لا .. يابعد منهو على الكون يمّـه

لا .. يابعد منهو على الكون يمّـه
الحال ولّت ،،، والهقاوي صعايـب


من شاف حالي يمّه اليـوم ذمّـه
يشفق على يحّول من هـالمصايب


فيني همومٍ .. كايـداتٍ .. مطمّـه
جتني تتالا .. دون ذنب وسبايـب


أجهدني الهوجاس ياشيـن همّـه
منه العقل مابين حاضـر وغايـب


ياللعجب هـالوقت مافيـه ذمّـه
شان اللغى مابين اهـل وقرايـب


صدق العواذل هرجهـم بالمذمّـه
نقّالة الهـرج الـردي والشوايـب


يمّه وصاتك في عيونـي مهمّـه
كالبسمله بالدين مابـه عجايـب


عهدٍ علـي والله لـصعـد لقمّـه
فيها حيـاة العـز مانـي بهايـب


وان طال عمري بالمواقف لاهمّه
بكسب المعالي والعلوم النجايب


العمر واحـد بيـن كفّـه وكمّـه
واتلا العمر مابين عوج النصايـب


يمّه غلاتك فـي ضلوعـي ألمّـه
بين المحاني دون شـك وغرايـب


معك المشاعر علّها عـذب جمّـه
بلسم حياتي .. مهجتي والحبايـب


لرضاك رجلي سقتها بكـل يمّـه
ماهمّني لو صار فينـي مصايـب


ودّي بحضنك .. أرتمي به واضمّه
ياقاك رب الكون .. جزل الوهايب