لازانيا لذيذه

طريقتي باللازانيا يمكن المميز فيها صلصة البشمل اللي علمنياها شيف لبناني يوم ذقتها وسالته عنها

- ممكن تسلقين اللازانيا بملح شويه وزيت ( وهو الافضل ) وممكن تبللينها وتستعملينها نيه (اذا كنتي كسلانه او مستعجله )

-عصاج اللحم ممكن تسوين طريقتج او طريقتي كيفج بس اذا بتسلقين اللازانيا خلي العصاج فيه سيوله شوي واذا ماتبين تسلقين اللازانيا خلي بالعصاج سيوله واجد يعني اهم شي لاتنشف اللحمه عشان تعطيها طعم مميز وعشان اللزانيا تنضج من ماي العصاج



اولا : اللحم المفروم ( العصاج )

وهذا لازم نسويه قبل البشمل

المقادير

- كيلو لحم مفروم ويفضل غير مثلج عشان الزفر يعني من القصاب او اللحام
- بصله كبيره مفرومه ناعم
- فصين ثوم مدقوق
- حبتين ماجي
-3 ملاعق طعام صلصة طماط ( الشيف ماكان ضايف صلصة بس انا احبها بالصلصه )
- بهارات وفلفل اسود
-ملعقين طعام كزبره خضره مفرومه
- ملعقتين طعام بقدونس مفروم
- كوب ماي او اكثر

الطريقة

- سلقت اللحم مع حبة دارسين وشوية هيل حب ونص ليمونه في ماي مغلي 5 دقايق وشلت الزفره وهو يطبخ وبعدين شخلته وغسلته وممكن تستغنين عن هذي الخطوه
- نحط زيت ذره في القدر ( اذا ماسلقتي اللحم لاتستعملين زيت ) والبصل والثوم ونحمسه دقيقتين تقريبا وبعدين نضيف اللحم والماجي والبهارات والفلفل الاسود ونحركهم ونضيف الصلصه والبقدونس والكزبره ومعاهم تقريبا كوب ماي او اكثر ونخليه يغلي لين ينضج بس يبقى فيه ماي يعني يصير مثل مرقه خاثره

ثانيا: صلصة البشمل

المقادير

- قالب زبده 113 جرام
- حبة ماجي
- ثلثين كوب طحين
- لتر حليب طازج بدرجة حراره الغرفه
-شوية ملح ( اذا ماسلقتي اللازانيا) بس لاتكثرين
- كرتونة كريمه حمره كويتيه

الطريقة

- بالقدر نحط الزبده ومعاها الماجي على طول ومو شرط ننطرها تسيح ونضيف الطحين تدريجيا مع التحريك لين يذوب وبعدين نحركه لين يحمس ويتغير لونه شوي
- نضيف الحليب بالتدريج مع التقليب ( طبعا الافضل معاج احد يساعدج عشان ماترتبكين)
- نذوق الملح اذا عجبنا اوكي واذا ماعجبنا نضيف شوية ملح يعني نتفه هذا اذا ماسلقنا اللازانيا لان اللازانيا نضيف اصلا عليها ملح
- نطفي النار ونخليها شوي تبرد ونضيف كرتون كريمة حمره كويتيه ( انا ضفتها قبل لاتبرد لاني مستعجله )

( بصراحه الصلصه لذيذه لدرجه قمت اكلها بروحها :o )

طبق اللازانيا

(انا بللت اللازانيا لاني ماسلقتها كنت مستعجله)

1- طبقة لازانيا
2-طبقة صلصة بشمل
3-طبقة عصاج
4- طبقة لازانيا
5-طبقة صلصة بشمل
6-طبقة عصاج
7- طبقة لازانيا
8-طبقة صلصة بشمل
9-طبقة عصاج
10- طبقة لازانيا
11-طبقة صلصة بشمل

طبعا عدد الطبقات اختياري بس انا كميتي تكفي اني اسوي طبقات واجد

دخليها الفرن وشبي النار من تحت في بايركس زجاجي على نار متوسطه في الرف الاوسط عشان ماتحترق من تحت وبس تحسين انها نضجت تنزلين الرف آخر شي تحت وتطفين النار تحت وتشبين النار اللي فوق لحد ماتتشقر وبعدين اذا تبين ضيفي شوية مو زاريلا بس مو شي ضروري وخليه دقيقه وطفيه

بس بصراحه يم يم يم لذيذه :23:

انا امس سويتها وصلصتها لذيذه لاني كنت بجربها قبل رمضان

جربوها برمضان وقولولي

تحياتي :27: