لاتيأسو من رحمة الله(قصص للتفائل)...

بسم الله الرحمن الرحيم 
السلام عليكم ورحمة الله وبركاته 
أخباركم حوائيات من زمان عنكم اشتقت لكم مره وبالذات هالقسم بس كنت اتابعكم دايم فديتكم أنا كنت هنا متأخرة بالحمل وربي رزقني ولد الله يصلحه والله يرزقكم الذريه الصالحه والله  يفرح قلوبكن دعواتي لكم بظهر الغيب  
وحبيت افضفض لكم واعطيكم شوي تفائل 
حابه اقول شغله لازم نرحم انفسنا من التفكير دايم في الحمل والخوف من المستقبل لازم نجدد التفائل فينا كل يوم 
مثلا انتي ماخذه كورس تنشيط وماصارحمل والدوره جتك لاتتشائمين قولي بالعكس يمكن خيره لي يمكن يكون جنين مشوه او ولد عاق اويمكن صحتي هالفتره مو زينه يبيلي اهتمام شوي
يعني الله مايأخر شئ الا لحكمه 
اويمكن في التأخير تقرب لله أكثر أنا أول كنت اتساهل في أمور وبعد ماتأخر حملي تقربت لله وللحين قاعده اجاهد نفسي والله يهديني ويهديكم  
أنا بقولكم قصص تجدد أملكم ولاتخليكم تيئسون 
القصة الأولى...
احدى قريباتي كانت تحمل وتجيب اطفال تعبانين واعاقتهم عقليه وجسديه وصارت تهتم بوحده والثانيه بالمستشفى وحطت في بالها أنها تقعد ع المانع طول عمرها لأن الدكاتره قالوا لها كل اطفالك بيكونون كذا لأن زوجك قريبك وهذا شئ وراثي وسمعت كلامهم واستمرت ع هالحال كم سنه وتعبت بنتها وراحت للمستشفى وسولفت مع وحده وسألتها عن وضع بنتها وقالت لها عن حالتها  وقالت المرأه وضعك مثل وحده من جماعتنا كانت خايفه تحمل وتوكلت على الله وانجبت أطفال سليمين مع ان الدكاتره قالوا لها مثلك ورجعت من المستشفى وتوكلت على الله وقررت تترك المانع والحمدلله ربي رزقها بولد سليم الله يصلحه ويخليه لها وواحد من الدكاتره جاء واعتذر منهابعد ماشاف ولدها قال فعلا احنا بشر مانعلم الغيب حتى لواخذنا أعلى الشهادات ودعواتكم ربي يشفيها ويخليها لعيالها 
القصة الثانية... 
وحده معنا من سكان الحي من يوم كنت صغيرة واسمع انها تحمل وتسقط وبعضها تسقط ع الخامس او السادس وقالو ان عدد تسقيطاتها يمكن عشر مرات والحمدلله ربي رزقها قبل سنتين بولد مع ان لها اكثر من عشرين سنه متزوجه والله يصلحه ويبارك لها فيه
القصة الثالثة...
وحده قالوا لها عندك مشكلة في الدورة ومأثره ع التبويض وكثر كلام الدكاتره عليها وعالجت فتره وحملت بتوأم وبعد ماطلعت من الاربعين ع طول حملت والحمدلله انتظمت دورتها والله يصلح عيالها
القصة الرابعة...
هذي قريبه مني حيل الله يعوضها خير ويشفيها تزوجت ومرت الايام ومافيه بوادر حمل وراحت تكشف قالوا ضعف تبويض وعطوها منشطات وماصار حمل وراحت للممرخه وعطتها عشبة المدينه قالت اكليها انتي وزوجك وتفاجئت بحملها وجابت بنت الله يصلحها ويبارك لها فيها وتأخرت في الحمل أكثر من عشر سنوات بعدها وطلع السبب من الزوج ورفض يتعالج وانفصلو لاأسباب ثانية الله يعوضها خير 
القصة الخامسة...
وحده بعد ماكشفت تأخر الحمل طلع المشكلة عند الزوج وصبرت كم سنه وماحملت وكم مره تترك البيت وترجع لزوجها وبعدها تركته وطلبت الطلاق وتطلقوا وبعدها بفترة تزوج وحدة ملتزمة وعرفت بمشكلته ع طول قالت راح نبذل الأسباب وتعالجو بالقرآن وعند الدكتور شهرين او ثلاثة وحملت وبعد ماولدت حملت بالثاني ع طول وزوجته الاولى تزوجت وربي رزقها بتوأم الله يصلحهم ويبارك فيهم  
القصة السادسة...
وحدة ظلمت حرمة ودعت عليها ماتشوف الولد  ابداً وتزوجت وحملت اذا وصلت الشهر الخامس يموت الجنين بدون سبب وتذكرت الحرمة اللي ظلمتها وعزمتها واستسمحت منها وحملت بعدها وجابت بنت الله يصلحها ويبارك فيها..
 والله ماكتبت هالقصص اللي ابي افرحكم وازرع داخلكم الأمل الله يرزقكم الذريه الصالحه لاتيأسو ابداً من رحمة الله 
 دعواتكم ربي يفرج همي ويشفي زوجي ويشفي أخواتي ويعوض أختي ويرزق صديقتي بالزوج الصالح