لاني من جد احبهم بنت عمي اقرب انسانه لي وخالي مرره طيب وقريب لي مره ومو بس كذا قبل زواج بنت عمي اخوي اللي كبر خالي حذرني من بنت عمي وقالي عن علاقتها مع خالي لكن ماعطيته مجال وقلت له ينسى هالسالفه لانها مستحيل تسوي شي مثل كذا

ادري اني طولت عليكم بس حبيت ابين لكم كل شي خصوصا ان بنت عمي مخطوبه من زمان وكانت تحب خطيبها اللي هو زوجها الحين وفجاة ومن غير مقدمات صار اكره مخلوق لها وهذا يوم قرب زواجهم وحاولت ترفضه بس اهلها ماعطوها فرصه لانه مافيه عيب ويحبها من قلب

طبعا الحين عرفت ليه كرهته من هالسالفه اللي وضحت لي كل شي خافي

ارجوكم تساعدوني والله محتاره وماادري كيف اتعامل معهم

انا انساته هاديه ومااحب المشاكل شوروا علي وش اسوي

هالموقف ماثر فيني مره طول الوقت متضايقه ذابحني التفكير :44: