لا ابحث هنا عن حل و لكن ..!

السلام عليكم
موضوعي اللي بقوله مو فضفضه كثر ما اني ابغى افتح عيونكم لشيء يمكن تكونوا غافلين عنه
انا بنت ثلاثينية غير متزوجه و غير موظفه طبعا حالة ابوي المادية متواضعه تكفي الاشياء الاساسيه فقط و بالتالي مااطلب منه شيء لأني اعرف انه مايملك .. يعني انا ما امسك بيدي ولا ريال واحد و عندي اختين ماشاء الله تبارك الله موظفات و رواتبهم عاليه عسى الله يبارك في رزقهم و يزيدهم من فضله .. جتني فتره خرب جوالي فقعدت شهور بدون جوال لأنه مامعي فلوس اصلحه او اشتري بداله فانقطعت عن الناس الاقارب و الصديقات و حسيت فعلا يومها اني انسانه مقيده انسانه ضعيفة جدا و حسيت بانكسار و قد ايش الانسان مايقدر يسوي شيء من دون مادة قعدت على وضعي شهور لحد ماجت اختي بيوم و عطتني مبلغ مالي حسيت بفرحه ماتوصف و اخيرا بقدر اشتري جوال و رحت ركض شريت الجوال و باقي المبلغ حطيته كرأس مال و بديت مشروع طبخ لعل يجيب لي مصروف او اقدر اسدد دين اختي مااطمح اكون تاجره كل اللي ابيه مصروف حتى لو بالشهر ٢٠٠ ريال والله ياهي بتفزع لي لكن للاسف فشل المشروع رغم ان لي الحين ٧ شهور لكن ماجاني غير طلبين فقط !! و خلصت الفلوس و صفرت يعني وصلت للصفر و رجعت لمخدتي و دميعتي اللي ماتفارقني و لا يوم و طبعا انا انسانه بطبعي متعففه عن السؤال يعني استحي و اخجل اني اتسلف من اخواتي يعني احس نفسي عزيزه و مابي احطها بهالموقف و يمكن بعضكم يسأل ليش ماتتوظفين انا فعلا السنوات الماضيه ماتوفقت بوظيفه مناسبة و اما حاليا عندي مشكلة صحيه للاسف ماتسمح لي التزم بدوام رسمي الله يشفيني ويشفي جميع المرضى يارب
نهاية موضوعي بقولكم انا والله ماكتبت موضوعي اطلب منكم حلول لأن حلها عند رب العالمين لكن هدفي حبيت اذكركم يمكن الواحد فينا لما يروح يحط راسه على مخدته يكون مرتاح البال لكن مايدري انه شخص ساكن معه بنفس البيت قد يكون ماينام الا و دموعه ع خده و في اضعف حالاته و مايملك ريال في رصيده و لو مافيه احد في اسرتك محتاج اكيد رح تلقاه في خوالك او عيالهم او عمانك او عيالهم او في اصدقائك او جيرانك او او او