لا تظلمين نفسك وبعدين تبكين عليها 💔

صباحكم سعاده عزيزاتي..


ياكثر مانظلم أنفسنا، اليوم بكتب نوع من انواع ظلم النفس وفي بالي شغلات كثيره بس بأبدأ بالأهم وان شاء الله ربي يكتب فيه النفع والفائده..


لا تظلمين نفسك وماتعطين نفسك ساعه في اليوم لوجه الله تقرأين فيها قرآن او تسبحين او تصلين صلاة الضحى او تدعين الله باللي تتمنينه لك ولاولادك..


كثير من الامهات مع الزوج والبيت و العيال والمسؤوليات تظلم نفسها في العبادات وتقصر في الصلاه والذكر وتهجر القران وأعتقد اغلبنا مرينا بهالشي مع الانشغال،

بس والله ياعزيزتي انه ظلم عظيم للنفس، اكيد الوحده تقول بينها وبين نفسها اذا كبرت وكبرو عيالي راح الاقي الوقت اللي ازيد عباداتي واقوم بالنوافل واقرا قرآن..


بس بسأل سؤال هل انتي ظامنه عمرك؟

ترا انا كنت من هالفئه اقول اذا كبرو عيالي برتاح وازيد في النوافل واكتشفت اني غلطانه ومقصره وانه الموت لو جا ماراح ينتظرني اعدل من نفسي واسوي عباداتي..


الموت يجي فجأه للصغير قبل الكبير فلازم تكوني مستعده مهما كانت إنشغالاتك..


قال عليه الصلاة والسلام يسأل المرء عن اربع ومنها عمره فيما افناه وجسده فيما ابلاه..
مستعدين احنا لهالسؤال؟


فنيتي عمرك بطبخ وتربيه ودوام مااقول انها غلط بس اذا سويتي كل هالاعمال احتسبيها اولا لوجه الله وانتي تطبخين احتسبيه لوجه الله انك تسوين لقمه نظيفه لزوجك واولادك

وانتي تدرسين وتربين احتسبيها لوجه الله انشاء جيل صالح يخدم الدين..



وهكذا لو احتسبنا كل دقيقه في عمرنا لوجه ياكثر الأجر، حتى وقت الراحه وانتي ترتاحين احتسبيها انه تقويه لجسدك علشان ترجعين للطاعه بجسد أقوى وبال مرتاح..


، ثانيا فرغي ساعه من يومك لاخرتك..


والله انه العبادات تبارك في وقتك ماتنقصه ولا تزيد انشغالك بالعكس بتشوفين كيف وقتك يتبارك ..
العباده مساااج للروح تريح النفسيه ، وتحسسك بالاستقرار،

لاتبخلين على نفسك بصلاة الضحى وكلها ركعتين..


ولا بصفحه من قرآن، ولا باستغفار وذكر وانتي مشغوله بالتنظيف..


لا تظلمين نفسك بالدنيا وملاهيها..


اللهم أعنا على شكرك وذكرك وحسن عبادتك 🌱♥️