لا زلت مظلومة بس ادعولي بالفرج

السلام عليكم ورحمه الله وبركاته

احتاج دعواتكم يا اخواني ع قد ما انظلمت ، ذكرت قصتي برابط سابق بالمنتدى وكذا رابط

الكرب والضيقه مقطعتني !!

محتاجه دعواتكم ربي يلطف بحالي وحال ولدي الصغير ، صار عمره 4 سنين الله يحفظه ، لازال بدون اثباتات ، بدون اب ، بدون حقوق ، بدون اطفال يختلط فيهم ،

لسه وضعي ع ماهو ، زوجي الي تركني وانا نفاس وخلاني ببيت اهلي المتواضع لا زال وضعي معه هو هو ،

ماتغير شيء ،، بس شكيت عليه بالأماره وتحولت للشرطه ولسه الحين المعامله بالشرطه ، وننتظر !!!

زوجي يقولو طلقني قدام اخواته غيابي ، وقدام الشرطه قال انه ع خلاف معي ،، بس الأكيد مافي امل للرجعه ، لكن رافض يضيفني ، مايبغى شيء يربطه فيني رغم اني ام ولده .

قضى على احلامي بس الله يعوضني خير ،، الصعوبات كثيره ي اخواتي !!

وحيده بهالدنيا مالي الا الله ، امي الي هي امي احسها تتصرف مثل الي مالها دخل ،

واخواني بعد موت ابوي وخصوصا الي اصروا ع زواجي من هذا الانسان ، والله عايشين حياتهم بالطول وبالعرض ، واخوي الي اصر ع زواجي منه وربي زوج بنته الكبيره ومكمل حياته وفي قمه سعادته ومتناسي انه بنى سعادته على تعاستي ، وفوق كذا ماحضرت الفرح بطلب منه لان عندي طفل ،، نعم عندي الطفل اليتيم الي هو اصر ع زواجي من ابوه المستهتر ،، الحين يتصرف كنه ماله دخل ، الله وكيلكم مايدورني بقرش واحد ، مايسأل عايشه ولا ميته ، من موت ابوي ما اتصل الا مره وحده يسألني عن شغله وماقال كيفك ، دموعي تصير بحر كل ما اتذكر الي سواه فيني وكيف دمر حياتي ،، ياجماعه زوجني عشان كانت عمه زوجي كفيلته ، وخايف منهم على نفسه وهو عارف عيوب ولدهم كلها ومع كذا زوجني له ولما نقل كفالته عنهم ورب البيت اتصال يعاتبهم ع الي سوووه فيني ما اتصل ، كله هذا لأني اخته الي مو شقيقته ، ولأنه كبير استغل مكانته وضعف ابوي ايامها ،وبعد ماتيتمت صار مالي بعد الله الا هم ، ومع كذا لما فكروا يوقفوا ،، وقفوا مع زوجه ابويالأخيره واولادها الثلاثه وبناتها الإثنين ومو ذيك الوقفه ، يادوووب بكم ريال ووضعهم فوق الريح ، ونحن لأن امنا مطلقة من ابوي والله ماكنهم يعرفونا يتصرفون كاننا اغراب عنهم ونحن بأمس الحاجه لهم ، انا واختي كلنا حريم ونضيع بهالدنيا بخذلان رجالنا ،،،

حريم واتدمروا بسبب رجاااال ،، بسبب كلمات رجال لبعض ،، انا كنت الضحيه ، وولدي المسكين الي مثل اليتيم ،، يححححححححزن كيف لحاله ووحيد ،، حتى اطفال يلعب معاهم مافي

وكمان الجوازات تطلب مبلغ رسوم نقل الكفاله بما اني اردنيه ، والطبخ المنزلي الي اشتغل فيه يالله يوفي اكل وشرب !!

بسبب اقامتي المنتهيه الموضوع تبع اوراق ولدي راح يتأخر بس مابقي لها اقامتي شيء وتطلع اخوي كفلني ،، بس ناقصه رسوم الكفاله ادعولي ربي يفرجها علي وعلى الي مثلي

ماراح اقدر اسوي اقامه ام السعودي الا لو جددت اقامتي وكفلني ولي امر بعد وفاه ابوي الله يرحمه الي توفى بشهر 11 الماضي

قاعده احاول ع قد ما اقدر نخلص اوراقنا الثبوتيه عشان اقدر القى وظيفه اعيل ولدي من الحاجه ومن المذله ،،، يارب جهودي ماتروح سدى

والوضع ببيت اهلي صعب علي احس بنخنق وكل ماكبر الولد كل مازادت مسؤولياته ،،، الله ماينسى احد

احس الحياه مع مجموعه وعندي طفل جدا صعبه ،، المطلقات والأرامل معاناتهم مو قليله

ادعولي الله يقدرني على هذه المسؤوليات الكثيره واني اكون قدها وقدود ،، الانسان ضعيف ولكن قوته بالله ومن ثم الدعوات الصادقه من اخواني في الله ،،

ادعولي من قلبكم ربي يفتح بوجهي ابوابه ويعوضني عن الالم الكبير والدموع الكثيره الي اشوفها بسبب طليقي الي ماقدر وضعي ولا قدر تضحياتي ورماني بالولد بدون مايرمش له جفن

حسبنا الله سيؤتينا الله من فضله انا الى الله راغبون

اختكم / ام محمد