بسم الله الرحمن الرحيم
انا فيونكة حمرا
نفسها ماغيرها
بكامل قواي العقلية>>احلفي!!
بقولكم سالوفتي
يارب ماارحمك
مااعظمك
سميع قريب مجيب
انا كنت ادرس خارج السعودية
جلست في الغربة 6سنوات رغما عني
تلبية لرغبة ابوي وامي ولاجل افرحهم
اهلي التعليم العالي مهم جدا جدا عندهم
وياحليلها امي بين الحريم وهي تقول بنتي الدكتورة وبنتي المهندسة وبنتي المدرسة
تفرح كثييير
يعلم الله هال6 اعوام كيف مرت علي
غرربة غرربة غرربة
احس عمري انفرط بين يدي
والحمدلله هذا اختيار ربي لي ولعل فيه الخير الكثير
المهم قبل شهور كنت في اخر تيرم لي
وتعرفون كيف الانسان عندما يقترب من النهاية
يعووف حاله
كنت خلاص حالفة يمين والله لو رسبت او حتى حملت مادة واحدة
ماني راجعة هالبلد
خلاص عمري ضاع صحباتي تزوجو وخلفو واتخرجو وانا لسه في غربة
تيتي تيتي مثل مارحتي مثل ماجيتي
المهم كاني طولتها؟؟
استانسو استانسو الليل طويل وطفش
عندي بالتيرم الواحد 6 مواد اساسية ومادة كنت حاملتها من العام
يعني 7
والمادة اللي كنت حاملتها كان محدد اختبارها قبل الاختبارات النهائية ب10 ايام تقريبا
والله والله ان اختي جابت لي النتيجة اول السنة
وانا رحت شفتها بنفسي
ولاصقن في عقلي ان المادة المحمولة هي احصاء تطبيقي بالانجليزي
واروح يوم الاختبار المحدد مذاكرة صم
والف على لجنتي من الساعة 8ونص الى الساعة 9!!
والاختبار بدا من 8 ونص
واسال العاملين وين اللجنة يدورو اسمي مااافي
يارب الاختبار فات
كيف تغلطو وماتحطو اسمي!!
قالو مالك الا تنزلي للادراة المسؤولة عن النتايج يمكن من العام في غلط في نتيجتك وانتي ناجحة اصلا
نزلت لهم قالو فلانة بنت فلان؟
قلت ايه
قالو مين قال لك انتي راسبة في هالمادة؟
انتي راسبة في احصاء تطبيقي عربي!!
يعني مادة ثانية!!
قلت طيب مايخالف اذاكرها ولو بيوم ربي كريم بس متى اختبارها؟
قالو يابنت الحلال هالمادة فاتت كانت الربوع اللي راح!!
ياويلاه ويلاه
يعني بعتبر غياب في المادة ورسوووب على طول
والله حسيبهم في هالبلد يرسبون الطلاب خصوصا اللي مثلي توجيه خارجي عشان المصاريف
يعني ماراح يدخلوني دور ثاني راح يحملوني مواد ثانية واعيد السنة كلها
دارت الدنيا فيني
يعني خلاص انا راسبة!!
عالاقل اضعف الايمان اللي اكيدة منه اني راسبة في هالمادة
ولسه مااختبرت ولا مادة من مواد التيرم الثاني يعني ممكن اخبص في مادة وارسب السنة كلها
قلت بدخل لعميد الجامعة اقوله انا مو من هنا وابي ارجع ديرتي
ارجوك ساعدني
رحت عند سكرتارية العميد
شرحت لهم على بالي داخلة على ابوي هههه
قالو وين وين وين
انتي لو قلتي له انك نقلتي نتيجتك من العام غلط راح يقول لك مو مشكلتي انتي ليش ماتناظري مضبوط
قلتلهم والحل؟
قالو يوم كذا في اعادة لها المادة للمرضى والعاجزين
جيبي تقرير طبي انك كنتي مريضة من يوم الربوع الى يومنا هذا عشان مايقول لك وينك ساكتة من عقب المادة
قلت مو مشكلة الفلوس تشتري كل شي
اروح اي مستشفى خاص وادفع فلوس اسوي تقرير طبي
قالو لا ياحلوة لازم من مستشفى حكووومي ومن المستشفى التابعة للجامعة!!
قالو لي حاولي تقولي لاي عاملة هناك تساعدك وعطيها مبلغ محترم
والله اني فتحت شنطتي وعديت الفلوس اللي معي
يمكن طلعت 100 قلت خلاص بعطيهم كلها بس اهم شي يدبروني
وانا مااعرف البلد زين لاني غريبة قعدت اسال الناس وين المستشفى الفلانية
والحمدلله وصلت وطول الطريق ابكي
بعدين ضميري صحي!!
قلت طيب لو دفعت فلوس هذه مو تعتبر رشوة؟؟
والشيطان يقولي لا مو رشوة انتي مابتاخدي شي مو لك او تتعدي على حق احد!!
وانا اقول يافيونكة رشووة والله
وهو يقول طيب احسن ارسبي وعيدي سنة كاملة على حس رشوة ومو رشوة
طول الطريق في التاكسي ابكي اقول يارب لو دفع الفلوس لاجل اطلع شهادة طبية في غضب لك لا تيسره لي
يارب انا الحين في الشارع مافي مجال اصلي استخارة
ولا في مجال اسال عن الفتوى يارب انت اعلم مني
ان كان رشوة ماابيها ارسب ولا اغضبك
وكنت اقول ارسب ولا اغضبك وتخنقني العبرة لمن يمر قدام عيني صورة امي وكسرة فرحتها وتخيلي اني برجع لغربتي ثاني على حس لخبطة جدول
وصلت المستشفى
ماراح اخوض في تفاصيل الطوابير
شفت ناس مريضة جدا
وفقيرة
متكدسين
ومع ذلك في قلوبهم رحمة يجوني الحريم اش بك يابنتي تبكي ؟
وانا اقولهم ادعولي وبس
وامشي في الاسياب ادور على احد يساعدني
متخيلين غربة الوطن والمكان؟
اااااه وحدة ياربي
مين اسال مين اشور
كل عاملة امسكها تقولي لا مااقدر مسؤولية
كل دكتور اقوله يشوفني طالبة جامعة يقول هذه لعابة يخاصم ويمشي
وطبعا لابسة عبايتي شكلي ملفت جدا
المهم يارب بارك له ويسر له امره
انسان يابنات قمة في كل شي
طبيب شاب
ماشي في طريقه
قلتله لو سمحت
وبكيت كان اليأس بلغ مني مبلغه
كانت الساعة 12 الظهر!!
3 ساعات وانا ادور وابي الحق العميد قبل لا يمشي عشان يعطيني موافقة على اعادة الاختبار
قال لي اش فيه؟
حكيته السالفة
قال لي تعالي العيادة
رحت معاه سوا لي تقرير طبي
وقعد يفكر هو وزملاءه اش ممكن يحطو سبب اني غبت
تخيلو اش حطوا لي مرض!!
شرخ شرجي ههههه
على اساس ان كان عندي نزيف ومااقدر اجلس عالكرسي الاختبار
وقال لي يابنت الناس انا هذا اللي اقدر اسويه
قلت له وشو!!!
وش باقي بعد
قال لازم مدير المستفى يوافق
وتروحي تدفعي رسوم استخراج تقرير طبي
وممكن المدير مايوافق لان عندنا تعميم ممنوع نكتب تقرير بتاريخ ماضي
يعني تيجي بنفس اليوم نعطيك تقرير لكن اثبات انك مريضة من اسبوع ممنوع
تبغي ولا خلاص نشق الورقة؟؟
قلتلها مافي حل قدامي غير هذا خلاص بوديه لمكتب المدير
رحت لمكتب المدير ودفعت الرسوم وقالو لي تعالي يوم الخميس
قلت لهم كيييييف
لازم الحين اوديه للجامعة!!
قالو ياماما ماينفع بالدور
رجعت الجامعة ودخلت للعميد
قلتله انا كنت مريضة يوم الاختبار ورحت المتسشفى
قال لي جيبي تقرير طبي
قلتله طيب التقرير يطلع يوم الخميس
قال جيبيه ويصير خير
طبعا خرجت من عنده وانا ماادري وش مصيري
اليوم اثنين اش راح يصبرني ليوم الخميس
وفرضا ماطلعت يوم الخميس!!
احدى العضوات هنا دلتني على دعاء
يارب انت لها ولكل عظيم فارجهاا بسم الله الرحمن الرحيم
وقعدت اقوله من يوم الاثنين ليوم الخميس
وادعي وابكي وتعلق املي بالله
وقعدت اقوله يارب انا مارضيت ادفع رشوة عشان رضاك
مرت الايام بطيئة
يوم الخميس رحت لمدير المستشفى
السكرتيرة قالتلي للاسف الورقة ماطلعت!!
ايش؟
كيف؟
ليش!!
قاللتي ماندري راجعي المدير والاخلاق شينة طبعا
دخلت للمدير قال لي يااختي الطبيب كاتب لك انك كنتي تراجعي المستشفى من قبل ومايصير نطلع تقرير بالماضي!!
قلتله يعني هي حبكت على كلمة كانت!!
خلاص شيلها!
قال لي طيب بيصير التقرير ان المريضة مصابة بشرخ شرجي يمنعها من الجلوس ومعاها نزيف
قلتله خلاص اكتب كدة وانا وحظي والله كريم
ورجعنا ثاني قال للموظف عدل التقرير ويمكن تستلميه اليوم ويمكن لا
وقتها اذن الظهر
قلت للموظفين ابي اصلي
مافي مصلى حريم
اخدني موظف بعمر ابوي الله يوفقه يااارب
قال لي تعالي يابنتي بمكتبي
وعطاني مفتاح مكتبه بحمامه وقال لي خدي المفتاح اقفلي على نفسك عشان تطمني
والحمدلله صليت واستخرت ودعيت كثير
وهالموظف قال لي روحي للموظفة اللي بتصلح لك التقرير
قولي لها انا خالي الاستاذ فلان يقصد نفسه يقولك خلصي لي التقرير الحين
وفعلا رحت لقيت الموظفة مريحة لمن قلتلها اني واسطة
خلصته
والحمدلله كان بختم الدولة يعني اصلي ههه
بسررررعة رحت للعميد الحقه قبل لا يخرج
وعطيته التقرير واعطاني موافقة اني ادخل اختبر
والحمدلله دخلت اختبرت مع المتاخرين
قلت يمكن لو كنت اختبرت بوقتي كان جاتني الاسئلة صعبة ورسبت
وعسى ان تكرهوا شيئا وهو خيرا لكم!!
يارب انت لها ولكل عظيم فافرجها بسم الله الرحمن الرحيم
ادعوه عند الكرب
يارب لك الحمد
(فيونكة حمرا) @fyonk_hmra_1
محررة فضية
لاتيأسوا..هذه كربة فرجها الله علي بدعاء قصير..ادعوا الان وصلو في جوف الليل هذه قصتي
8
7K
يلزم عليك تسجيل الدخول أولًا لكتابة تعليق.
نوووران
•
هذا هو الدعاء الي دعيتي فيه
يارب انت لها ولكل عظيم فافرجها بسم الله الرحمن الرحيم؟؟؟
لقافه كنتي باي دولة
يارب انت لها ولكل عظيم فافرجها بسم الله الرحمن الرحيم؟؟؟
لقافه كنتي باي دولة
نوووران :
هذا هو الدعاء الي دعيتي فيه يارب انت لها ولكل عظيم فافرجها بسم الله الرحمن الرحيم؟؟؟ لقافه كنتي باي دولةهذا هو الدعاء الي دعيتي فيه يارب انت لها ولكل عظيم فافرجها بسم الله الرحمن الرحيم؟؟؟ ...
ياقلبي مو لقافة ولا شي اسالي براحتك انا كنت بمصر
ايوة هو هذا الدعاء اللي ركزت عليه
بس كنت ادعي كل الادعية المأثورة واقرا سورة البقرة يوميا
وادعي في جوف الليل
يعني خدي بالاسباب وكله مع بعضه اهم شي طرق باب الله وحده
ايوة هو هذا الدعاء اللي ركزت عليه
بس كنت ادعي كل الادعية المأثورة واقرا سورة البقرة يوميا
وادعي في جوف الليل
يعني خدي بالاسباب وكله مع بعضه اهم شي طرق باب الله وحده
الصفحة الأخيرة
*سبحان الله وبحمده .. سبحان الله العظيم*