أرجو من اللي يرغب في نقل الموضوع ذكر إسم صاحبة الموضوع لأنه اجتهاد شخصي
الطفل مثل الكبير له مشاعر وأحاسيس ...
لا تقولين طفلي مايجيبه الطيب .... لأن مع كثرة القول طفلج ممكن يتأثر ويتغير ولو بعد فتره طويله... لكن بيتم التأثير على المدى البعيد لأن بتكون انغرست فيه العادات إللي تحبين تشوفينها في طفلج ....
بعكس إذا عاقبتيه ممكن تكون النتيجة سريعة ... لكن تأثيرها ممكن يزول بزوال السبب
كلمي طفلج بصوت دافي وبنبرة حنونة ونظرة حب
طولي بالج .... كثيــــــــــر يعني ممكن يخطئ خمس مرات وفي الخامسه ممكن تعاقبينه بحب
يعني إذا وبختيه .. أثناء كلامج ممكن اتدخلين كلمة حبيبي ... يا حياتي ....
ممكن تحرمينه من شي يحبه ... وتقولين بحنان ... حبيبي أنا سامحتك كذا مرة ... بس إنت مصر على الخطأ ... أنا مجبورة أعاقب ... مب لأنك كَسرّت ... تفداك الأغراض إللي في البيت كلها ... لكن أعاقبك لأني زعلانة ... إذا الناس قالت ولدها يكسر الأغراض أو مايسمع الكلام ... فشو موقفي ؟؟؟
وخلييج عند عقابج ولا تتهاونين ... لأن هذا الشي ممكن يفسد التربية .... ماما تعاقب ... بعدين أكيد بتسامح ... أو باباي يعاقب وماما بتتوسط لي ، وينتهي العقاب ....
( من أمن العقوبة ساء الأدب )
لا تقولين ياويلك إن رجعت البيت وملابسك وسخة :angry2:
- قولي ما أجملك يوم ترجع البيت وملابسك نظيفة
لا تقولين الله ياخذك ... والا ياليت يوم ولدتك بركت عليك :angry2:
- قولي الحمد لله إللي وهبك لي هدية
لا تقولين بسير أرقد وما أبغي أسمع صوتك :angry2:
- قولي أنا أدري الحلو مابيخلي أحد يسوي إزعاج علشان الماما محتاجة ترقد وترتاح
لا تقولين أف ذبحتني بشقاوتك ... إياني وإياك تكسر أغراض البيت :angry2:
- قولي الحمد لله إن الله رزقني بولد مثلك يحافظ على أغراض البيت ومنظره علشان الناس يوم تدخل ... تقول ما شاء الله على الولد إللي يحافظ على نظافة بيته.
أنا أعتذر لأني أخطأت التعبير
لكن جزاها الله 1000 خير أم عبدالرحمن مشرفة قسم الأطفال نبهتني لهذا الخطأ ... ولها مني مليون تحية
لا تقولين قوم ذاكر وحل واجباتك :angry2:
- قولي شو رايك تذاكر علشان نقعد مع بعض نلعب ونسولف بدون ما نحاتي واجباتنا
لا تقولين إنت غبي أو إنت عبيط أو إنت ماتفهم ... راعي قدرات الطفل للإستيعاب :angry2:
- قولي ماما خلنا نعود أنفسنا نفكر ونركز قبل ما نسوي أي شي أو نقول شي ( لاحظي صيغة الجمع ... علشان الطفل مايحس إنه استيعابه بطيء وهذا عيب يخصه بروحة فينطوي على نفسه )
لا تقولين إنت عنيد وما يفيد فيك غير الضرب :angry2:
- قولي ما شاء الله عندي ولد يحبني ويسمع كلامي فيستاهل إني أسمع كلامه ... فشو تحب تاكل اليوم أو وين تحب تسير في نهاية الإسبوع أو شو الهدية إللي تبغيها أو تستاهل بوسه كبيرة أو تستاهل ضمة قوية علشان ما يتعود الطفل على الجزاء المادي
لا تقولين عمرك ما بتصير مثل فلان ... أو الله عطى الناس عيال وعطاني أنا ولد مثلك خايب :angry2:
- قولي أحبك يوم تسوي أشياء تشرف علشان أفتخر فيك قدام الناس يتمنون عيالهم يكونون مثلك
لا تقولين إنت مامنك فايدة في الدراسة أو بذبحك إن جبت لي درجات واطية :angry2:
- قولي أنا واثقة إنك ما بتخيب ظني فيك ... وما بتجيب غير الدرجات الحلوة إللي مثلك
لا تقولين كل أكلك وماأبغي أشوف شي في صحنك :angry2:
- قولي خلنا نشوف من الأشطر أنا والا إنت منو إللي بيقدر يخلص إللي في الصحن
( لا تحاولين تترسين الصحن فوق طاقة ولدج علشان ما يحط في خاطره إنه ماخلص صحنه وخسر )
( لا تقولين لولدج خلنا نتسابق والا منو يخلص قبل الصحن .... علشان ما ياكل بسرعة فتتعب معدته لأنه ما يقدر يهضم بسرعة أو يغص إسم الله عليه )
لا تقولين لطفلك يا حمار أو يا حقير
( لأنج قدوة ... فلازم تراعين ألفاضج وبالذات إنج أم واعية وفاهمه ما شاء الله عليج )
في النهاية أتمنى إني أكون قدمت الشي المفيد
دلوعة & حبوبة @dloaa_amp_hbob
محررة فضية
يلزم عليك تسجيل الدخول أولًا لكتابة تعليق.
وجدوحنين
•
مشكوره عزيزتي على العبارات الحلوه احسها اثرت فيني فمابالك بالطفل:kiss:
روض الفل :
راااااائع الله يقدرنا ونربي أطفالنا تربية سليمة تسلمين ياغاليةراااااائع الله يقدرنا ونربي أطفالنا تربية سليمة تسلمين ياغالية
الصفحة الأخيرة