صاحبات الشعر الدهني أو الفروه الحساسه ما يناسبهم أي خلطة وممكن تكون النتيجة عكسية لو استعملوا زيوت وخلطات على الفروة مباشرة زي ما صار معي
🌻 أهم شي قبل ما تبدأين تمشطين شعرك استغفري سبحي قولي ما شاء الله لا قوة إلا بالله اللهم زد وبارك أي شي المهم لا تسكتين إلا بعد ما تخلصين تمشيط
هذه قائمة تحتوي على أهم الأغذية اللي ساعدت بتطويل الشعر بفضل الله تعالى
1- شاي الزنجبيل
تبرش شريحه صغيره من الزنجبيل مع قشره ويوضع عليه ماء مغلي ويغطى ربع ساعه بعدها اشربوه
هذا لو داومتوا على شربه لحاله بدون سكر بإذن الله شعركم يطول ويتغذى ﻷنه ينشط الدورة الدموية
2- التمر
تصبحوا فيه أو تعشوا عليه المهم لا يغيب عن تغذيتك
3- الشعير الكامل بقشره
ممتاز للشعر والبدن وهو بديل عن الحلبة للي ما يحب ريحتها، أهم شي يكون الشعير طبيعي عضوي ﻷن الكيماوي يعوّر البطن والأمعاء ويسبب صداع. الشعير يخلص الجسم من السموم وينظفه وممتازه للبكتيريا الجيدة في اﻷمعاء ومفيد للكبد والمعدة كما قال رسول الله صلى الله عليه وسلم «والذي نفس محمد بيده إنها لتغسل بطن أحدكم كما يغسل أحدكم الوسخ عن وجهه بالماء». وممكن تشربون مغلي الشعير الكامل وتشربونه مثل الشاهي بس اﻷفيد التلبينه أو العصيدة. حاولي تاكلينه عصيده طريقته: سوي صلصة تمر أول شي وهي إنك تعبين نص الخلاط ماء وحطي فيها 20 تمره بدون نوى وإذا انفرموا خلاص اسكبيه في قدر وحطي عليه كوب دقيق شعير وكوبين ونص دقيق قمح كامل واخلطيهم لحد ما يصير قوامهم زي العصيده وحطيهم على نار منخفضه جداً (اﻷفضل تقعدين تخلطينها بالملعقة لحد ما يسخن القدر وبعدين غطيه عشان ما يتكتل ) واتركيه لمدة ساعه وربع مع التحريك كل 10 دقايق عشان ما يحترقون وبالعافيه.
4- منقوع الزبيب اﻷسود
ينقع كمية في ماء تكفي لشربها ثلاثة أيام تحفظ في الثلاجه، وفي اليوم الرابع تخلصوا منها اقتداء بالرسول صلى الله عليه وسلم واحذروا من خلطها بفاكهة أخرى مثل التمر وغيره وشرب منقوعهم انتبهوا تخالفون السنة. طريقتها مثلاً تاخذون كوب زبيب وتنقعونه في 6 أكواب ماء ويخلط قبل شربه في كل مره عشان يتحرك السواد اللي في قاع القدر.
5 - زيت الزيتون
شرب ملعقتين زيت زيتون في الصباح والمساء ممتاز للشعر. اﻷهم يكون عضوي عصرة أولى مثل زيوت الجوف
وآخر شي اللي احرصه عليه مره باﻷسبوع أو مرتين وهو الحبة السوداء والعدس الكامل وبيضتين مسلوقة وصينية خضار مشوية بالفرن (قطعي لك أي خضار تلقينه بالثلاجه جزر قرع أي شي ورشي عليه ملح بحر وزيت زيتون) . مع إزالة الخبز اﻷبيض والرز والمكرونة والسكر من النظام الغذائي.
🔔 ملاحظة مهمه : فيه أشخاص جربوا هذا النظام واختفى منهم حب الشباب بدون استعمال الصابون بفضل الله تعالى (بس بدون أكل البيض) وطال شعرهم بدون اضافة اي عناية خارجية للشعر.
هذه اﻷغذية مذكورة في القرآن والسنة وما حطيتها لكم إلا وشفت فائدتها بعيني ولكن أهم شي المداومة بإعتدال
في أمان الله ورعايته