لازال بالايام صبحا ارتجيه وانتظره بشغف

أرجوآن • 13 سنة

.ماتشوفين شر يالغاليه

فناتيل • 13 سنة

تتمة الحلقة الثالثه والاخيره

دخل غرفة النوم وحصل شيخه على سنقة عشره لابسه بجامة حرير ومستشورة الشعر ومسوييه ميك اب ثقيل نوعا ما

ابو بدر: تلعثم وماعرف وش يقول اخر خبره بكشخة شيخه له قبل تجيب عبود: شيخه وش عندك اليوم؟؟

وقفت شيخه وتواري دمعتها لاتفضحها: متزينه لك ابو بدر ليش مستغرب؟؟

ابو بدر: لاابد كان شوي يتطلع فيها وشوي يسرح ومازالت علامة التعجب فوق راسه

شيخه: تعال ابو بدر اجلس هنا

كانت محضره كرسين وطاوله عليها قاتوه وورد احمر وعصير كوكتيل طازج

ابو بدر: ياعيني وش هالزين وصار يرفع صوته ينادي عبوود

شيخه: عبووود؟؟ وش تبي فيه مروحتهم بيت اختي اليوم لك ياابو بدر

ابو بدر: يارب دوم وش هالتغيرات ؟؟

شيخه نزلت جلست تقطع القاتوه ولمح ابو بدر دمعه بعينها

قرب منها شيخه وش فيك؟؟

شيخه ماقدرت تمسك نفسها وانهمرت دموعها على خدها

ابو بدر: شيخه وش صاير ليش تبكين خلينا نستانس يابنت الناس اول مره احس اني ادمي مثل الناس لاتخربين فرحتنا

شيخه: ابو بدر انا مقصره معك واعترف بس اوعدك والله بتغير ومسكت كفوف ابو بدر وصارت تبوسها ودموعها تنزل على كفوفه

ابو بدر: طيب شيخه خلاص اسكتي ان شاءالله الامور بتتصلح وش الداعي لهالبكاء؟؟

شيخه: ابو بدر بحلفك وقل لي الصدق

ابو بدر: قولي وش عندك اوعدك اصدق معك

شيخه: تحبني؟؟

ابو بدر: وش دعوه ليش تقولين كذا وبعدين استحيت اقول لك احبك صار لنا زمان عن هالحكي, بس ليش تسألين وش تغير؟؟

شيخه: مافيه شيء بس حبيت اتأكد

ابو بدر: طيب وش هالزين اليوم دامك وعدتي ابيك كل يوم اشوفك بهالزين

ابتسمت شيخه وانزلت راسها :اوعدك ان شاءالله

استبشر خير ابو بدر لكن برأسه اسئله كثيره عن سبب هالتغير

وصار يوم ويومين وشيخه تهتم بنفسها وتتزين وتحاول تصحى قبل ابو بدر وترتب فطوره وتجهز له غداه بالوقت المناسب

ابو بدر مبسوط من هالتغير في حياته

لكن مايعني ان موال ابو فهد مو مشغل تفكيره

يرن جرس التلفون وشيخه بالمطبخ تحضر لغداء وابوبدر بعده مارجع من العمل

شيخه: هلا والله

شيخه: لاابشرك الامور للحين زينه

شيخه: يارب الله يسمع منك , طيب ماسمعتي شيء جديد؟؟

شيخه: ياربي لك الحمدلله ان شاءالله يكون نسى الموضوع

دخل ابو بدر واستاذنت شيخه واغلقت الخط وراحت استقبلت ابو بدر عند الباب وخذت منه الاغراض : يعطيك العافيه الله يخلييك لنا

ابو بدر: ميت جوع جهزي السفره بسرعه علشان انوم لي شوي وانزل اتقضى مقاضي رمضان

شيخه: ابشر خمس دقايق فيم تبدل ملابسك وتغسل والسفره تكون جاهزه

دخل ابو بدر بدل ملابسه وطلع والسفره كامله

http://www.******.biz/vb/imgcache/2995.imgcache

تغدى ابو بدر وغسل يدينه ودخل غرفته ونام

شيخه خلصت غسيل صحونها بسرعه وجهزت كيكه مالحه وشاي منعنع

وقبل تصحي ابو بدر دخلت وخذت دش ولبست ميني جلابيه وشبشب بنفس الالوان اللي في الجلابيه واستشورت شعرها وصحت ابو بدر

ابو بدر اول ماصحى وجلس مع شيخه والعيال يشربون الشاي وياكلون من الكيكه اللي اعدتها شيخه طلع عالطل للسوبر ماركت وقضى اغراض رمضان واتصل ببدر : بدر انا ابوك بجييكم بعد نص ساعه معي بعض الاغراض بنزلها عندكم

بدر: الله يغنييك يابوي انتظرك

دخل ابو بدر البيت

وكانو ابناءه ينتظرونه وامهم طلعت لبيت اخوالهم علشان ياخذون راحتهم

اذن المغرب

بدر: ابوي تفضل بالمقلط الفطور هناك

وكانت سفره عامره كلها من اعداد ام بدر وبناتها

ابو بدر كان يشوف ام بدر في كل الاطباق اللي قدامه ويتذكر طبخها ومبسوط كيف علمت بناتها فن الطبخ

ابو بدر(فعلا اقلب الجره على فمها تطلع البنت لامها)

افطر ابو بدر مع اولاده ومبسوط كثير وهو بينهم ومن بعد هالفطور حس انه رسى على بر وبدأ يفكر بارجاع ام بدر لعصمته

مر يوم وثاني وابو بدر بين شيخه اللي صارت تحاول تتغير وتسعده ومايدري بسبب التغير وبين ام بدر وحبه لها وامله في رجعتها

اليوم عودت الطلاب للمدارس من بعد اجازة رمضان

اليوم يوم فاصل بحياة ابو بدر بعد مادخل من العمل وابناءه رجعو من مدارسهم جلس عالغداء اللي صحت شيخه من بدري واعدت اطباق كثيره تعرف حب ابو بدر لها

جلس ابو بدر وتغدأ وبدل ملابسه وطلع مر بشيخه واطفالها بالصاله : استاذن بتأخر شوي عندي شغل ضروري

شيخه: اوك براحتك الله يحفظك

طلع ابو بدر وكلام شيخه يرن بااذنه

ماحس بنفسه الا واقف عند باب الاستراحه دخل وحصل خويه ابو فهد: ياهوه وش عندك لاتكون عزوبي

ابو فهد: ماتشوفني طاب فالكبسه لو اني مو عزوبي ماحصلتني هالوقت هنا

ابو بدر: ههههههههههههه ليش وين ام فهد

ابو فهد: ام فهد طلعت من بيتها والله العالم اذا بترجع او لا

ابو بدر: لاياشيخ ماطريت لي بالموضوع شيء

ابو فهد: يااخوك انشر غسيلي قدام الناس؟؟

ابو بدر: الله يهدي سركم ولاتنسى بينكم اطفال الامور مثل هذي يبي لها تروي لاتستعجل

ابو فهد" هههههههههههههه اسمع من يتكلم !!!! اللي بينا شبه منتهي حتى تلفوناتي معد ترد عليها

ابو بدر:لو ادري انك تتغدى هنا كان تغديت معك يااخي مدري وش فيني هاليومين ماانوم والهواجيس ذبحتني

ابو فهد: هواجيس ههههههههههههههه لاتكون تحب

سحب ابو بدر الابريق حق الشاي وشب الفحم : ااااخ يااخوك وش اقول وش اشكي لك: ماقدر الا اقول مالحب الا لحبيب الاولي

ابو فهد قام يغسل يديه : استاذنك ابو بدر الوالده عندها موعد توني تذكرته وبطلع لها

ابو بدر: اشرب معي كأس شاي وبعدها الله يحفظك

ابو فهد: اقول لك متاخر خذ فهد شماغه وطلع

وابو بدر جهز الشاي وجلس وافكار تودي وثانيه تجيب طلع جواله واتصل بشيخه: ام عبدالله ابي ثوب وشماغ ابمر رجال عازمني عالقهوه بعد المغرب

ام عبدالله: جاهزه ملابسك ابو بدر

ابو بدر: الله يعافيك بمركم شوي بس

حرك السياره لبيته وبالطريق دق ابو بدر على اخو ام بدر الكبير: حياك الله ابو طارق

ابو طارق: هلاابو بدر الله يحييك ويبقييك

ابو بدر: ودي اتقهوى عندك بعد المغرب اذا يناسبك

ابو طارق: الله يحييك بيتك بعد المغرب مباشره بانتظارك

ابو بدر دخل بيته وخذ دش ولبس وتعطر وراح بيت ابو طارق

دخل وبعد السلام والكلام : ابو طارق يالد عمي جاييك بموضوع وداخل على الله ثم عليك تساعدني

ابو طارق: يااخوك اللي بيدي لك واللي اقدر عليه بسوييه

ابو بدر: بيدك تساعدني وكلي امل انك بتقدر

ابو طارق: تفضل

ابو بدر: الكلمه اللي تستحي منها بدها وانا ببدي كلمتي ابي ارجع ام بدر والي تبيه بيصير وانا من يدكم هذي لهذي

ابو طارق بين عليه تفاجأ من كلام ابو بدر:والله يااخوك مدري وش اقول بس مايمنع اني احاول وانت تعرف ام بدر راسها يابس وعساه يلين

ابو بدر: وانت قدها وبتقدر تساعدني

ابو طارق اشوف وارد لك وتعرف الموضوع بكلم فيه الوالد قبل اكلمها

ابوبدر: والله عمي على عيني وراسي ولولا اني مستحي منه ولاكان مريته قبلك

ابو طارق: اشوف وارد لك عطني يومين والموضوع عندك

ابو بدر: استأذنك وعساك عالقوه

رجع ابو بدر بيته وكله امل ان ام بدر ترجع لعصمته وأمل خير وحس طاح نص الهم عنه خذ جواله واتصل على ابو فهد يبشره لانه الوحيد اللي كان يلح عليه يرجعها لعصمته لكن ابو فهد مارد عليه

مر يومين ابو بدر بغرفته نايم بعد الدوام صحى عالمغرب وحصل اتصال بجواله من ابو طارق

بسرعه غسل وطلع برى البيت ودق عليه

ابو طارق: الله حييه اتصلت فيك والظاهر الوقت ماكان مناسب

ابو بدر: والله كنت نايم بعد الدوام تعرف

ابو طارق: يعطييك العافيه , والله مدري وش اقول لك ، لكن الموضوع بيد ام بدر الحين وقالت عطوني وقتي افكر، والله مااخبي عليك بداية الامر رفضت رفض شديد لكن انا وابوي الحينا عليها وان شاءالله انها بتفكر وتعطينا رايي يرضييك

ابو بدر: الله يجزاك خير ابو طارق ماقصرت والله ومانسى جميلك ليوم الدين

مر اسبوع ومااحد اتصل على ابو بدر اتصل هو بابو طارق: مدري كنكم نسيتو موضوعي؟؟هههههههه

ابو طارق :لاوالله بس ام بدر مابعد ردت توني امس كنت عندها وقالت مابعد فكرت

ابو بدر: الله يكتب اللي فيه الخير

كمل الموضوع شهر واتصل ابو طارق باابو بدر وطلبه يجي ببيت ام بدر

بدل ابو بدر ملابسه سريع وكان قلبه يرجف وخايف من موقف ام بدر

وشيخه تناول ابو بدر ملابسه وقلبها موجعها واول ماطلع ابو بدر ركضت عالتلفون واتصلت باام فهد واللي كانت بينهم علاقه قويه مايعرفون فيها الرجال وام فهد بنفس الوقت صديقه قديمه لام بدر لما كانت تتلاقى معها بسفرياتهم سوى ابو بدر وابو فهد

شيخه: والله مدري وش اقول لك ام فهد بس ابو بدر متغير واليوم عنده شيء وشبه متأكده ماوصلك شيء

ام فهد: والله ماسمعت شيء انتي عارفه انا وابو فهد متخاصمين ورجعت لبيتي ومازالت علاقتنا رسميه ببعض

شيخه: ياربي لو تدرين بحالتي

ام فهد: وكلي امرك لربك وودي والله اخدمك بس مو بيدي

شيخه: الله يسلمك اسمع صوتك على خير فمان الله

سكرت شيخه وقلبها موجعها انه فيه شيء

ابو بدر اول ماوصل لبيت ام بدر حصل سيارات اخوانها عند الباب حس بربكه وصارت يدينه ورجليه ترجف

دخل وكان المجلس مليان سلم عالجميع وجلس كان بين الجالسين بدر ومبين عليه متضايق

تكلم ابو ساره: بدر صار رجال ولازم يكون على اطلاع بالموضوع

ابو بدر: والنعم فيه قدها بدر

ابو ساره: ام بدر بترجع لك لكن عندها شوية شروط والله يكتب اللي فيه الخير

ابو بدر: انا موافق مقدما على شروطها

ابو ساره : ريال واحد منك ماتبي لكن لكل واحد من عيالها خمسين الف بحساب خاص فيه

تشتري لها بيت حلال وتسكنها فيه قبل تدخل عليها

راتبها لها حرية التصرف فيه ومالك اي سلطه عليه

وسط الاسبوع ماترتبط فيك تعرف هي الصباح في ادارة الاشراف التربوي تداوم بعد ماصارت مشرفه والعصر تدرس هي وبناتها بالتحفيظ ولك اخر الاسبوع تزورهم وتبات عندهم

وزوجتك ماتطلقها تتركها على ذمتك لانها اصيله وماتبي تشتت عيالك مثل ماشتتهاهي وعيالها

ابو بدر: موافق ولو انك عارف اوضاعي الماديه

ابو ساره: البنك يعطي قروض وراتبك يمكنك تاخذ قرض كبير

ابو بدر: طلباتها اوامر

وانا موافق

ابو ساره: اجل الباقي عليك دور بيت لام بدر لاتشترييه الا مشاورها فيه والله يكتب اللي فيه الخير

ابو بدر دبر حاله يمين ويسار وخذ له قرض وتسلف فوقهم وبدأ يدور بيت لام بدر

وبعد ماحصل بيت اثث فيه غرفة النوم فقط والباقي خلاها تختاره بذوقها
شيخه دخلت دوامة شك من انشغال ابو بدر واهتمامه بصحته واكله وكشخته والخوف مملي قلبها

الى ان اتصلت ام فهد وقطعت الشك باليقين وخبرتها باان ابو بدر بيرجع ام بدر

شيخه تضايقت كثير وفضلت انها تكتم الخبر بصدرها وماتفاحه فيه ابو بدر وتسوي نفسها مو داريه عن شيء ومن يومها وهي رجعت شيخه اللي قبل نوم لبعد الظهر اهمال نفسها وابنائها

ابو بدر في زحمة انشغاله ماحس بشيخه ولاحس باهمالها

سوى حفل بسيط ببيت عمه ابو ساره وبعد ماتعشو ابو بدر: بدر امك هنا ولاببيتكم؟؟

بدر : لايبه هنا

ابو بدر:طيب قل لها استناها برى وانت خذ اخواتك ورحو نومو بالبيت وبكره نتعشى سوى ان شاءالله

بدر : صار ياابوي بروح لها

وبعد ربع ساعه رجع بدر لاابوه عند السياره: ابوي تقول امي بنسبقك للبيت وانت تعال هناك

ابو بدر:بدر وانا ابوك ماخذ جناح بالفندق بنقشي انا وامك فيه ليله وجييكم بكره ان شاءالله

بدر: امي رافضه وتقوم ماراح اركب معه بالسياره

ابو بدر تضايق من موقفها وقرر انه يسبقهم لبيت وهناك يفتح معها الموضوع

ابو بدر: اوك اسبقكم اجل

ابو بدر واقف عند بيت ام بدر

وقفت سياره بدر ونزلو اخواته وامه ومن غير مااحد يكلم ابو بدر اللي واقف قريب من البيت دخلو لوسط البيت

بدر: ابوي حياك تفضل

ابو بدر: منكسر خاطره وحاس انه اقبل على انسانه جديده ومو هي ام بدر اللي كانت خاضعه له بكل شيء

دخل فالمجلس وحصل بدر واخواته محضرين مسبقا قاتوه وعصيرات وشوكلاتات

جلس ابو بدر وبراسه سؤال عن ام بدر

بدر: ابوي اقرب حياك والف مبروك ياعريس

ابو بدر: طيب امك وينها

بدر: جايه بس لحظات

جلسو البنات مع ابوهم سوالف وضحك وحس ابو بدر بدخول احد للمجلس

التفت

كانت اللي داخله ام بدر كانت لابسه جلابيه يمكن تكون فخمه نسبيا ومسوييه شعرها ويفي ومسويه ميك اب خفيف جدا

ابو بدر :ايه هذا هي ام بدر سبحان الله كني تاركها امس ماتغير فيها شيء ويمكن صغرت بعد عن اول ماتركتها

ابو بدر وقف وقرب من ام بدر وسلم عليها باليد وام بدر ابتسمت ابتسامه صفراء سلمت وجلست بجهه ثانيه بعيده ان ابو بدر

خلصو السهره ابو بدر: ام بدر وش راييك نطلع مستأجر جناح بالفندق ونجي بكره ونكمل السهره مع بدر واخواته

ام بدر:اممم بس انا من رايي نكمل السهره مع عيالنا؟؟

ابو بدر: ام بدر انا مستأجر جناح بالفندق وبكره نرجع هنا

ام بدر: اوك اذا جناح اجل نروح وياعيالنا

ابو بدر عجز يلقى تفسير لتصرف ام بدر ووافق على مضض

طلعو كلهم للفندق وسهرو مع بدر واخواته وبعد ماصلو الفجر دخلت ام بدر الغرفه الثانيه ونامت مع البنات: بدر يمه نم مع ابوك انت

ابو بدر: مصدوم مذهول من تصرفات ام بدر ومستحي يتكلم بشيء قدام عياله ودخل الغرفه ونام

بعد ماكملو اسبوع عالزواج اتصل ابو بدر وبلغ ام بدرانه جاي يفطر معهم

صحت ام بدر وكان يوم خميس وجهزت فطور حلو ولبست وكشخت دخل ابو بدر واستقبلته لاول مره استقبال يحتاجه ابو بدر وكانت مرتبه نفسها ومتمكيجه ولابسه بنجابي مرتب ومسرحه شعرها انبسط ابو بدر: ام بدر اذا العيال ماصح خلييهم ابيك اليوم لي وبس

ام بدر: اوك اللي يريحك

جلسو افطرو وانبسطو

ابو بدر: ام بدر اليوم انا اسعد نسان بالحياة فاجأتيني بتصرفاتك من اول ليلة زواج

ام بدر: هههههههههههههه كنت بوصل لك رساله اني صرت وحده ثانيه وحبيت ا علمك هالشيء من اول ليله وبنفس الوقت لاتلومني هذي ردة فعل طبيعيه مني تجاهك

ابو بدر: ام بدر خلاص انسي وبنفتح صفحه جديده من اليوم

ام بدر: ههههههههههههههههههههههههههههههههههههههه اوووكي بس مازلت اقول ل كانا مو ساره الاوليه لا

قضو ام بدر وابو بدر يوم حلو وبعد الظهر صحو العيال وطلعو تغدو بالمطعم سوى

رجع ابو بدر لشيخه واللي مازالت تخفي على ابو بدر انها عارفه بزواجه

دخل وجلس عند التلفزيون النفسيه حلوه والضحكه شاقه الوجهه

وشيخه النفسيه دماااااار خصوصا بعد ماعرفت انه مغدي ام بدر وعيالها بالمطعم وطبعا هالملعومه وصلتها عن طريق ام فهد اللي كانت جنب زوجها لمااتصل ابو بدر وطلب وصف مطعم رومنسي *_*

ويوم وثاني الديون تراكمت على ابو بدر وام بدر كانت على اطلاع بظروفه بدون مايحس قررت ام بدر نه يجيب شيخه وعيالها معهم بالبيت ويكون لها جناح خاص بس تشاركهم بالمطبخ فقط

ابو بدر فرح بالخبر وبلغ شيخه بزواجه وانه شراء بيت علشانهم كلهم وبيسكنون سوى

شيخه قررت تروح كم يوم عند اهلها ترتاح نفسيتها شوي وبنفس الوقت مرتاحه لاام بدر من كلام ام فهد عنها

وبهالايام اللي كانت شيخه ببيت اهلها اخلى ابو بدر الدور اللي كانت ساكنته نقل غرفتها وغرفة ابنائها للفله الجديده

وبمرور الايام ام بدر كانت تساعد ابو بدر بتسديد ديونه

ابو بدر: ام بدر يومك جالسه كل يوم تصرفي وتساعدينيليش تطلبين مني هالطلبات يوم بغيت ارجعك

ام بدر: حبيت اعرف شخصيتك تغيرت ولالا وتعرفني بغناة عن فلوسك واقدر اشتري بدل البيت اثنين وثلاثه لكن ابي احسسك بغلطك واخليك تدين لام بدر وعيالها وهذي ضريبه اهمالك لنا وبعك عني وعن عيالي مريت بايام عصيبه والحمدلله طلعتهم طلعه والله تتعب تطلعهم مثلها

ابو بدر: والله يام بدر ماخبرتك حقوده

ام بدر: لااللي سويته فيني علمني اشياء كثيره

ابو بدر: طيب ام بدر اليوم بتجي شيخه وعيالها وابيكم تستقبلونها استقبال زين قدري موقفها

ام بدر: افا عليك شيخه بعيوني وبعدين مالها ذنب باللي يصير

دخلت شيخه هي وعبود وبناتها وكانت مكسورة وحاسه باطرافها ترجف

قربت منها ام بدر وسلمت عليها سلام اخوات وبوست عيالها وضحكت معهم

ضيفتها قهوه وحلو وبعدها عشاء مرتب اعدته ساره وبناتها

شيخه حست انها ارتاحت شوي وراحت عنها الربكه

ام بدر: عاد ياام عبدالله بيتك وتامرين فيه بس هذا جناحك اذا بتريحين انتي وعيالك

شيخه: الله يسلمك ياام بدر سمعتك بالطيب واصلتني وفعلا مثل ماسمعت

ا

ابو بدر: طيب بقول لكم دامكم مجتمعين ياام بدر وياام عبدالله مثل شوفتك ياام عبدالله البيت مافيه خدامه والشغل بيكون مقسوم بينكم

ام بدر: لاياابو بدر المجالس ووسط البيت ينظفونه بناتي وام عبدالله تكفيها غرفتها

ابو بدر: لكن الطبخ ابيكم توزعونه بينكم بمايرضي الطرفين

ام عبدالله: ام بدر فصلي وانا اخيط

ام بدر:: اللي يريحك انا اطلع الصباح تعرفين تبين كل يوم اخذ العشاء وانتي الغداء او نوزعها بينا يومين يومين واللي مو دورها بالطبخ يكون ابو بدر عليها علشان تتفرغ

ام عبدالله : من يدك هذي لهذي فصلي وانا اللبس

مرت الايام وشيخه تتحسن وتدخل المطبخ مع بنات ام بدر وتساعدهم وتتعرف على كثير من الاطباق اللي ماتعرف تسوييها

وبنات ام بدر مع اخواتهم صارو مثل السمنه والعسل يدرسون سوى ويتساعدون بالتنظيف وحاطين بينهم جدول غسيل وكوي وتنظيف بيت ومطبخ وغيره

وام بدر وام عبدالله صار بينهم جدول بطبخ الغداء لكن العشاء كل يوم ثنتين من البنات وتشكيلات واطباق جديده وتنافس حلو بينهم

وابو بدر وماادراك ماابو بدر مبسووووط بحياته وبقربه من ساره وتغيرت نظرته لها من تغيرت نظرتها لنفسها وصار يحبها ويحترمها<< انتبهو لهالنقطه الانسانه هي اللي تغير نظرة الناس عنها بثقتها بنفسها

وتوته توته انتهت الحتوته

اتمنى تنال اعجابكم يارب

والى لقاء اخر بعد رمضان ان شاءالله