لا تفقدي الامل.. وهاي مفتاحه..احكمي بنفسك..

تخيلو...للمرة الثانية يتقدملي شاب واعزب واصغر مني بسنة وعنده شغل مستقل وبيت خاص له...انا يا الارملة ام الايتام. واقسم بالله ما اعرفه ولا عمري شفته من طرف صاحبتي يكون اخوها... والشاب الاول اعزب ايضا واكبر مني بسنتان... والاثنين من طرف صديقات لي وبالحاح شديد.سبق ونزلت موضوع عن الاول ونصحتوني اخذ الموضوع ببساطة وما ازعل... بس والله مو بايدي... صحيح اخذت بنصيحتكم ورديت بادب على صديقتي بالرفض القطعي طبعا...بس قلبي وجعني...وجعني مش لاني رفضت..الحمدلله هاد قرار لا رجعة فيه...ولكن وجعني اني اصير خيارات مفتوحة للناس..انا الحين ودموعي بعيوني كم اتمنى يرجع زوجي للحياة بس عشان ما حدا يقرب علي..اكره نفسي بس حد يفكر فيي كزوجة له... صح شرع ربنا بس بكره حالي... وبتمنى اموت ... هو انا هبلة وجاهلة بالنعمة..هو انا الوفاء لزوجي عامي قلبي وعقلي..ما بعرف بس..حضن القبر ولا حضن شخص غيره


ما رح ابث همومي اكثر..الشكوى لله...موضوعي بس اخذ عبرة من قصتي... خاصة المتااااخرات بالزواج او مطلقة او حتى ارملة مثلي ووضعها مغاير وتتمنى الزواج من جديد..انظري لقصتي يا اختي ولا تفقدي الامل... ما تحكي انا تااخرت اذن خلص رح اتزوج معدد او مطلق او... حتى يمكن ما اتزوج.. او انسانة كتب ربنا عليها الطلاق تصير تحكي خلص ما بتزوج او رح اخذ مطلق مثلي اكيد.مع احترامي الكامل..يمكن مطلق افضل من اعزب وبالعكس.. لا مش شرط يا حبيبة... انا ارملة والكل يعلم اني رافضة الزواج ومع هيك انظري شو بيتقدملي... ربنا كريم يا حبيبتي بس كما قلت صفي نيتك لله واتركي عنك طرق البشر في الزواج. ومع الاخذ بالاسباب طبعا ..وكله بيد ربنا.ان شاء اعطى لحكمة..وان شاء حرمكي لحكمة والحمدلله على كل حال..يعني رزقك جاي جاي شئتي ام ابيتي..سواء صار نصيب او لا... وما تحطي ببالك انه قطار الزواج فاتني يعني خلص الحياة انتهت او انعدم الامل...لا..فالزواج اصلا مو كل شيء بالحياة بالنهاية..هاي نقطة والنقطة الثانية..يفوتك القطار..ولا تركبي مع شخص ظالم يتجبر فيكي بمسمى زوج وتندمي طول عمرك على ارتباطك فيه.... خلاصة كلامي كله قسمة ونصيب مثل ما بحكوها ومقدر ومكتوب..ولكن احنا دائما نطلب التوفيق من رب العالمين وانه يسهل لنا امورنا ويحقق لنا احلامنا... مع القناعة التامة والرضا الكامل بانه الخيرة فيما اختاره الله...
قيام ليل+دعاء+صدقة+ذكر+قران= حياة سعيدة واحلام محققة او متاخرةالى اجل مسمى وستتحقق حتما بحسن الظن بالله.
لا تنسوني من الدعاء بالثبات
تحياتي وقبلاتي