السلام عليكم ورحمة الله وبركاته
ما دعاني لكتابة هالموضوع بعض الردود الغريبة على بعض المواضيع ..
للاسف اشوف عينات يستهزئون باللي يحبون الخير للناس واللي ينصحون غيرهم !
وبكل موضوع فيه غيرة على حرمات الله تلقينهم يسابقون بالإستهزاء والتقليل من شأن الموضوع وتشكيك الكاتبة بنفسها وبنيّتها ..
نسوا قول الله تعالى " كنتم خير أمة أُخرجت للناس تأمرون بالمعروف وتنهون عن المنكر وتؤمنون بالله "
نفس العينات هذي بالامس تستهزئ باللي تنكر على صاحبة العبايات المزركشه والمزينه وتقول ان الناس وصلوا للقمر وانتم للان بهالسالفه ؟ وكأن دين الله خاص بالعصر القديم فقط ومايناسب عصرنا الحالي لذلك ماتبينا ننصح عن المعاصي ونواكب احداث وصول الناس للقمر !
ونفس هالعينات هذي اليوم تستهزئ باللي تبي تنصح غيره لانه ترتكب كبيرة من كبائر الذنوب وهم يردون عليها : الله بيحاسبها وش دخلك ؟! يُعصى الله في أرضه بكبيرة من الكبائر وتسألين وش دخلك ؟!
دخلني إني أعيش معك على هذي الأرض ومابي الله يعذبني إذا نزل العذاب بهم لاني ساكته عن النصح قال تعالى " واتقوا فتنةً لاتصيبن الذين ظلموا منكم خاصة " ماراح تصيب اصحاب الكبائر فقط حتى اللي ساكتين عليهم يعتبرون مثلهم ، ابن عباس رضي الله عنه لما فسّر هذي الآيه (واتقوا فتنة لا تصيبن الذين ظلموا منكم خاصة)
قال: أمر الله المؤمنين أن لا يقرُّوا المنكر بين أظهرهم، فيعمَّهم الله بالعذاب ..
عرفتوا وش دخلني ؟
يعمّنا الله بالعذاب ، وعلشان مين ؟ علشان مجموعة قاعدة تبث فينا روح الإنهزامية والخجل وتحاول بث فكرة ان اللي تنصح ملقوفه ، واللي تبي الخير للناس معقده ، واللي تتمنى ان الكل يلتزم بتعاليم الإسلام الصحيحة هذي من العصر الحجري !!
وانا مادري هل هذا حب لإشاعة الفساد بين المسلمين أو تحريض المسلمين للتخلي عن أساسيات دينهم " الأمر بالمعروف والنهي عن المنكر " ؟!
الرسول ﷺ يقول " من رأى منكم منكراً فليغيره " وهالأشكال الغريبه تقول : مالك شغل !
الله عز وجل في قصة أصحاب السبت أنجى المصلحين الناصحين اللي صمدوا بنصحهم بقريتهم مع ان القرية كله كانوا غاسلين يدهم من اصحاب هذي المعصية - من عظم ذنبهم - وكانوا يقولون للناصحين ( لِم تعظون قوماً الله مهلكهم أو معذبهم عذاباً شديداً ) واهل النصح يردون ( معذرة إلى ربكم ولعلهم يتقون ) معذرة الى الله حتى إذا جاء العذاب مايشملهم بالدنيا وعلشان يوم القيامة مايجون اصحاب المعاصي ويقولون ليش شفتونا على خطأ وماانكرتوا ونصحتونا ؟
والنتيجه ؟
( فلما نسوا ما ذُكِّروا به أنجينا الذين ينهون عن السوء وأخذنا الذين ظلموا بعذابٍ بئيس بما كانوا يفسقون )
لما انصح أحد يعني اني احبه وابيه يصير من افضل الناس لكن هالنوعيات اللي للاسف انتشرت بمجتمعنا وبمنتدانا تقول ان اللي ينصح ملقوف والعذر ان الحساب بيد الله عز وجل ! يعني عادي تشوفين احب الناس لك على خطأ وماتسوين شي وتنتظرين عقاب الله له !! وش يفيده حبك اذا هذا اللي تنتظرينه له ؟!
واخيراً اختم بقول الفضيل بن عياض - رحمه الله - قال :
من رأى من أخ له منكراً فضحك في وجهه فقد خانه ..
الله يهدينا ويجعل في قلوبنا حب لغيرنا يجعلنا ننصحهم ونساعدهم لأننا نتمنى ان ندخل الجنة معهم ..
اللهم صل وسلم على نبينا محمد وعلى اله وصحبه وسلم تسليماً كثيرا..