لا حب ولا تعاون وكل واحد نفسي وبسسسسس

السلام عليكم

الحقيقه اني ترددت قبل ما اكتب هالموضوع لأنه يخص اهلي
لكن بيكفيني عزاء لو لقيت على الاقل وحده مثلي

ولو ما لقيت على الاقل اصير فضفضت

أنا يا بنات ما احس ان اهلي ناس طبيعيين .. انا احبهم ومالي غيرهم بس ما احس انهم مثل بقية الاهل
عندي الوالد الله يحفظه ماله علاقه بأحد يا في شغله او مسافر يتمشى لوحده
ما اذكر انه زارني في ولاداتي ولا حتى رفع علي سماعة التلفون ولا جاب لي هديه ولا للمولود
مستحيل اشكي له لانه ما عودني حتى اتكلم معه بصراحه
تصدقون يا بنات انه ما يعرف كم عندي من طفل
بتقولون انتي السبب ما تخلينهم يزورونه اقول لكم اهلي ما يحبون احد يجيهم وابوي اساسا دائما مشغول وما يحب الاطفال وفي العيد يسافر ولا عمره قعد ولا عيد اما يروح اسبانيا والا ايطاليا والا لبنان
عايش بعالم ثاني


والوالده الله يخليها لي ام غريبه من جد ما تحب احد يجيها تصدقون مالنا جمعه يوم الاربعاء او الخميس زي بقية الناس .. ما نشوف بعض
امي تتضايق مره اذا جيناها احنا واطفالنا وتبدأ تتضايق لا يخربون ولا يكسرون
وما تحب اطفالنا زي الجدات اول ما يدخلون عليها ما تفرح بهم تصدقون اول شي تقوله فسخوا جزمكم لا توسخون الفرش
اهم شي عندها بيتها واثاثها ومضهرها الخارجي وجمعاتها مع صديقاتها
ما اذكر انها سالتني عن عيالي وحتى لو كانوا مريضين
حتى قبل زواجي ماكانت تسأل عننا ولا عن اختباراتنا
ويوم انخطبت وتملكت قالت لا يصير زوجك كل يومين ناط لنا لا يجي للبيت هنا ابدا كلميه والا اطلعوا مطاعم ... والله كنت اغار من صديقاتي اللي اهلهم يصرون على ازواجهم يتعشون عندهم
وكنت انحرج منه لما يقول ابي اجي ازورك
مره تنومت انا وبنتي في المستشفى اسبوع بس اتصلت فيني مره وحده
واذا ولدت تجيني بس اذا جا عندي زوار يعني ثاني او ثالث يوم ولو كان عندها مناسبه او طلعه ما تجي من اساسه
والنفاس ما تجرأت اصلا اجي عندها على طول اروح بيتي لأنها مسويه نفس النظام مع اخواتي محد يجي عندها .... وما تزورني في البيت الا بعد عشرين يوم اذا جو لي زوار
وتجي وتطلع ما تسأل عن البيبي واذا جبته لها تشوفه ما احس انها مهتمه خمس ثواني وترجعه لي بدون حتى ما تدعي له



خواتي
بصراحه ما احس انهم اخوات احس انهم من عامة الناس
مافيه اي تعاون لما تكون عندهم عزايم انا ارسل لهم اطباق وارسل لهم شغالتي لكن انا مستحيييييييييل يسوون لي هالشي
حتى لما كنت والده هربت شغالتي وانا في المستشفى وتبهذلت وانا راجعه وكنت والده قيصريه والله تعبت تعب محد سأل عني ولا وحده منهم كلفت على نفسها ترسل لي غدا لو يوم واحد او تجي تساعدني
او حتى ترفع السماعه تسال عني
ووحده منهم كلفت نفسه تتصل علي بعد اسبوع ولاده تسالني من وين جبت الشوكولاته والله كانهم ناس اغراب
انا متفشله بس من اهل زوجي وزوجي بيقولون وين خواتها اللي اختهم في النفاس وماعندها شغاله
وما يرسلون لها اكل وهم عندهم شغالات والبيت خمس دقايق بالسياره !!!
والله اذكر ان اختي الكبيره كنت ارسل لها يوميا اكل وهي والده مع اني كنت ادرس وعندي اختبارات وكنت اسوي لها عصير البرتقال يوميا وزوجي اللي يوصله لبيتها :(

حتى لما كنت مخطوبه كلنوا يرفضون يروحون معي للاسواق واذا طلعت وحده منهم طلعت بتثاااااااقل وكل ما جيت اشتري شي قالت ماله داعي عشان نخلص بسرعه ... حتى الزواج قالوا ماله داعي مالنا خلق نراكض ورى حفلة زواج ... حتى طرحة الفستان قالوا لي مالها داعي
والحين ماشاء الله ما فيه شي ما سووه لبناتهم بزواجاتهم


ومره اقترحت عليهم نصير مثل الناس ونتجمع ولان امي ما تبي احد يجي بيتها قلت لهم نتجمع في استراحتنا
والله يجون كل وحده وعيالها ولا وحده منهم تجيب حتى المويه
ويوم قلت لهم وش رايكم كل وحده تجيب طبق او حلى قهوه صاروا ما يجون
غير كذا فيهم طبع لو الوحده تشتري لك شي بريال تقعد تطالبك فيه
انا اطلع مع زميلاتي وخواتهم للمطاعم وتطلع الفاتوره ب 500 واكثر كل وحده تحلف على الثانيه انها تدفع
وحنا لو طلعنا يمسكون الفاتوره ويقسمونها حتى الارباع والانصاص بشكل ينرفز الين اقول انا ابدفعها خلاص
ولو تدرون وكل وحده منهم متزوجه مليونير ما شاء الله وما يصيفون الا في جنيف


اما اخواني عاد في عالم ثاااااني مع حريمهم اخر مره شفت واحد منهم كان في عيد رمضان


اسفه اني طولت عليكم :( بس مقهوره