بصراحة ما عرفت وين أحط هالموضوع هل في قسم الأناقة ولا المجلس العام
المهم أشوف بنات ملتزمات ماشاء الله عليهم لابسات العباية اللي فوق الراس مع نقاب أعتقد انه بأستيك من وراء لأنه ممكن أنزله من ويهي بدون ما أرفع النقاب لفوق مثل باقي النقابات المعروفه
أول سؤالي هاي العباية أبغي أفصل نفسها وين ممكن أفصل مثلها ممكن تدلوني قصدي أبغي خياط شاطر يعرف يفصل هالنوع من العبايات بطريقة نظيفه ومرتبة
والسؤال الثاني هذا النقاب وين أحصله عرفتوا قصدي مب النقاب التقليدي لأ اللي تقدرين تنزلينه من تحت ما أدري فهمتوا ولا
وسؤال ثالث في نقاب ما يطلع العين يعني ممكن أطلع عيني وفي نفس الوقت اذا بغيت أسكر عيني لو كنت متكحله بدون ما أنزله في منه ولا ما أدري كأني شفت منه ؟؟؟؟
فهمتوا قصدي ولا ؟؟؟
المهم أنا أبغي أغير طريقة لبسي من العباية على الكتف للعباية فوق الراس سمعت أنه اللي على الكتف ما تنفع وتحدد الجسم بس اللي على الراس ما تطيح من فوق الراس لو سهيت وتزحلقت ولا مثلا أحد داسها من وراء
ولا هالكلام غلط مو مشكلة لو لبست عباية على الكتف بس وسيعه ومب شفافه وبنقاب واسع
شو رايكم
دلوني يا حبيباتي
وممكن غير الاماراتييات يردون
بس بنات الشارجه خصيتهم بس علشان يدلوني على محل ممتاز في الشارجه وشكرا
مظلومة وايد @mthlom_oayd
محررة برونزية
يلزم عليك تسجيل الدخول أولًا لكتابة تعليق.
مشكورة يا عمري ما قصرتي والله بيوفقني في اللي فيه الخير ان شاء الله
أنا بروح السوق وبدور بس والله مافيني على الدوارة لو وحده تدلني على مكان فيه كل شي بكون شاكرة والله
أنا بروح السوق وبدور بس والله مافيني على الدوارة لو وحده تدلني على مكان فيه كل شي بكون شاكرة والله
ان شاء الله بتحصلين طلبك في محلات الحلوة في الملابلازا أو البستان عندهم عبايه واسعه زايد خمار مع نقاب او اشرحيلهم وش تبغين بيفصلون لك ..
مشكورة يالفجر تراني من سنين والله ماسرت الملابلازا وماكنت أسيرة الا علشان الحلوة هذا وتوقعت انه سكر بعد كل هالمده يعني بعده عايش خخخ المهم مشكورة يالغالية وقريب أسير له بس ان شاء الله الأسعار مب مبالغ فيها
العباه مادري وين ممكن تحصلينها , بس النقاب إللي قلتي عليه بتحصلينه عند غتالي , وهي عضوة ويانا في المنتدى ومن إماره جريبه منكم , وانا خذت منها قبل رمضان
الصفحة الأخيرة
والله أختي كان ودي أفيدج أكثر بالمحلات بس أنا مب من الإمارات
بس بغيت أشجعج على عباية الراس ترى وايد أستر
إذا لبستيها بتحسين بالفرق
وعادي في البداية يمكن تستصعبين لأنه شي يديد عليج
بس بعد فترة راح تتعودين عليها
وراح تتعودين على (موازنتها) فوق راسج بحيث إنها ما تطيح
مثل ما قلتي .. عباية الكتف تبرز ملامح الجسم
خاصة الأجزاء البارزة من الجسم :icon810:
مع إني من قبل كنت ألبس عباية كتف
بس لو الحين تقولين لي أطلع بها برة أحس كأني مب لابسة شي
مادري بالنسبة للنقاب اللي وصفتيه
جو في بالي نقابين
فيه اللثام اللي يكون قطعة تحتية بس
ومشهورين به بنات الكويت منتشر عندهم
يعني تلبسين من فوق شي يغطي الجبهة (كأنه يسمونها الأنطة؟)
ومن تحت قطعة اللثام شكلها مستطيل وفيه أستيك من فوق
وفيه نقاب نزل جديد قبل فترة
هو نقاب مثل كل النقابات
بس القطعة التحتية مثبتة مع القطعة الفوقية بأستيك
يعني ممكن تسحبينه لتحت وبعدين ترجعين ترفعينه
بس مشكلته أتوقع ممكن بعد فترة يتوسع الأستيك ويصير مب مرتب في اللبس
مادري لأني ما قد جربته بس شفته على كويتيات بعد في الحرم قبل كم سنة
بالنسبة للنقاب اللي ما يطلع العين
إما تركبين في النقاب غشوة ... طبقة أو طبقتين
بحيث إذا بغيتي تشوفين ترفعين الغشوة
وإذا بغيتي تسترين عينج تنزلين الغشوة
أو تكونين شاطرة في لبس النقاب
وتخلينه ضيق كلش ما يبين شي
وهذه طريقتي
بس لازم أول أضوق التقاب
يعني أشتري نقاب عادي من السوق
بعدين أجيب ابرة وخيط
وأحط لي كمن غرزة في النص .. يصير النقاب كأنه برقع (أبو خيط في النص) بس ضيق
بعدين أزيد التسكير من الجانبين
إذا جيت ألبس النقاب
أنا أشوف كل شي
بس ما يبين ولا شي من عيوني
حتى الناس ما يتوقعوني أشوف!
بالنسبة للدوس من وراء
لازم الخياط يضبط لج الطول عشان ما تتخرطفين منها!
يعني لازم تخلينها بالضبط على قد طولج
لا طويلة ولا قصيرة
إذا قصيرة تطلع تفشل وتبين اللي تحتها
وإذا طويلة بتتوهقين لازم ترفعينها عشان ما تدوسين عليها
الله يوفقج ويثبتج ويزيدج من فضله