×× لا تـتـزوجـيـــن بـــــدون .... ! ××

السلام عليكم ورحمة الله وبركاته


هذي رساله اكتبها لكم من اخت لكم في الله تطلب رايكم ومشورتكم في موضوعها...
وقبل ما ابدى في الموضوع امانه على كل وحده تدخل وتحب ترد عالموضوع ترد عليه بدون تجريح وتصغير شأن لاصحاب الموضوع وقبل كل شي تتذكر ((من كان يؤمن بالله واليوم الآخر ، فليقل خيرا أو ليصمت))

×××××××××××

البنت كويتيه عمرها 29 سنه .. وفي واحد بدون متقدم لها اعزب وعمره 32سنه
صحيح مافي انسان كامل على هالارض بس معظم صفاته طيبه اهو انسان طيب خلوق مصلي وصايم يخاف ربه نقدر نقول عنه نوعا ما ملتزم ويحب البنت المحتشمه ..

اهي موظفه وراتبها زين ولله الحمد واهو طبعا بحكم كونه بدون يشتغل بوظيفتين ويسعى دايم للشغل وكسب رزقه عشان لا يحتاج لاحد ..

راي ابو البنت :
الرفض ولكن مو للشخص نفسه لكن لانه بدون وطبعا احنا بالخليج عارفين وضع البدون ..
ابو البنت رفض من خوفه على بنته ومعاناتها مع ظروفهم في المستقبل وعلى عيالهم .. ولان خايف هالشخص مايقدر يأمن لبنته العيشه الطيبه اللي كل اب يتمناها لعياله ..

راي اختها الكبيره :
وكان مقارب لراي ابوها وهو الرفض بسبب وضعه كبدون ..
وكانت ماخذه الموضوع بالعقل اكثر منه عاطفه وقالت للبنت انسي المثاليات والتضحيات وفكري بالعقل .. الزواج مو لعبه الزواج مسئوليه ولازم يكون قادر على تحمل اعباء الزواج بيت اسرة عيال مصاريف بيت اكل وشرب ومصاريف اولاد كل هذي امور لازم تاخذينها بالحسبان .. كوني على ثقه احنا مانرفضه كشخص لانا كلنا بشر احنا نرفض وضعه


رأيي انا :
كان رايي بين البينين يعني بصراحه ماقدر افيدها كنت مع وضد ...
يعني كلام اهلها فيه نوع من الصحه وماقدر الومهم لان هذي بنتهم وخايفين عليها ..
لكن شفت الموضوع من جهه ثانيه
اول شي ..البنت كويتيه ووظيفتها حكوميه يعني ثابته في الوظيفه مافي خوف من عدم الاستمراريه في وظيفتها .
ثاني شي .. دامها كويتيه متزوجه من غير محددي الجنسيه فعيالها بيكونون من ( ابناء الكويتيات) يتعاملون معاملة الكويتي من ناحيه دخولهم المدارس وعلاجهم بالمستشفيات الحكوميه .. والخ
يعني اعتقد وضعهم بيكون اهون ويقدرون يتساعدون والحياه مشاركه وتعاون


والله يابنات انا محتاره .. اقولها تفرض رايها على اهلها وخاصه انها مو صغيره يعني هذا العمر يمشي واذا اليوم تقدم الاعزب بكره يتقدم المطلق والارمل اواللي عنده زوجه و عيال ..
ولا اقولها ارضي براي الاهل ولا تصرين على رايج لان الرجال يتعوض والاهل لا ..

مره اقول خليها تعيش معاه دامه زين وربنا بيوم الحساب مايسال عن اصل وفصل وجنسيه بيسال عن اعمالنا ربنا مايفرق بين احد الا بالتقوى والعمل الصالح .. ومره اقول بهالايام الحياه شوي صعبه وياترى يقدرون يتحملون متاعبها ولا بتصير حياتهم جحيم بسبب ضغوط الحياه !!!!



--------------

لاني عارفه كل وحده لها نظره وتفكير يختلف عن غيرها .. اطلب رايكم في الموضوع

للي مو عارفه شنو يعني بدون ....
(( بدون يعني ماعنده جنسيه الكويت او اي بلد ثاني .. ))