أنا راح أشارك بالموضوع من وجهة نظري وواقع تجربه عمليه عشتها بعد ما أخذت دبلوم الحاسب ودخول الحاسب للمدارس الابتدائيه عن طريق معاهد خاصه عينت بمدرسه ابتدائيه ورحت المدرسه من أول يوم صعقت تخيلوا جميع المعلمات الله يعطيهم العافيه كبيرات وكلهم اللي زوجت بنتها بعد الجامعه واللي تدور لإبنها المدرس والأنكى والأطم لأن المدرسه مبنى مستأجر يعني الدرج متعب كم وحده منهم ما يجوا الدوام حتى يروحوا يضربوا أبر الروماتيزم وشوفوا معاناتي بتدريسهم الحاسب فيه منهم متجاوبين لكن الأغلبيه ما طلعوا من الدوره إلا بشيء بسيط ولما يشوفوني أحاول اعيد لهم وأكرر يقولون لي بالك ماشاء الله طويا ترى إحنا خلاص ما عاد فينا رجاء مع العلم والله الشاهد إن طرق تدريسهم ميه ميه علشان الخبره ما أحد يختلف عليها لكن كلهم يولون ويقولون ليت التقاعد 20 سنه مدانا استرحنا تخيلوا يا بنات مدرسه فيها 25 معلمه واداريه كلهم يعتبرون من كبار السن ما ني لاقيه لفظ مهذب أحسن من ذا لأن تعاملهم معي كان جدا رائع لأنهم يقولون انتي زي بناتنا مافيهم إلا وحده أو ثنتين لسى شوي عليهم وكلهم خريجات دبلوم معهد المعلمات ويحكوني عن بداية ما بدؤوا يدرسوا والله يقولوا الفصول ما كان فيها كراسي وطاولات كانت مفروشه بالحصير ما أدري تعرفوه وإلا لا لأني ما عرفته إلا من أمي يعني تخيلوا من متى يدرسوا الخلاصه ما كان مسليني إلا معلمة المقصف كانت من عمري وكنت دايما عندها وبالأخير زعلوا مني يقولون ليه يا معلمتنا ما تجلسي معانا مع إنه لما يتكلموا في موضوع تربوي أحس اني أخذت منهم خبره كثيره لكن معظم الوقت يتكلموا عن عرايس أولادهم أو جهاز بناتهم والمديره والله يا بنات من كبرها صايره على نيتها بشكل ما أحد يتوقعه تعبتني وتعبت معاها لكن دايما أذكرهم بالخير لأني بصراحه ما لقيت عندهم المشاكل اللي تحصل في مجتمعات المعلمات الشابات والغيره والنميمه وغيره عموما ما أمدح نفسي سووا لي بطاقة شكر وأرسلوا للرئاسه يثنوا على المعهد لأنهم عينوني وأرسلوا للمعهد يطالبوا إني دايما أكون عندهم لأني وبكل صراحه كنت أراعي الأمانه في كل شيء لكن عارفين اش كانت النهايه رفضت مديرة المعهد الترم اللي بعده تتعاقد معايه عارفين ليش لأنها خريجة ثانوي وأنا جامعيه وهيه ما هي سعوديه وأنا بكل فخر بنت البلد فخافت تطير من كرسيها علشاني قالت لي ما عندنا شاغر مع إن المدرسه قعدت كل الترم ما فيها معلمة حاسب وسحبوا عقدهم من المعهد اش رأيكم ترى علي حظ من القراده يفلق الصخر ولكن ما زلت حتى أموت أحسن الظن بخالقي ورازقي
عموما أباحكي لكم موقف طريف في هذه الإجازه الموقره حضرت من قرادتي زواج وكان فيه وحده في سن جدتي الله يطول بعمرها في الطاوله اللي قدامي طول الوقت وهي ما غير تناظر فيني قلت يا بنت يا شموخ أخيرا جاء العريس :icon28: خليك رزه وأصب القهوه بنعومه وأرفع صوتي الناعم لأمي وأقول انا ما أشرب القهوه وأتميلح زياده عن اللزوم فجأة طبت علي وحده من المدرسات اللي درستهم وهاك يا تبويس وقبلات حاره وفجأه شافت الجده اللي كانت تطالع فيني ترى ميب جدتي بس من الاحترام وقالت يا عمه عارفه هذي مين هذي معلمتي لو تشوفون الجده كيف كانت تناظر فيني وفيها وبعدين حلفت لها قالت والله هذي معلمتي ما أشوف إلا الجده حركت كرسيها وأعطتني ظهرها وراحت تناظر لوحده ثانيه وضاع الحلم المنتظر :D

رأي ان المعلمة اللى وصلت لسن تقاعد من الأفضل انها تتقاعد وتعطي فرصه لغيرها من البنات اللى هالايام قاعدين في البيت بطالي
انا عندي زميلتي في الابتدائي لها تقريبا 26 سنه تدرس حتى اصبح ماعندها قدره على الكتابه بشكل صحيح لدرجة انها تكتب بخط ثاني ابتدائي وعصبها تعبان الله يشفيها ويرفع عنها وجميع المسلمين
سألتها ليش ماتتقاعدين وتريحين نفسك
قالت اتقاعد وش اسوي في البيت اداوم اتسلى احسلي يعني تداوم عشان تتسلى والبنات مساكين لاتسليه ولاراتب الله يهديهم المعلمات الكبار ويقعدن في البيت ويعطيهم الله العافيه
ويرتحون في بتهم بدل العمر كله ينقضي واحنا واياهم في شغل وحرق اعصاب

الاخت "شموخ الأمل" يعطيك العافيه على المرور
بس عن جد على قد ماعورتي قلبي على القصه اللي ذكرتيها
ضحكتيني بموقفك من حلمك بالمعرس
الله يرزقك يارب بالوظيفه والمعرس عاجلا غير آجل........


الاخت العزيزه" نور الحب" أشكرك عالمرور....
وماأقول اللا "حسبي الله ونعم الوكيل" ياليت قرار التقاعد الاجباري ينفذ بالقريب العاجل

هالحين من اللي قال لكم إن المعلمة القديمة ماتتمنى التقاعد؟؟؟
من قال لكم انها ماتحلم وتبغى تتقاعد؟؟؟

لاتتكلمون عن امور ماتعرفونها .. ولالكم علاقة فيها لامن قريب ولامن بعيد
فما ادراكم انتم عن القرارات والتعاميم التي تقف حجر عثرة في تقاعد المعلمة؟؟

فوالله انا اعرف الكثير الكثير من المعلمات وصلن سن التقاعد
وطلبن بكل مايستطعن الاحالة الى التقاعد ..
لكن العراقيل كثيرة امامهن..

فمثلا عندنا في المدرسة معلمة وصلت التقاعد
وطلبت انها تتقاعد ولكنهم امهلوها حتى تعوض ماأخذته من اجازات
خلال سنوات عملها بالتدريس .
والله لها الآن ثلاث سنوات ماجاها التقاعد ..
وهي متضايقة جدا وماتدري متى تنتهي معاناتها؟؟؟

ومعلمة ثانية تقول : مافيه واسطة الا كلمتها ومافيه خطاب الا ورفعته
ابغى التقاعد .. لكن حتى الان ماجاني شيء..

وقبل ايام بس جانا تعميم يقول يمنع تقديم طلبات التقاعد إلا مع بداية كل عام دراسي فقط
ولاينظر لما سوى ذلك ..
ولاتنقطع المعلمة عن العمل حتى تتم الموافقة على التقاعد..

يعني انتم تتهمون المعلمات بالتشبث بالوظيفة
وتصفونها بالطمع والتمسك بالمركز
وتنعتونها بالقدم والجمود؟؟؟
وهي مالها دخل بكل هذا؟؟

اذا عندكن كلام وجهوه لادارة التعليم مو للمعلمات المسكينات
اللي حالهن أردى من حالكن.. فهن ملن وتعبن وزهقن من الوظيفة
ويطلبن الراحة بعد هالعمر والعطاء..

ردا على الخت شموخ الامل بقولها أن معلمات الابتدائي كبيرات جدا جدا في السن:
اقول لها: في كلامك مبالغة جدا جدا .. فاغلب مدارسنا الان معلمات الابيتدائي شابات اللهم إلا واحدة فقط..
يعني مو كل المعلمات كبيرات جدا في السن..
والله انه في مدرستنا معلمتين ابتدائي لم يتزوجن بعد..
والباقي تتراوح اعمار ابناؤهم الكبار مابين العاشرة والتاسعة فقط..
وهذا ليس في مدرستي فقط..
بل اغلب مااعرفه من المدارس الابتدائية ..