لذة الفجر في وقتها!!
---------------------
اخواتي اكتشفت لذة يعجز والله اللسان عن وصفها الا وهي لذة صلاة الفجر في وقتها ..
اسمحوا لي اطرح موضوعي باللغة العاميه لاني ما احب افرد عضلات المفردات الفصحى واضيع عن مغزى موضوعي..
يا حبيباتي الكل مننا له حياة في الصباح الموظف والطالب ,, هل سبق لنا ولو يوم واحد قلنا بننام الليله وماعندنا استعداد نوقت الساعه او المنبه واننا خلاص راح ننام الليله والدوامات نخليها على الله اذا قمنا كان بها واذا ماقمنا لاحقين خير ؟؟!!
لا والله مانسويها تلاقي الساعه على الطاوله في اخر الغرفه والمنبه حق الجوال تحت الوساده ونخليه على الوضع الهزاز عشان نحس واذا مرره مخربينها سهر نوصي احد سهران ماوراه شي نقول تكفون لاتنسوننا يروح علينا الدوام ..
تعالوا معي نتعاهد ,, خلاص ماراح نطنش ولا يوم دوام لكن تعالوا في المقابل يوم واحد نوقت الساعه قبل الدوام بثلاث ساعات او ساعتين ليش ؟؟ نوقتها على وقت صلاة الفجر ,, الله يغفرلنا اهمالنا فيها ..
يوم كذا بيننا وبين نفسنا نحط منبه الجوال على وقت صلاة الفجر ,, وأول مايدق المنبه بدون غفوه او غيره نوقف المنبه ونقوم من الفراش مالازم نفكر او نراجع نفسنا او نقول اووووووه الغرفه باااارده ..
قوموا ,, عين مفتحه والثانيه مسكره ,, مايهم
قوموا ,, ظهرك منحني مو قادر تحمل حالك ،، مايهم
المهم تقوموا ,, والاهم لاتشاورون حالكم وتاخذون رايها
اقسم بالله وراح تقولون صدقتي انه لما الواحد فينا يتوضى ويصلى على السجاده والله ان السجود طعمه غير لما تنزل بجسمك تعبان وفيك نوم وتسجد لله وتسبح في سجودك وتطوووول عشان فيك نوووووم وتبغى تريح بالسجده ,, اقسم بالله انها لذه مابعدها لذه ..
وبعد التسليمه تدور الفراش وفيه بنات تطيح الوحده على فراشها وهي لابسه شرشف الصلاة خصوصي اذا كانت سهرانه..
وابغى اضيف نقطه للي بعده ماتحمس ,, بالله عليكم مش الاغلبيه فينا لو قام الصبح للدوام قال يوووه بنام ربع ساعه بعد ولا يقول اتركوني اريح شوي؟؟
طيب تخيل انت صليت ولا انتي صليتي وناظرتوا للساعه ولقيتوا باقي ساعتين على وقت الدوام ياسلااااااااااام احلى ساعتين بالاربع وعشرين (:
على طول على الفراش وهااااااات يانووووووم ,,ولا انتم ايش رايكم ؟؟
جربوها يا حبيباتي, وانا اشد على نفسي في هالموضوع قبلكم لاني ممكن اكون اكثر من فرط فيها بس والله لو صليت الفجر في وقتها ابقى طول اليوم
راضيه عن حالي واحس فيه انشراح بصدري لما افكر بيني وبين نفسي اتذكر انه صلاة الفجر الي قمت لها من لذة النوم وطلعت لذتها الذ واعظم..
و الله احبكم واتمنى تفكرون بالموضوع ,, اعطوه دقيقتين من وقتكم الكريم ,, وجربوا
الله يرزقنا الإخلاص والصدق والمحافظة على اداء الصلوات بأوقاتها