لا تفوتكم فطاير مقلية ولا أسهل منها

هلا وغلا عدد ما حبى ودبا بأخواتي الحلوات الغاليات على قلبي ...
هذي فطاير دايما أسويها وكل من ذاقها انهبل عليها و على طعمها وشكلها وتراها سهله مره مع إن فيها قلي وحشو وخلافه ...
عجينة الفطاير هي :
في خلاط الكأس نخلط كلا من :
( 1 ) كأس ماء .
( 2 /1) كأس زيت .
( 3 ) ملاعق طعام حليب بودرة .
( 1 ) كأس دقيق .
ملعقة كبيرة سكر .
شوية ملح .
ملعقة ونصف طعام خميرة فوريه .

تخلطينها وتكونين حاطه في زبدية ( كأس وربع دقيق + ملعقة باكنغ باودر ) حطي خليط الكأس على الدقيق والباكنغ باودر واعجني زين وتحتاجين إلى بل يدك بالزيت مع العجن,وانتبهي لهذه الخطوة لأنها مهمه أخذ العجينه كلها بعد ما كورتيها وارفعيها فوق واضربيها في الزبديه مره ثانيه
يعني تأخذينها وترمينها مره ثانيه سويها ( 10) مرات والغرض من هالحركه علشان العجينه تنتفخ معك .
اتركي العجينه مغطيه ( 10 ) دقايق بعدين كوريها صغار وأفرديها بيدك المبلوله بزيت وقليها في زيت حار غزير
بتطلع مثل التاوه إذا أنتم تعرفونها . يطلع معك تقريبا 28-30 حبه ، وأنتي تقلين حطيها على طول في الحافظه واتركيها .
جهزي الحشوه وهي عباره عن :
قطع دجاج صغيره مو متبله على النار مع يصل وثوم وشوي زيت إلى أن تنزل الدجاج مويتها وحطي البهار والكمون المطحون وشوي كاري ولا تنسين الملح ( 10 ) دقايق

قطعي مخلل خيار مربعات + بطاطس مقلية مربعات + بصل أخضر + مايونيز + جبن كاسات .وحطي عليهم الدجاج المستوي .

بعد ما تبرد الفطاير افتحيها من المنتصف واحشيها بالحشوة اللذيذه وأكليها بالهنا والعافية .
بصراحة من غير ما أمدح هذي الفطاير أنت جربي وشوفي المدح اللي يبي يجيك لكن انتبهي لا تنسيني من دعوة صادقة بظهر الغيب أن يرزقني بالذريه الصالحة الحسنة الخلق والأخلاق .