لحياة اسرية سعيدة للمتزوجات والمقبلات على الزواج

السلام عليكم ورحمة الله وبركاته

في الحقيقة مو عادتي انزل مواضيع بس حبيت انزل موضوع للمتزوجات عامة والمقبلات على الزواج خاصة وعلى اسم القسم حياة اسرية سعيدة بعيدا عن المشاكل باذن الله

اولا ؛ اجعلي حياتك الزوجية طاعة لرب العالمين : بمعنى اي شي تسويه احتسبي فيه الاجر عند الله وان شاءالله ربنا ما يضيع تعب لعباده . يعني لا تقولي اوف البيت كله عليا محد يساعدني وووو,,, لا تنسي اختي حبيبتي انو زوجك بتعب اكثر منك عشان يعيشك معززه مكرمه

ثانيا : اجعلي منزلك جنتك:26: : اهتمي في نظافته وريحته وغرفة النوم يوميا تنظيفها لأنها المكان اللي ترتاحي فيه بعد يوم مليء بالتعب والله يكرمكم الحمام اللي تستخدميه يوميا لازم يتنضف وتخلي ريحته معطره تفوح طول اليوم ( استخدم الكور ماعرف اسمها بس تخلي ريحة الحمام نضيف و غير يكون ملطف جو بعد كل استعمال ارش رشه وتستمر الريحة ) >> النظافة لوحدها من الايمان غير انها تعكس على النفس الراحة والسعادة

ثالثا : كوني صبورة : تصادفنا احيان مع تعب الشغل بالبيت التوتر وما نبغى احد يمزح معانا ولا يعصب علينا
بس نصيحتي الصبر الصبر الصبر كوني حليمة لا تقولوا الرجال ما خلو فينا صبر والله ثم والله ما اصبر منا غير الرجال ولا كانت العصمة بيدنا احنا الحريم .. الرجال اذا عصب تعرفي انك انتي السبب لا تقولي ما سويت شي ممكن تكوني غلطتي عليه من دون قصد بالليل ويجي تاني يوم النهار معصب من الدوام ويحط الحره فيكي وانتي تقولي ما سويتله شي
في كل الحالتين اتحملي تفتحي فمك وتقولي انا تعبانه وانت جيت تكمل عليا خطأ خليه يخاصم لحاله الا اذا قالك ليش ساكته اتكلمي وهوا معصب قوليله حقك علي روح ريح وغير ... واذا ما طلبك تتكلمي استنيه لين يروق خلصي شغلك و خديلك شاور و البسي شي حلو وروحي اتسامحي منو حتى لو ما رد صدقيني بيرجع يكلمك ويقولك سبب زعله كمان ,

رابعا : حياتك الزوجية ملكك لوحدك : يعني زوجك اسعدك الحمدلله نعمه من ربي اشكريه ومافي داعي تحكي بالتفاصيل عن كل شي مو عشان حسد او غيره القصد ( زوجي جابلي الخاتم الفلاني .و غيرو من الهدايا ... زوجي اليوم قالي انتي شكلك ,,,, اي نوع من المجاملات ) اعرف بتقولوا ما فيها شي صح لاهي حرام ولاهي عيب بس ممكن تتكلمي في حضور ناس مو متزوجين ناس حالتهم الماديه على قدهم ناس مو ملاقين السعاده فكدا تجرحيهم . هذا شي
والشي الثاني علاقتكم ع السرير محد يدري فيها كثير عاقلين مشاءالله بس ممكن وحده تكون دوبها متزوجه يجو يقولوا لها ها ايش صار تقوم تفرط من الاول للاخير هذا غلط .
والشي الثالث والاهم لا قدر الله صار بينك وبين زوجك سوء تفاهم او غلط عليك او او او انتبهي تدخلي اهلك في الموضوع او تشتكيه لأهله حلي مشكلتك بينك وبينه ومن دون اي تدخلات خارجية. السبب بتكبر المشكلة لو دخل فيها طرف ثالث اهلك ممكن يزعلوا عليكي وقولي له كذا وترى وراكي ظهر ويتصل الاب وايش سويت لبنتي واذا واذا وممكن توصل للطــ برى وبعيد .. والاخوات اللي يكتبو مشاكلهم ( لا تنطوا وتقولوا مالك صلاح ولا انا جالسة انصح عامة و كلا يعيش على هواه ) نكمل ,, لما تكتب موضوع من باب فضفضة وممكن تلاقي رد يعجبها وممكن لا واللي يعجبها ممكن تنفدوا كمثال وحده تقول زوجها مثلا زعلان منها وتبغى تراضيه, ترد وحده من باب المساعده تقول طنشيه بيرجع يكلمك لأنها جربت مع زوجها دا الحل ونفع معاه بس انتي تجي تجربيه ممكن زوجك ما يحب الطناش ويكبر الفراغ بينكم عرفتوا كيف وغيره فا كل وحده تحل مشكلتها بنفسها مبنيه على شخصيتها وشخصية زوجها محد ادرى بحلها غير ربك سبحانه ثم انتي.

خامسا: اذا كان عندكم عيال حذااااااااري تصير مشاكلك انتي وزوجك قدامهم والسبب انو ممكن يتعبو نفسيا ما يقدرو يذاكرو ولا يحل واجباتهم والامر ممكن ينقلو اللي يصير بالبيت لاصحابهم جيرانهم وغيرو

سادسا : الفلوس :: موضوع حساس جدا عند الرجال كل رجال وله ميزانيته وممكن البعض ما يقول راتبه عشان لا تحسبو لهم كم باقي من الشهر وغيره شوفي اختي حبيتي لما تقولي طلبت زوجي وما عطاني وزعلتي وسويتي قضيه تتوقعي هوا بيفرح لما تزعلي بيضايق اكثر ويعصب لييييش ؟ لأنو بيحس انو قصر عليكي ومو قادر يعطيكي فكدا تحسسيه بنقص واذا زوجك من النوع الصريح واذا انزنق قالك والله يا فلانه الشهر دا ما يعلم بي الا ربي انتي هنا دورك اعمليله جدول خلال دا الشهر بحيث ما يحس بالنقص قضي للبيت الازم للشهر وبس من غير زياده ولو تقدري تستغني عن حاجات لوقت ثاني افضل لين ربك يفرجها .

سابعا: الاسرار والخصوصيات بين الزوجين : في ازواج ما يخلو بينهم اسرار زي رقم جوال اي باد وغيره من الكترونيات ومن حياته مع اصحابه و مع اهله و في رجال ما يحبو يخلو زوجتهم تعرف كل شي لا تقولو عندو شي بس خلاص دا طبع فيه مو واجب عليه يعطيكي كل شي فلا تجي يوم تقولي اعطيني رقم جوالك فجأة كدا تحسسيه انك شاكه او شي ممكن لو فيكي فضول مره خليكي ذكيه وخدي اللي تبغيه بطريقتك من دون فضايح وزعل وعوار راس

ثامنا : لكل ام بعد ما ولدت لا تخلي زوجك رقم اتنين خليه زي ما كان رقم 1 واهتمي في نفسك زي ما كنتي قبل الحمل عشان لا يحس بالفرق ولا يحس انو الطفل اخدك منه وبكدا ان شاءالله تضمني تعيشي حياة سعيدة باذن الله

واخيرا اجعلي حياتك مليئة بطاعة الرحمن واكثري من ذكره والدعاء وربي راح يطرحلك البركه في البيت والزوج والعيال

بقلمي

اذا احد حابب ينقل الموضوع للفائده ما عندي مانع بس ذوقيا ياريت يكتب من وين اتنقل

اختكم في الله

استودعتكم الله