لا لا محد حسدني.. أنا حسدت نفسي !!!!

السلام عليكم

صدق من قال (ما يحسد المال الا أصحابه)!!

طبعا من شهر سويت العمليه القيصريه وهي الثانيه لي .. وظليت أمدح في هالعملية وجمالها ونظافتها ودقتها.. وكل اللي فحصني من الممرضات أو الدكتورات فترة مكوثي في المستشفى تنبهر وتقول وينها هالعملية ؟؟ ما تبين أبد ولا لها أثر حتى..

وأنا عاد ما صدقت .. ظليت أقول لكل حد عنها حتى لو محد سألني.. عاد وحدة وتبغي تهذرب..
وكل شوي اوقف عند اي مرايا أصادفها أستعرض القوام المترهل وأتطمن على أحلى شي فيه وهي العمليه..

من اسبوع تقريبا و بعد اهمال مني بسبب قضاء معظم وقتي مع البيبي وخواته الصغار..يعني حتى لو البيبي نايم أنا واقفه على راسه مثل الحارس أخافه يصحى وأنا مش جنبه(طالعه فيها حنونه) وأخاف وحده من الأرهابيات خواته تهجم عليه ولا شي..
ولأني بعد كنت أعتقد اني خلاص لا بحاجه لأدويه ولا كريمات ولا شي من اللي نصحتني بهم الدكتوره .. لأعتقادي ان كل شي تمام ! يعني شو كنت أبغي أكثر من هالنتيجه الحلوة!!

المهم ظهر عندي التهاب في العملية .. (جزء صغير من العمليه انفتح بدون ما أحس فيه ) لأنه صغير ويا دوب ينشاف مع كم قطرة دم مصحوبه بمادة لزجه على الجرح .. والله لا يرويكم رائحه عجيبه غريبه :icon30:

راجعت الدكتوره اليوم وقالت لي هذا كله بسبب اهمالج وثقتج الزايدة بأنج ما تحتاجين شي..
ورجعت كتبت لي أدويه مثل قبل وأكثر... أنا اليوم يا جماعة مجبره استخدم كل الأدوية والكريماتالقديمة والجديده كأني اليوم والدة مش من شهر:(

عندي أشياء ثانيه حبيت أفيدكم منها.... عاد أنا قلت أنصح خواتي في قسم الحوامل لأن الدور جاي على الكثير منهم :hahaha:

نصائحي تقول:-

1- لا تدخلين في تفاصيل ولادتج أمام الناس حتى لو العائلة واكتفي بكلمة الحمدلله

2- سوي عمرج تعبانة بعد الولادة حتى لو تحسين انج فرس

3- عطي لنفسج الوقت الكافي للراحه .. لا تتحججين بانشغالج مع المولود الجديد..هذا المولود يا عزيزتي محتاج أم بعافيتها وصحتها عشان تهتم فيه !! وما يضر لو بكى دقيقة يعني خليه يوسع رئته شوي أبرك له

4-تخلصي من الشامبو والبلسم واستخدمي 2 في واحد.. شو تسوين يا اختي انتي مضطره !! هي يادوب 5 دقايق لج في الحمام.. لا تحلمين بأكثر

5-استخدمي شفرة الحلاقة وحطي زيت جونسن للأطفال وانتي مبلوله نفس الدعاية اللي بالتلفزيون
بدل الحلاوة والسلك ابيل وربعهم من شلة الألم..لأنه ايضا ماراح يكون عندج الوقت الكافي.. هيه نعم

6-قصي شعرج.. يعني أعتقد أنه أسرع في التمشيط والغسل..و في كل الأحوال الشعر الكثيف الجميل اللي حصلتي عليه فترة الحمل يا حلوة كله بيتساقط على السجاده والمخدة

7-لا تطولين أظافرج.. علشان ما تأذين البيبي ولا تأذين نفسج.أنا عن نفسي طول عمري بليا أظافر
وعموما ما عندج وقت للأهتمام وفيهم

ملاحظة:- اذا صار عندج وقت فاضي لا تتأملين جمال جسمج بعد الولادة في المرايا ... لأنه يا حبيبتي ماراح يرجع في يوم وليله فيعني وفري وقتج للأدويه وللبيبي أفضل

تحياتي لكم والسموحه أذا عكّيت بالكلام:26: