لتجاعيد اليدين وتجاعيد مفاصل الاصابع حل أكيد بإذن اللــه

السلام عليكم ورحمة الله وبركاته ..

اول شي كل عام وانتو بخير يابنات وينعاد عليكم بالخير والسرور ان شالله ..

ثاني شي انا دايما اقرا في المنتدى بنات يشتكون من تجعدات اليدين والاصابع ومايلقون حل اكيد بس اليوم ان شالله جبت لكم حل اكيد من خبيرة تجميل شفتها بالتلفزيون وكم وحدة سألوها عن هالموضوع بالذات وقالت لهم على خلطة وانها ممتازة ومجربة بس ابيكم تدعون لي بكرة في يوم عرفة لا تنسوني من دعاكم ..

يالله جيبو ورقة وقلم واكتبوا المطلوب ..
موزة مستوية ومهروسة جيدا من غير القشرة طبعا ..
ملعقة اكل نشا..
ملعقة اكل لبن كامل الدسم او حليب ..
زيت قرفة ماحددت مقدار زيت القرفة بس مااتوقع انه يزيد عن الملعقة ..
تهرس الموزة المستوية زين وتخلط مع باقي المكونات جيدا لحد مايتكون عندك عجينة تفردينها على اليدين بعد ماتكونين منظفتها ومقشرتها بأي صنفرة عشان تستجيب للماسك بشكل اكبر .. وتتركينها لمدة ساعة كاملة .. تقدرين تلبسين فوقها قلفز بلاستيك اذا حبيتي عشان تكملين شغلك عادي .. بعد الساعة تغسلين الماسك مع الفرك الخفيف جدا وتدهنين ايديك بالكريم المرطب ..
ومع الاستمرار بتلاحظين الفرق ان شالله ..
وقالت أيضا ان الزبدة مفيدة جدا جدا كماسك للايدين تنعم وتطري وتؤخر مظهر التجاعيد ..
وحبيت اضيف شي يابنات لا تغسلون ايديكم الا بصابون كريمي ناعم عشان ماتجف وتزيد الطين بلة وابعدوا عن الصوابين القوية اللي تجفف وتفاقم المشكلة ..

وفيه خلطة مقوية للأظافر جت في نفس حلقة العناية باليدين .. وهي مقدار من زيت الزيتون مع زيت لانولين من الصيدلية ونصف ليمونة تخلط مع بعضها جيدا وتغمس فيها الاضافر لمدة ربع ساعة .. هذي تقوى الاظافر وتحميها من التكسر والتشقق وتحسن لونها ..

يالله يابنات ان شالله تستفيدون من الموضوع ولي طلب عندكم.. كل بنت تقرا موضوعي ابغاها تدعي لي بكرة في يوم عرفة ان الله ييسر لي كل اموري المتعسرة ويحقق لي كل اللي بالي عاجلا غير اجل .. طلبتكم يابنات ووصيتكم لا تردوني انا محتاجة للدعوات الزينة والله يوفقكم ..