كيفكم اخواتي الغاليات ان شاء الله تكونوا بخير
من زمان ما نزلت طبخات جديدة وبعد غيبة طويلة جيت وجبت معي البنية وهي من اطيب الاكلات الفلسطينية وشخصيا بحبها كثير
اول شي بنسلق اللحمة مع المطيبات(حب هيل وقرتفل وورق غار وبصل)
بنخليها بس تغلي وتطلع الزفرة تغلي وبعدها بنكب المي عنها وبنغسلها مرة ثانية وبنخليها تستوي نص استوا في المي وبعدها بنضيف عليها اللبن والمكون من لبن رايب (وهو شغل ايدي)
ولبن جميد او الكشك
بنكسر الجميد لكسرات صغيرة وببنقعه في مية سخنه علشان يصير طري ونقدر نخلطه في الماكينة
وبعدها بنخلط الاثنين في البلندر ممكن لو عملتوه في اللبن الرايب لحاله تضيفوله ملعقة نشا على اساس يظل متماسك
وهيك شكلهم بعد الخلاط
وبنضيفهم على اللحمة النصف مستوية وعليها تقريبا اقل من نصفها مي علشان تكمل الاستوا مع اللبن وبتحركهم بس يغلوا وبنوطي تحتهم
وفي هذه الاثناء بنقطع الزهرة لزهرات صغيرة وبنقليها في زيت غزير وحامي بس علشان تاخذ اللون الذهبي الغامق
بعد القلي
وبعد ما تستوي اللحمة بنضيف الزهرة الي قليناها من قبل وبنخليها تغلي مع اللبن واللحمة مدة 10 دقائق الى ربع ساعة واخر شي بنزيد الملح والكركم عليه للون
وبعدها اخر شي وهو اختياري لكن انا دائما لجميع طبخات اللبن بضيفله الثوم المدقوق والمقلي باستثناء المنسف ما بضيفله
يتبع..........
اول شي بنقلي الشعيرية (انا دائما لما اشتري الشعيرية بحطها فيصينية كبيرة وبحمصها في الفرن وبخليها في مرطبان نظيف ومغطى لوقت الاستعمال) وسن ثومه
وبعدها بنضيف الارز المنقوع والمغسول وبنحمصه شوي في الزيت وبنضيفله الملح
وبنزيد عليه مية سخنه بمعدل ما يغطي الارز بشوية وبنخليه بس يغلي بنغطيه وبنوطي تحته بس يستوي ويتنشف السطح
وهذا الشكل النهائي للطبخة ان شاء الله تعجبكم
وصحتين وعافية والي حابة تنقل الموضوع ولا يهمها حلال عليها صدقة جارية ما بدي من وراها الا الفائدة