لا أحبه.. لكن أحبه!!

أنا مشكلتي اني ما أحب أخوي..لكن أحبه! شلون يصير هالكلام؟ كملوا معاي..

أخوي هذا اصغر مني وما أقدر أتحمله، أحسه كتلة فوضى وازعاج، لاتظنوه صغير.. هو في الثانوي، لكني ما أقدر أهضمه أبد.. أتمنى انه يروح من وجهي (بدون سوء) أتمنى أحيانا انه يدخل جامعة بعيدة حتى مايرجع البيت إلا في الاجازات أو على الأقل في عطلة نهاية الاسبوع.. هو هواياته القتال والفوضى.. دايما ألعاب كمبيوتر قتل وخناق، افلام فيديو نفس الشي.. يلعب مع صغار العيلة نفس الاسلوب هذا، يشيلهم ويحطهم كانه في معركة غير الاصوات والصرخات اللي يطلعها.. كل هذا يضايقني وما أحبه، حتى وقت الأكل يطلع أصوات ياكل كأنه آلة مو بني آدم .. الأصوات اللي يطلعها وهو يمضغ الأكل أو أصوات ؤشف الشوربة كلها فوضى، غير طريقة الأكل اللي ما أتحملها وكأنه ماشاف أكل من سنة وخايف يخلص عنه وهذا الكل في البيت لاحظه مو بس أنا، حتى الوالدة تقول له أحيانا انه يتأدب في أكله.
المهم ان مرة تخانقت أنا وياه وأمي تدخلت قالت لي شفيكم وقفوا انتوا دايما تتهاوشون قلت لها في لحظة غضب ما أحبه، قامت خاصمتني وصارت ماتكلمني ثلاثةايام.. فاللي صار اني كرهته لأن هو السبب اللي خلا أمي ماتكلمني. أمي تقول اني أنا أغار منه وما أحبه من يوم كنا صغار، لكن هو مو اللي أصغر مني على طول، في بيني وبينه اخت.. اللي صار الحين اني صرت اتحاشى الاحتكاك به قدر الامكان، وما أتكلم معاه إلا للضرورة، أخاف اني اتهاوش معاه وبعدين أمي تزعل علي ماتكلمني، وانا ما أقدر على زعلها.. وتراها ماتخاصمني إلا إذا كان هو في الموضوع، يعني لما نتهاوش انا وخواتي ماتخاصم أحد منا، وتقول كلكم بنات تتفاهموا مع بعض وهو وحيد بينكم لازم احد يوقف معاه (الفرق بينه وبين اخوي الكبير كثير حوالي 13 سنة)، ومرة قالت لي انها تحب الأولاد أكثر من البنات، لكنها لحظة غضب فما أدري هي كانت صادقة أو انها قالت هالكلام من القهر بس.
اختي الكبيرة تقول اني ما أحبه لأنه ولد، لكن هذا ماهو صحيح لأني أحب اخوي الثاني مرة (أكبر مني)، هو أهدأ من هذا وما يتخانق ولا يسوي فوضى أبدا وما يلعب العاب قتل ولايشاهد هالأفلام المليانة قتال وهواش .

صرت ادعي ربي كل يوم يحنن قلبي عليه، والحقيقة اني احس اني احبه وقلبي يحن عليه، فأتمنى انه دايما يحصل أعلى الدرجات وانه يصير بصحة زينة ودايما احاتيه ايام الاختبارات واحاول اساعده اذا تورط في شي وما أقدر اشوفه يمرض.. ومع هذا الاحساس أحس بعد اني ما أبي اشوفه قدام وجهي!! شفتوا شلون التناقض!

أقول يمكن اني أحبه لكن ما اقدر أتحمل حركاته الصبيانية وانه اذا ركد راح أحبه، لكن لمتى؟ ماهو راضي يركد أبدا!! :44:

مادري شاسوي في هالموضوع.. ساعدوني