كيفكم ان شاء الله بخير
ندخل بالموضوع اليوم محتاره وش اسوي غداء قمت فتحت كتاب طبخ وقعدت اشوف الطبخات ولفت نظري الكبسه العسيريه مررررره لذيذه وسهله جدا
عاد مدري هي صدق كبسه عسيريه والا صاحبة الكتاب مسميتها بهالإسم
مااطول عليكم نبدأ بالمقادير:
اول شي راح نستخدم قدرين
مقادير القدر الأول
دجاجه منظفه ومقطعه اربع قطع
بصلتين مقطعه شرائح
طماطه ونص مقطعه
فص ثوم مفروم
3 ليمون اسود
5 حبات فلفل اسود صحيح
5 حبات قرنفل صحيح
5 حبات هيل صحيح
ملح
ملعقه كبيره بهارات
ملعقه صغيره كمون
2 عود قرفه
انا حطيت نص ملعقه كبيره كركم عشان يصير لونه اصفر شوي
في قدر تحمسين البصل مع الزيت لما يذبل بعد كذا تحطين الدجاجه وتقلبينها لمدة دقيقتين
بعد كذا تحطين الطماطم والثوم والبهارات كلها وتحركينها لمدة 7 دقائق وبعدين صبي فوقها كاس ونص ماء مغلي وخليها على نار هاديه لما يستوي الدجاج تقريبا نص ساعه وحركيها بين فتره وفتره عشان مايلصق الدجاج في قاع القدر ولو لصق مو مشكله
واذا قربت الدجاجه تستوي نسوي مقادير القدر الثاني
نجي للقدر الثاني:
رز مغسول ومنقوع ربع ساعه ( كمية الرز على حسب الكميه اللي انتي متعوده عليها )
طماطه مقطعه
ملح
عود قرفه
حبتين هيل صحيح
حبتين قرنفل صحيح
ملعقه كبيره سمنه
تسيحين السمنه على النار وتحطين الطماطم وتحركينها لما تذبل
بعد كذا حطي الهيل والقرنفل والملح وعود القرفه وحركيهم وبعد كذا حطي الرز وحركيه بشويش وانتبهي لايتكسر الرز ولما يبدأ يلصق الرز بالقدر صبي كاس ماء مغلي وخليه يستوي نص استواء على نار هاديه
هذا شكل الدجاج لما استوى
والحين نحط الرز على الدجاج ونحط فوقه 4 قرون فلفل حار
وهذا شكله بعد ماغرفته
وهنا من قريب
معليش ماصورت صور كثيره مرررررره كنا جوعانين والريحه شهيه
استودعكم الله دعواتكم لي اتزوج اللي في بالي والله يرزقني بالذريه الصالحه