لاتقرأين موضوعي لن تجدين فيه ماتريدين

السلام عليكم ورحمة الله وبركاته مساء الورد حوائيات بنات دايماً اقرأ في هذا المنتدى زوجات يتشكون من اخوات ازواجهم وانهم ثقيلات على قلوبهم ومايحبون يسافرون معاهم ولايطلعون وياهم في تماشي وطلعات والذي منه طيب ليه يابنات انا متزوجة وزوجي عنده 3خوات مو متزوجات ودايماً يسافرون معانا عمري ما اخذت الموضوع بحساسية ابداً ابداً ابداً الابالعكس نفلها انا وياهم هم بنات عمي على فكرة يازينهم ويازين السفر معهم تدرون يسمعون كلامي اكثر من اخوهم وعمرهم ما يركبون قدام وانا اللي الزم عليهم احياناً يوافقون واحياناً يقولون لأ والله مايطلع قدام الا انتِ وحده قريبة مني في السن وثنتين اصغر مني ودايماً سواليف وضحك وتعليقات تصدقون من اسبوعين نامت عندي البنوته الوسطانية وفاجأتني بصور لسفرة رحناها قبل 3سنوات تقريباً انا نفسي انمسحت من عندي استغربت لما قالت لي الذكريات الحلوة ماتنسي مستحيل امسح هذي الصور والله يابنات انهم يحترموني بشكل عجيب ويحبوني لو اقول لكم على مواقف ماتصدقونها السر يابنات انا من زمان اطبقها الدنيا هذي سلف ودين البر لايبلى والذنب لاينسى والديان لايموت اليوم انتِ متزوجة مايندرى بكرة وش تكونين ارملة مطلقة والا حتى ميته في قبرك ليه الاسى والحسد خليهم يسافرون معاكم واللي تقول خصوصية والا راحة مع زوجي اقول لها انتِ بتسافرين كم يوم يعني وش هالخصوصية اللي بتخترق الله اكبر يالبنتاقون لغير المثقفات هذي وزارة الدفاع الامريكية عادي بترجعون بيتكم وسووا اللي يعجبكم انتِ وزوجك والا ماتكون فيه سفرات وطلعات ماتسمح لهم ظروفهم يروحون معاكم عاد خذوا فيها راحتكم الزبدة الجنة بدون ناس ماتنداس خليكم على طبيعتكم وعيشوا الحياة ببساطة وعاملوا الناس تماماً كما تحبون ان يعاملوكم اخوات زوجي الحين وحدة مملكة والثانية انخطبت وراح يروحون من عندنا الله يستر عليهم ويسعدهم والله اني بفقدهم ببساطة حبي من حولك تبتسم لك الحياة سبحان الله وبحمده سبحان الله العظيم ربي لاتذرني فرداً وانت خير الوارثين مع الف سلامة👋