بسم الله الرحمن الرحيم
السلام عليكم يا الحوائيات الحلوات
بصراحه كان في بالي موضوع وكل ما جيت اكتبه انشغل عنه
وفي الفتره الاخيره مريضه وما غير على اللاب توب وقلة حركتي بسبب الحمل والوحام <<دعواتكم ربي يخففه عني
الموضوع اللي في بالي
كيف تكوني زوجه او بنت مستقله ماديا عن زوجك ؟
وكيف تعمي عيون زوجك عن فلوسك ؟
يمكن موضوعي يعجبكم ممكن انه يستفزكم !
وخاصه بعد موضوع حافز !!
اول شيئ ..
لازم اذا كنتي ام تبدي تطبقي هالكلام اللي بقوله لك على اطفالك من عمر ال7 سنوات
يعني تعطيه مصروفه المدرسي لمدة اسبوع لنفرض مثلا 15 ريال صرف
وتعطيه ورقه تقرينها عليه
هذا المصروف لو اخذت منه 3 ريال كل يوم رح يكفيك الا الاربعاء
لو اخذت ريال رح يكون معاك 10 ريال ورح اعطيك عليهم زياده وتصير فلوسك اكثر
ولو تفسحت فيها كلها مارح يبقى معاك شيئ ورح تبقى على سندويشة البيت والحليب والمويه مارح تشتري شيئ من المقصف
وكوني صارمه معاه
وبعد شهر اعطيه اكثر حق اسبوعين مثلا
وعلميه الاقتساط ومع الوقت هذا الشيئ رح يخليه يدرك قيمة الفلوس
رح يخليه يعيش ضمن مستوى معين
يقبل اعتذارك عن عدم شراءك للعبه الفلانيه لان ماعندك فلوس تكفي
والخ من الفوائد الرائعه وهذي سياسيه مع طفلين ولله الحمد
نرجع لموضعك انتي كزوجه
كثير من الزوجات وانا كنت منهم ما عندنا مصروف علما ان المرأءه تحتاج لمصروفين :
\مصروف منزل او مصرف جيب
مصروف للطوارئ لا قدر الله ضيف مفاجئ والزوج مو موجود
او حادث لاحد اطفالك احتجتي مستوصف اهلي او تكسي
او احتياج ضروري من البقاله بسبب تأخر زوجك
يعني الميزانيه على حسب موقع البيت وعدد الاسره
\المصروف الثاني هو مصروف الملابس والخ
انا اشوف انك تشرطي حد غير معقول وتذكري ان الزوج رح يحذ ربع المبلغ يعني كبري المبلغ
والاولاد ماللك دخل انزلي قضيي لهم من عنده
وانتي اجمعي فلوسك وقضي فيها على راحتك
لو رفض الزوج
انا اشوف بالمسايره وان ما نفع ناقشيه بهدوء
ما نفع ناقشيه قدام شخص زوجك يحترمه مثلا ابوك او اخوك او خالك عمك اي شخص مقرب منك
يستحي زوجك منه ويلزم زوجك
مع الاشتراط انها تنزل في حسابك كل شهر وانه بيشيك على كشف حسابك عشان يتأكد من وعد زوجك
شخصيا اخذته بعد مطالبات 5 سنين انفجرت
وكانت الاخطاء
اولا مراعاه ظروف الزوج <<<اغبى شيئ ممكن تسويه المرأءه في نظري مع احترامي للكل
لكن لازم تبيني له انك ملزوم ولازم تدفع وليش تزوجت دامك مو قد الزواج
الشيئ الثاني
انك تبيعي ذهبك مساعده لزوجك <<<<النقطه الغبيه الثانيه انك تقولي انه رجل مختلف مافيه الرجال تتغير اشكالهم بنفس الطبايع
غالبااااااا لذالك لا تغامري تجربي
الشيئ الثالث <<<خذي حقوقك وعيشي حياتك واعطيه حقوقه لا تقصرين عليه
لو احتاج منك فلوس اعطيه بس سلف وذكريه قبل الراتب لحد ما يسدد ولو مثلا المبلغ كبير قولي استشير اخوي ابوي اي احد وبرد عليك لانه بيهون
رابعا <<لا تقولي زوجي يستاهل اعطيه عيوني وما بيننا حقوق خلي تجارب من سبقوك بين عيونك الرجال ما يعرف يقول شكرا الا بمره ثانيه
والا يقول الله لا يشكر فضلك في احسن الاحوال في اسوئها انه يتزوج بعد ما يرتاح ماديا ويقعد يقول ربي انعم علي مهما كانت طيبته تتغير طبايع الناس لما تغتني فممكن تكوني اول وحده يتخلى عنها
وشفت هالشيئ كثير بحياتي
لذال اعطيه حقوقه وخذي حقوقك بدون ما يجي يوم تقولين صبرت عليك واعطيتك وحرمت نفسي وسويت لك
وفعلت لان كللل اللي كان انتهى
ما بيقعد بحسرته الا انتي فلا تحرقي قلبك وعيشي من الان صحححح
والحين
بما ان حافز نزل اغلب الازواج شاركوا زوجاتهم ودخلوا عرض في حافز اللي ياخذ نصه واللي ياخذه كلله
بسألكم كم نسبه اللي يعطيك من راتبه لو طلبتيه النص بيعطيك مثلا اكيد لا
لو طلبتي الراتب كله بيعطيك مثلا الاغلب بتقول لا
اذا احفظي قريشاتك بشيئ مفيد لك
او اصرفيه على شيئ يفيدك
ان شاء الله تساهمي به لبناء ابار سقيا أجرها لك في الدنيا ولآخره
والا تبري فيها امك وابوك
والا تساهمي في عمره للفقراء
او تسوي شيئ لنفسك انتي مو له ولا لبيته
ممكن تجربيه منه لكن هديه مو نقد
وفيه شيئ لا حظته ان الوحده لا صارت نفاس جاها فلوس بعض الحريم تروح تعطيها زوجها
ليش ما تفكرون تشترون للبيبي فيها اغراض مفيده تخيلوا انا اتعامل مع الفلوس اللي تجي لأولادي كأنها امانه
بس اصرفها عليهم احس انها جات لهم وخاصه ان بعض الحريم تحلف انها لفلان يعني للطفل اظل اشتري له بها اغراض
لحد ما تخلص طبعا ازيد عليها مصروفهم بس فلوس الهدايا كذا حتى لو اعرف حرمه اقول شريت لولدي بفلوسك هالشيئ او هالهديه
احسهم يفرحون انها وصلت للطفل
<<<تحب السوالف شتتكم
خلاصه كلامي
اللي عندها بنت من الان تدرب بنتها على الاستقلاليه وحتى ولدها وانهم يعيشون ضمن فلوسهم فقط وتعلمهم الادخار
وكمان تعود نفسها على الاستقلال المادي وتكون صارمه
حتى لو صارت اول الايام مشاكل مصير الرجل يتعدل وضعه
الرجل يعامل بالتعود يمكن اول الايام يكون جدا سيئا بس مع الوقت رح ترتاحي انتي وزوجك
واهم شيئ زوجك لا يدري كم معاك وكم صرفتي وفي ايش صرفتيه لأن كل احتياجاتنا عند الرجال تافهه وماغير ضياع فلوس
لان هالشيئ خاص فيك خاصه لو زوجك من النوع اللي يحط عينه على فلوسك
خليكي الفقيره المسكينه واحتفظي ببيانات بطاقتك لنفسك
يا بنات احنا بزمن صعب ومشاكله كثيره هي ما وقفت على كم ريال
لكن اللي ما تعرف تصرف وتدبر عمرها من صغرها كيف لو قدر الله عليها وخسرة زوجها تدبر نفسها وتمسك فلوسها وتدير حياتتها مع اولادها
يعني لازم نكون نساء لكن بشخصيه مستقله عن الزوج بكل شيئ ما ديا اجتماعيا حتى عاطفيا تذكري انه مجرد شريك
وكل شراكه لها نسبه معينه منهم الكثير ومنهم مالم يصل نصابها الا الربع حتى
لذالك عيشي حياتك باسلوب صحيح عشان ما تندمي على ماضي وعمر مضى وانتهى بل تحسين انها ازمه وتعدي
موضوعي نزلته لكثرة ما قريت عن البنات اللي باعوا ذهبهم وندمانين ان الرجال تغير وا وقلبوا عليهم
واللي اعطت زوجها واهلها بعد وكمان جحدها
وغيرههم كثير كابتين في صدورهم فهذا الموضوع لمن ارادت ان تتدارك نفسها وان تصلح حالها وهي متأكده ان النصيحه من ذهب
وتأكدوا بعض الرجال اتكاليين وما يصدقون على الله ان احد تنازل عن شيئ او يذلونك عشان تتنازلي عن حقوقك
بس لو كنتي صارمه يتعودون حتى يصير ون بطبع مختلف المهم
ان هالشيئ يكون باول سنوات الزواج مو تتأخرين 5 والا 7 سنين ثم تجلسين تشكين
انا بعد 5 سنين بس اعتبر نفسي لحقت على عمري وسبحان الله الحين زوجي يطالب لخواته مصروف ونظام مستقل
وموديهم يفتحون حسابات بدون علم ازواجهم ويساعدهم على الادخار وانه يسوي لهم ايداع
فيعني سبحان مغير الاحوال
واستعينوا بالله والله يوفقكم ولا تنسوني من صالح دعواتكم
اللي عندها رأي لا تحرمني منه ومشاركه ممكن تضيفها تفيد فيها البنات لا تتردد
وانا مؤمنه بشيئ اسمه الاختلاف لا يفسد للود قضيه
وصل اللهم وسلم على رسولنا محمد وعلى اله وصحبه اجمعين
سبحان الله وبحمده
سبحان الله العظيم
الوحيدهـ* @alohydh_16
كبيرة محررات
لا تندمي أستقلي ماديا عن زوجك وعلمي أطفالك الأستقلال تجاربي الشخصيه يارب يكون مفيد
169
45K
يلزم عليك تسجيل الدخول أولًا لكتابة تعليق.
روعه
انا معك معك معك معك معك معك في كل حرف نطقتيه كلامك صح ومنطقي ولازم كل انسان يفكر في نفسه قبل غيره
ويعرف يستغل مل شي بذكاء وباحترام وبطريقه صحيحه
انا معك معك معك معك معك معك في كل حرف نطقتيه كلامك صح ومنطقي ولازم كل انسان يفكر في نفسه قبل غيره
ويعرف يستغل مل شي بذكاء وباحترام وبطريقه صحيحه
الصفحة الأخيرة
الله ييسر حملك وولادتك ..