لاتفوتكم رومناسية ابو زيد مع جوال الزواج

حبيت انقلكم هالموضوع قريته في منتدى وبغيتكم تقرونه

اترككم مع قصة ابو زيد

يقول ابو زيد:

قصتي مع جوال الزواج 88088

بسم الله نبداء

يالله حيهم

قبل ما أبدى في الموضوع عندي سالفة، وهي أني ولله الحمد متزوج من سنتين وللمعلومية وهذي نصيحة

للعزاب ترى الزوجة تاخذ منك نسخة كاااملة من خلال شهر العسل وشهرين عقبها

تشوف أنت رجال اتكيت وإلا حريص على أهلك وإلا أنك منتب لم الدين زود، يعني تاخذ عنك معلومات وافية

وشاملة خلال ثلاثة أشهر يتحدد من خلالها طريقة تعاملها معك وانا الحين لي سنتين يعني مطلعة لي

معلومات مزيدة ومنقحة بعد

الشاهد أن عيبي الوحيد أني منيب لم السنع وأحس حياتي ملل في ملل، يعني تقوم الصبح تفطر في الدوام

تجي تنوم تتغدى تطلع اما لاستراحة وتنطلها لبيت اهلها وتجي في الليل وتنام

، يعني تخطيط الله بالخير لو تسويه الدوله كان دجينا ودمجونا مع الامارات

يعني حتى في الغزل ما أعرف ولا أعرف شغلة الرومانسية الي يقولونها، يعني حتى زوجتي يوم جت تبي

تدردش معي وقالت لي وش هواياتك بغيت أقول جمع الطوابع بس ما قويت ، لا وبغيت مثل الي يقول

أحسن هواية عندي مشاهدة الخيول عند المنعطف الأخير ، يعني الرومانسية في ديرة وحنا في ديره

قابلت لي مرة أبو نواف وهالرجال من أسمه تحس أنه زكرت ورجال يعني لو تطري له الحرمة الثانية قال

لك مشينا ، أما أنا لو تسولف فيها سواليف استراحة انتفضت وقلت: اللهم احفظهم لنا ذخراً يارب

العالمين .. وسكنهم مساكنهم

قالي يا بو زيد أنك حالتك مستعصية لكن فيه شي يمكن يصلح لك طايحين فيه هاليومين، قلت له وشو

قالي: فيه مشروع ابن باز الخيري منزلين لهم جوال رقمه 88088 شايفن أعلانه في الجريدة

وكثير من ربعي في المدرسة مجربينه ويمدحونه

وأرسل لهم واشترك

انا يوم قالي ارسل لهم توقعت اني اكتب قبل الرسالة حرف (ر) زي صباح الرياض الي يجيبونه الصبح

قالي ترى رسومه في الشهر 12 ريال مهيب شي

وانا قلت في روحي والله انها غويليه شوي12 ريال ذي ، بس ميزتها شهر،

إذا ضبطت الأمور وإلا كنك طالب لك وجبة برست في داجن

طبعا اول ما ارسلت علمني قالي فيه قناة للزوج رقم 2 وللحريم3 ، الشاهد أني سجلت في حق الزوج ،

وقام يرسل لي نصايح بصراحة حليوه

يعني مرتن يقولي عن الحريم وطريقة تعاملك معهن، ومرتن أرسل لي يقولي جب لها هدية وإلا ورود، ومير

أطمر لمستشفى دله اخبر فيه محل هدايا وورود، ومير خذت لي وردة حمراء كذا يقولي تصلح للحريم وأخذ

لي كرت وتوهقت مدري وش أكتب في الأخير كتبت لها: أحلى تحية لأم زيد حبتيييييين >>

لا تصدقون أني غبي لهالدرجة

كتبت لها ان هذا مهب شي في حقتس والجايات أكثر وأدخل بها للبيت وأول ما عطيتها إياه يجيك أبو

التحطيييييييييم تقولي: هاااه وش الطاري؟!

ومير أذكر أن فيه رقم للحريم واستغفلها وهي مصلحتن الغداء وأشترك بجوالها >> أصلا هي تدفع

فاتورتها يعني بغيت اشترك عني وعنها

المهم وبدت تجينا بعض الشغلات الحلوة زي كل واحد يجيب هدية للثاني ، ومرتن أشوفها شاريتن ورود

وشمعات وحركات نص كم ، وكله بفضل الله ثم هالرسائل الي يرسلون مره نصايح ومره حركات حلوه

للتغير، صار كل يوم مسوين شي ، إما أننا نطلع برى وإلا أشتري لها حلاو البقر الي تحبه ومرتن أجي

ومجهزتن لي المغطس موية دافية >> أثره هذا الحمام الي يقولون عليه في الأفلام وأنا أقول يا ربي وشو

ذا الحمام الي يجهزونه

حتى في الكلام أختلف يعني اناديها حبيبتي وهي تناديني يا بعدهم ، مهب مثلنا أول هيه وحصه وصمخ ،

لدرجة أنهم يقولون ضع في فمها قطعة شوكلاته >> تراه مهب اسلوبي ناقشها من الجوال

الشاهد ترى هذا مهب الموضوع يقالك المقدمة

بس بصراحة أنا أقولكم أني جربت هالخدمة وجزاهم الله خير هالمشروع محتسبين الأجر في هالخدمة يعني

رسايلن تستفيد منها وتساعد الشباب الي يتزوج مهب مثل الجوالات الثانية

اذكر مره قبل جوال الزواج بغيت اجرب خدمة قالي واحد انك ترسل لهم بخمسة ريال ويرسل لحرمتك تهنئة

وزي كذا علشان العيد ومدري وشو وهذا مما يزيد الأواصر المحبة بين البلدين الشقيقين

المهم وأنا أدربي هالراس خمسة أريل مهيب شينه وأرسل لهم وتوقعوا وش أرسلوا لها

مرسلين لها اغنية حقت كاضم الساهر: كل عام وأنتي حبيبتي !!!

يعني أغاني يالي ما تستحون وتونا مضحين وصايمين عرفة؟

يعني أنا ما أعرف أقول كل عام وانتي بخير؟! وإلا من كاضم أحلى ؟! وش فرقه عنا إلا أنني سعودي وألبس ثوب !

فهذي هي تجربتي مع الخدمة بصراحة كسرت الروتينية الي عندنا وبيني وبينكم مالي خلق أدخل منتديات

الزواج ومدري وشو ومواضيع طويلة ونصها استهبال اما ذي رسالة تجيك في وقتها تقدر تسويها

وواضحة مهب موضوع وش طوله يبيلك ساعتن تقراه ،

والحين يالله لك الحمد تعلمنا الرومانسية