لمتى و احنا نثور أسبوع أسبوعين ونطفي ؟؟
نسوي عشرين موضوع سب ومعارضه لأمر معين و فجاءه خلاص نهجد نتعب من الطق والطقيق !!!
تتوقعون هذا هو الحل ؟؟
مواضيع كثير بقسمنا تكون معارضه لبرنامج معين كل يوم نازل موضوع بين مؤيد ومعارض لهذا البرنامج ..
و احيانا تتحول المواضيع لهوشات واحيانا يضطرون المشرفات لحذف الموضوع ؟؟
كم مره نقرأ مواضيع و نشوف مقاطع عن افلام كرتون في قناة ام بي سي وغيرها ،،
وحسبي الله عليهم وشوفوا بيدمرون اطفاءلنا وقتلوا براءتهم وووو
هل الحل هو كتابة المواضيع و نوضح رأينا وبس ؟؟؟؟
اكيد بتقولون احنا حرين والنت للكل نكتب اللي نبي <<<< اعرف الردود الحلوه :22:
اكتبوا ياغاليات وعارضوا على كيفكم بس الاهم يكون عندنا توازن مو نثور لين نتعب ونحرق اعصابنا بدون فايده ..
عارفين ان فيه واحد اجنبي يقول العرب مثل علبة الببسي اذا رجيتها وفتحتها ؟؟؟
القصد واضح علبة الببسي اذا رجيتيها وفتحتيها تطيش بقوه والببسي يطلع بعدين يوقف فجاءه ..؟؟
نثور ونعارض وفجاءه نسكت ولا كأن في شي ؟؟ وينتهي الامر بسكوتنا وانسحابنا بدون أي حل ..
المفروض يااخواتي مع المعارضه هذي يكون فيه خطوات عمليه ؟؟
مثلا معارضين افلام الكرتون اللي فيها تجاوزات دينيه واخلاقيه ، او المعارضين لبرنامج يسب الدين ،
المفروض اول خطوه نسويها الدعاء ان يبغض الله القناة بقلوبنا ،،
ونحاول نكره الاطفال والابناء بهذي القناة اللي فيها تجاوزات ، ونغرس عندهم حب الدين والدفاع عنه ...
لا نخليهم سلبيين ويتابعون اي شي ولا يفرقون بين الصح والخطأ وبين الحلال والحرام ..
ثاني خطوه نحذف القناة ، على ان المفروض اصلا مافي قنوات الا الاسلاميه بس انا اتكلم عن اللي عندهم القنوات مفتوحه ..
و اذا تبين شي يطفي قهرك من اي برنامج يسب الدين او يركز على سلبيات المسلمين ، نزلي موضوع وتكلمي فيه عكس افكارهم وتوجهم ..
اذا هم بنظرهم قدموا شي مفيد ،، لازم احنا بالمقابل نقدم مواضيع مفيده ..
ترى كثرة الكلام والمعارضات ماتفيد و ماتخلينا نقدم شي ، لانه اصلا نكون جالسين نعيد ونزيد بالكلام من غير مانشعر ؟!
معارضتنا لازم تكون قول وفعل ..
وقيسي على البرامج امور ثانيه من موديلات وموضات وامور كثير بالبدايه اول مانعرفها مانتقبلها ونكون معارضين بقوه
بعدين نستسلم وممكن نفعل الامر اللي كنا ضده ..
والمشكلة اذا كنا معارضين لامر يغضب الله ، وللاسف معارضتنا وحماسنا مايستمر ، فتره بعدين نبدأ نتقبل هذا الامر
ومع الوقت نفعله بكل جراءه ..
اقرب مثال بعض موديلات الملابس بالبدايه الوحده تستحي تلبس لبس معين وتكون معارضه وغير متقبله ..
شوي شوي لين نشوفها بأكبر مناسبه ولبسها اقرب مانقول عليه انه قميص نوم ..؟؟
وترى اذا تعودت الوحده تشوف اللي حولينها بملابس غير لائقه مع الوقت تتعود العين بعدين تستوعب الشكل لين نصير مثلهم ، فأنتبهوا لهذي النقطه ..
ياغاليات الحرام حرام مهما تهاونوا فيه الناس ، ومهما انتشر المفروض نكون قويات ولا نتهاون ابدا بالامور المحرمه ..
عندكم الدش والقنوات الهابطه البعض كان يعارض ، من باب الحرام والبعض من باب العادات والشي اللي تربى عليه ، ولا يقبلون النقاش في هذا الامر ؟؟
وبكل مكان نقاش وهوشات ؟؟
وفجاءه نجد الكل الا من رحم ربي عندهم القنوات ، والاب والام والعايله تتابع مناظر يخجل منها الطفل ؟؟ افلام وكلبات برامج سيئه ..
والوضع عادي ، وصار الغريب هو الشخص اللي يحارب هذي القنوات !!!!!
وفي الختام اسأل الله ان يغفر لي ولكم ويجعلنا من عتقاءه من النار ..