لا تقولين ولد ولا بنت قلي يارب العافية

السلام عليكم ورحمة الله وبركاته قصتي طويله ولكن معبره وخاصة لأمهات البنات
حبيباتي الغاليات راح أقلكم قصتي اللي إلى الآن اشعر بأنها خيااال أو كابوس مزعج أنا متزوجه ولدي ولدي البكر مؤيد الله يحفظه وجبت بعده 3 بنات وكان نفسي أن يكون عند ولدي أخ عشان ما يكون وحيد والبنت الأخيره تمنيتها تكون ولد عشان يكون بنتين وولدين
بس الله كتب أن تكون بنت ولله الحمد من قبل ومن بعد 0صار عمر بنتي الصغيره 3ونص فكرت بعدها أن أحمل وتمنيت أن يكون ولد وأختم خلاص
حتى ولدي كان يقول نفسي تجيبين لي أخ يا ماما
بعدها قلت لازم أخذ بالأسباب قالي زوجي شوفي كل شي من الله بس هذه نبغاها أخر مره تحملين فيها خلينا نطبق الجدول الصيني وكمان أستخدمي محلول بي كربونات الصوديوم وكمان نشوف توقيت التبويض
قلتله خلاص راح نطبقها وكمان راح نطبق معاها طريقه الأكل وأشتريت عسل أصلي وغذاء ملكة النحل وطلع النخيل وصرت أطبق الأكل وأكل العسل أنا وزوجي وحددت من الجدول الصيني العمر وشهر الحمل بكل دقه وأخذت المحلول من الصيدليه بعد مالفيت عليه يمكن 10 صيدليات في الرياض الين يالله لقيته في وحده من الصيدليات فأخذت منه كميه كبيره وللمعلوميه الصيدلي يقول لزوجي المحلول عليه طلب بشكل عجيب
وانتظرت ذاك الشهر وسبحان الله جاتني الدوره قلت يلا مافي مشكله عندي فرصه الشهر اللي بعده ( حسب الجدول الصيني ) وأنتظرت وسبحان الله ما كتب أحمل وجات الدورة وحسب الجدول الصيني مفروض أحمل شهر 12 قلت في نفسي ماراح أنتظر وأستنى ها الشعوذة
بستنا شهرين كمان وبحمل برمضان
يوم سألني زوجي قال أستغفر الله مانبغى نتعالى على الله بس في ناس طبقو الجدول ونجح
نشوف المرة الجايه ونجرب وبندعي الله وإن شاء الله ربك يسر متى المرة الجايه قلتله حسب الجدول راح يكون برمضان قال متأكده قلت أيوه وأنا عارفه بس قلت مابقول له عشان مايرفض ويقول أنتظري وفي قرارة نفسي أن هذا كله شعوذه ما أنزل الله بها من سلطان
سافرت مكه برمضان عشان أخذ عمره وأدعي ربي يرزقني الحمل ويكون ولد صالح وكنت أستغفر كثير وأدعي في السفر الين وصلنا وأدعي قبل الفطور وأدعي وأنا أصلي القيام وتصدقت عشان الله يسهل وزوجي كان بكل فرض يدعي أن الله يرزقه بأخ لمؤيد
ومره أتذكر كان في وقت مطر قبل رمضان يوم كنت أنتظر الحمل ماصار فدعيت من قلبي قلت يارب مارزقتني الحمل الحين يارب تيسرلي حمل بولدين توأم صالحين المهم رجعت من مكه وأنتظرت ذاك الشهر وبعدها حسيت بألم زي ألم الدوره وقتها بصراحة حسيت بنوع من الجزع وقلت في نفسي يارب مع كل ذا وما صار حمل وكنت أول أقول في نفسي يارب لو بحمل ببنت لا تكتبلي الحمل المهم جلست كم يوم وحللت بالبيت وطلع حمل وقتها حسيت أن الأرض ماتشيلني من الفرحه وحمدت الله بعدها بشهرين جاني ألم في بطني شديد رحت المستشفى قالولي المرارة عندك ملتهبه ولازم عمليه قلتلهم بس أنا حامل قالوا مافي حل إلا عمليه أستخرت وتوكلت على الله وسولي عمليه منظار وقبل العمليه قالو لازم نسويلك الترا ساوند (أشعة صوتيه)يوم عملولي الأشعه أشوف الكتوره تناظر بإستغراب قالت بنادي إستشاري الأشعه ممكن قلتلها ناديه مافي مشكله يوم جاء الدكتور يناظر في الدكتوره الأخصائية قمت حسيت أن في شي غريب قلتلة دكتور أش فيه سكت قلت دكتور توأم قلي ايوه توأم يابنات الفرحه كانت ماتسعني أنا وزوجي وقلت بعدها ربي كرمني وأجاب دعوتي اللي بالمطر وكنت قبلها أقل لزوجي تتوقع الله يستجيب لي ويرزقني بتوأم قالي واحد وكفايه المهم تعبت في العمليه مره عشان المسكنات كانت خفيفه ومع كذا اعطوني مضادات وكنت ادعي ان الله يكفيني شرها ويحفظلي التوأم كنت أقراء البقرة يوميآ والأذكار أحافظ عليها صباح ومساء وأقراء سورة مريم بنية أن الله يرزقني الولد والحمد لله عدت الأيام بعدها بشهر وشويه رحت لدكتور شاطر عشان أسوي أشعه رباعيه وانا في نهاية الثالث أنا في قرارة نفسي أبي أعرف جنس التوأم بس قلت لزوجي خل أروح أشوف وضع التوأم بعد العمليه والمضادات رحت وقلت الحين بيبشرني وبتم فرحتي دخلت الأشعه والدكتور في تحديد الجنس شاطر قليله في حقه يابنات أول مافتح الجهاز وشاف قاله زوجي طمنا يادكتور ليش وجهك مقلوب قال لا ولا شي كل شي تمام وانت عندك بنتين.في كيس واحد وبمشيمه وحده..........أنا صار وجهي كذا؟؟؟؟؟؟؟؟؟(علامات إستفهام)أناظر زوجي وأشر بيدي أقول 2 موبنت بنتين قال زوجي الحمد لله يلا الله يصلحهم وأنا عارفه أن زوجي كان يتمنى الولد بس شافني كذا قام قلي يجون الله يصلحهم يتربون مع أخواتهم وأخوهم وخلاص حمل مره ثانيه مافي أنا بكيت بكاء عمري مابكيت زي كذا لدرجة اني من شدة البكاء صرت أشخر حسيت وقتها بإحباط عمري ماحسيت زيه وجاني الشيطان أعوذ بالله منه وهذا طبعآ أفضل فرصه له وصار يوسوس لي ويقول أين ذهبت البقره وين الدعاء وين الإستغفاروين ووين 000موبنت بنتين من 3 بنات الى 5 رقم بنات قياسي بدل ماأقول هذه هدية رب العالمين ربي ماقدرلي بنات الأ هو أعلم وين الأصلح حاولت اتماسك وصرت أقول رضيت بالله ربآ000والحمد لله على كل حال بس الشيطان كان يوسوسلي كثير كنت أجلس أبكي وأجلس في غرفه لوحدي وأبكي واكلم الي في بطني وأقول ماحبيتكم أبدآ وليتني نمت ذيك الليلة وأرجع بعدها أستغفر وأقول أش هذا اللي أنا أقوله وعلى ذا الحال مابين قنوط وإستغفار وفي يوم من الأيام قالي زوجي أخواتي 3 كلهم طبقو الجدول الصيني ونجح وكلهم قالولهم ولد وأنت أكيد ماطبقتيه صح قلت ايوه كان الشهر الي حملت فيه بنت بس قلت هذه شعوذه ماراح أعتمد عليها قام زعل وقال ليش كذبتي علي أنا بكيت وصرت أدعي يارب يكون اللي في بطني ولدين أو ولد وبنت ويبان كذب الجدول وزوجي ماترك أحد بالرياض وبرا الرياض يعرفه إلا قاله زوجتي حامل بتوام بنات ويوم دريت زعلت منه وقلتله مفروض مانقول لحد الحين قالي ماعليك بنات ما راح أحد يحسدهم قلتله أنت تبين أنه عادي عندك بس الحين وضح أنك زعلان أن معي بنات وتزاعلنا زعله كبيره أنا واياه قمت دعيت وقلت إن شاء إن ها البنات يموتون وأرتاح عدت الأيام وحاسه بتعب الحمل النفسي أكثر من الجسدي بالفعل أخواته جابوا أولاد وأنا أكدولي الدكاتره إنهم بنتين 00000يابنات والله الجنين يتأثر بمشاعر أمه بشكل عجيب0000لما خلصت السادس صارت وحده من البنات في بطني ماتتغذى من المشيمه ولا تشرب المويه وكأنها تقلي أنتي ماتبيني حتى أنا مابكون ثقيله عليك مع انها كانت هي أنشط من أختها في كل مره كنت أسوي سونار كان الدكتور يقول هي أنشط من أختها وأختها كسلانه000أثناء فترة الحمل ومن قبل ماأعرف نوع الجنين كنت أحلم دائمآ أن معي شيئين واحد زين والثاني مقطوع ( عقدين- اسوارتين-صندلين )حسيت من أول أن وحده راح يكون لها قصه00000000بالفعل وكأنها تقول يماما أنا بروح للي أرحملي منك بعدها قالي الدكتور أنت عندك زياده بمويه الجنين بشكل فظيع وفيه خطر على الثنتين وكنت أحس بطني بينفجر0000000البنت هذه صار وزنها ينزل بشكل سريع جدآ في 3 أيام نزلت 300جرام وبعدها قررولي عمليه وقالولي البنت هذه تقريبا ماراح تعيش والثانيه احتمال تعيش 10%00000والله يابنات حسيت روحي بتطلع من الحزن عليهم حسيت إني السبب سويت العملية بعدها قالولي البنتين عاشوا ووزنهم أقل من كيلو وخاصة هذه البنت اللي هي سبب المشكله كانت 700جرام بس كلهم حالتهم خطيره وغير مستقره 0000اليوم الأول ماشفتهم نزلت لهم ثاني يوم ويوم ودتني السستر عندهم وشفتهم في الحضانات جالسه أقول في نفسي يارب ماتقول لي إنهم هذولا 0000منظر الله لايوريكم صغر فظيع ولونهم أزرق واجهزة تنفس وتغذيه من الأنف والفم منظر يصعب على الكافر000بكيت بكاء شديد وتذكرت وقتها الدموع اللي بكيتها يوم قالولي بنات وبكيت بدل الدمع دم 0000وحسيت بحزن شديد لأني حسيت أني كنت السبب الله يسامحني وشفت وحده منهم (اللي كانت سبب المشكله)كانت جميلة جدآ جدآ بالرغم أن الأجهزه مغطيه وجها لكن كانت ملامح وجها باينه وقتها حسيت إنها مو من أهل الدنيا وعرفت أنها بتموت مع أن نسبة حياتهم كلهم كانت ضعيفة جدآ 000والله ياناس إنها زي النار بقلبي 000ولما كنت بطلع من المستشفى مريت على الدكتور قالي وحده منهم تعبانه (الصغيره)عندها نزيف في الدماغ ونزيف في الرئة وانتفخ عندها اليافوخ بكيت وقلت دكتور الله يخليك أرحمها وفك الأجهزه قالي لا إحنا ننقل لها دم الحين 0000حسيت وقتها إني أنا اللي قتلتها 00قتلت حلم الطفوله 000قتلت براءتها00قتلتها أي قتلتها ماتت بعدها وصورتها ماتروح من بالي الى الحين وأبكي كل ماأتذكرها وأتذكر كلام الدكتور يوم يقول أنتفخ اليافوخ وأحس بحرقه في قلبي وصرت أدعي ربي يغفرلي وأستمريت على الإستغفار أكثر من ألف مره في اليوم وادعي وأتصدق ولجأت لربي بصدق وقلت يارب إن كنت غفرت لي فسلم لي البنت الثانية وحسيت وقتها أنهم لو صفولي أولاد الرياض كلهم ماأبدلهم ببنتي وتعلقت فيها بشكل كبير وكنت أتصل على المستشفى كل يوم وأزورها ومرت هي بمراحل صعبه جاها نزيف بس كان بسيط الحمد لله 000جاتها جرثومةبس عدت لان حجمها صغير ومناعتها ضعيفه 00وطلعت بعدها من الحضانه ولله الحمد من قبل ومن بعد 0000حبيتها حب مو طبيعي نسيت بعد هذا الألم كل حلمي بالولد000وعرفت لما الله يرزق والوحده بحمل سليم هذه أكبر نعمه وعرفت على قد ما الله رحيم أن عقابه شديد فكم لله من تدبير أمر غطته عن المشاهدة الغيوب وعرفت ان هذا قدر الله وحده يعرف ماوراه 000يابنات لا تشغلين نفسك بولد ولا بنت أشغلي نفسك بالدعاء بصلاحهم وبرهم وسلامتهم 000ملاحظة أتصحك بسماع أنشودة أغيب وذو اللطائف لا يغيب لمشاري العفاسي عشان تسلين بها نفسك 0000سامحوني على الإطالة بس حبيت أوصلك (أحسني ظنك بربك وبما قضاه لك فكله خير) أستغفر الله الذي لاإله إلا هو الحي القيوم وأتوب اليه