لا تعلمون امهاتكم

السلامةعليكم ورحمة الله وبركاته


اعرف كثير بنات يحكون مشاكلهم الزوجيه والحياتيه بشكل عام
لامهاتهم !
تجي الوحده متروس قلبها من زوجها والا من زميلتها بالدوام
وتفضفض لامها
بزعمها كذا ارتاحت !
بالله وين ترتاحين وانتي تضيقين صدر امك
انتي من جهه تفضفضين ومن جهه ثانيه امك تتضايق وتتنكد وتكتئب عليك
تمشكلتي مع زوجك والا اهله وجيتي تفرغين طاقتك السلبيه عند امك
وهي المسكينه تشيل همك ويضيق صدرها ويمكن ماترتاح بنومتها تضل قلقه تحاتيك
وانتي ماشاء الله عليك رجعتي لبيتك وتصالحتي مع زوجك وصرتو مثل السمنه ع عسل
بس امك لازالت قلقه وتفكر وتحاتيك وتحاتي مستقبلك !


والله حرام كافي ان اهلنا تعبوا وسهروا وقلقو علينا وحنا صغار
خلاص صار فيهم الحين يرتاحون من المسوليه والمشاكل يبون ذهن صافي بال مرتاح
يبون يششوفون عيالهم مرتاحين مبسوطين مايبون يسمعون نكد ومشاكل


اذا ضايقه فيك الوسيعه روحي فضفضي لربك
اذا محتاجه مشوره وراي ومساعد شخص مو مشكله فضفضي لشخص تثقين فيه
اكتبي مشكلتك وابحثي عن حل بمواقع التواصل
استشيري ناس خبره


بس ابدا لاتفكرين تلجئين لامك
الا بااخبار الزينه المفرحه اللي تدخل السرور لقلبها


هذه امك وتاكدي ضيقها من ضيقك وسعادتها من سعادتك


بيني لها جانب حياتك المشرق واخفي عنها الجانب التعيس




حفظ الله امهاتنا وقلوب امهاتنا وسعاده امهاتنا وراحه بال امهاتنا
اللهم اشغلهم بطاعتك ورضاك
وابعد واصرف عنهم الهم والغم




وشكراً للاصغاء 🌹