لبشرة صافية وناعمة وجميلة

بنسمع كتير عن منتجات العناية بالبشرة .. ده غير الوصفات اللى بنشوفها كل يوم سواء فى المجلات أو الانترنت ..
وأكيد كل واحدة بتتمنى تكون بشرتها ناعمة وجميلة .. وتتخلص من آثار الحبوب ..
فى عندنا أكتر من طريقة للعلاج :
فى تقشير .. وفى ليزر .. وفى كريمات خصوصا اللى بتحتوى على فيتامين E .
وفى عندنا كمان وصفات ..
وقبل ما هنتكلم عن الوصفة بتاعتنا .. لازم نهتم بواقى الشمس ويكون خالى من الزيوت .. ونكتر من شرب المية علشان ترطيب البشرة .. ونهتم بطعام صحى سواء خضروات وفاكهة طازجة خصوصا اللى بتحتوى على فيتامين A و C و E .
هنتكلم بقى عن وصفتنا لآثار الحبوب :
وصفتنا هتعتمد على :
معلقة زيت جوز الهند وزيت الخروع : وده لأنه مضاد للالتهابات وكمان المكيروبات علشان كده هنستعمله فى تنضيف البشرة ونضيف عليه معلقة صغيرة من زيت الخروع .
نص معلقة كبيرة عصير ليمون : وده لأن له مفعول قوى فى تبييض لون الجلد وتفتيحه وكمان بيساعد على إزالة البقع وآثار الحبوب .. وده لأنه بيحتوى على فيتامين ج وفيتامين أ وفيتامين ب2 وكمان بيقاوم الالتهابات والفطريات والبكتريا .
معانا كمان معلقة عسل نحل : وده له فوايد كتيرة جدااا لأنه غنى بالفيتامينات والمعادن وكمان بيحفز نمو الأنسجة وبيساهم فى الحماية من العدوي .
معلقة كبيرة قرفة : ودى بتساعد على التخلص من الجلد الميت وكمان هتمنح بشرتك نعومة وإشراق وكمان هتزيد من معدل الكولاجين فى البشرة .
بشر البرتقال : وده لأنه بيحتوى على كميات كبيرة من مضادات الأكسدة اللى بتساعد فى الوقاية من التجاعيد والتخلص من سموم البشرة وتفتيحها .
الجلسرين : وده لأنه بيمنح البشرة لمعان ونعومة وكمان بيرطب البشرة لفترة طويلة وكمان هيخلص البشرة من البقع الداكنة وتشققات الجلد وده لأنه بيحتوى على نسبة عالية من المواد اللى بتلعب دور مهم فى محاربة الجراثيم والبكتريا ده غير إنه بيوحد لون البشرة .
معلقتين سكر بنى : وده مهم لإزالة خلايا الجلد الميت لاحتوائه على حمض الجليكوليك وكمان بيحفز خلايا الجلد وتنعيم الجلد ونضارته .
معلقتين حليب : وده لأنه مهم جدا ومفيد ويعتبر من المواد الاساسية لصحة البشرة ونضارتها وكمان بيساعد على ترطيب البشرة لاحتوائه على حمض اللاكتيك بالاضافة لتوحيد لون البشرة والتخلص من آثار الحبوب والبقع الداكنة والاسمرار بفعل الشمس والأجواء وده لأنه بيحتوى على الزنك .
هندلك البشرة بقطرات زيت جوز الهند مع زيت الخروع ونبتدى ندلك البشرة لمدة 5 دقايق وبعدين نجيب قطعة قماش بمية فاترة ونمسح البشرة .
بعد كده هنخلط زيت الليمون على عسل النحل على معلقة القرفة المطحونة على بشر البرتقال ونضيف عليهم معلقة ونصف جلسرين على معلقتين سكر بنى ونضيف عليهم معلقتين حليب ونلقبهم على بعض وبعد ما يصبح عندنا عجينة نفردها على البشرة ونسيبها لمدة 20 دقيقة .. وبعدين نغسل البشرة بمية فاترة .
بعد كده نجيب قطنة ونضيف عليها زيت اللوز الحلو ونضيف عليهم معلقة خل التفاح ونبتدى ندلك البشرة بحركات دائرية ولمدة ربع ساعه .
هنجيب بعد كده منديل ورق أو قطعة قماش خفيفة ونحط جواها مكعبات تلج ونبتدى نمشيها على بشرتنا حوالى ربع ساعة .
هنكررالوصفة مرتين فى الأسبوع .
مع الالتزام بواقى الشمس المناسب .. والنصايح اللى اتفقنا عليها فى البداية .. وطمنونى عليكم يا حلوين .. اشوفكم على خير .