لست هكذا بل هم جعلوني حزينه

اسأل الله العظيم ان يرزقك الزوج الصالح التقي الكريم الذي يسعدك
ويقر عينك منه بذريه صالحه معافاه

اختي صح هذي نظرة المجتمع ولاتتغير سوآء تزوجتي ولالا لان لو ماتزوجتي تكلموا وقالوا ليش ماتزوجت وصاروا يحللون من انفسهم انك كبيرة سمينة او نحيفة مو حلوة او اي عيب ثاني واذا تزوجتي ماحملت ماتجيب الا بنات الخ من الكلام اللي مايجيب الا الغثا والمرض ولو تتابعين الناس بتتعبين !
مشكلتنا حنا بنات الثلاثينات والاربعينات بالاخص لان اللي بالعشرين مااعتبرها متاخره بوقتنا بالعكس لسه بدري المتاخرات من الثلاثين وطالع بصراحة !
تعرفين ايش مشكلتنا ان الناس يتوقعون انك ماتزوجتي لانك فيك عيوب الدنيا وان بناتهم تزوجوا لانهم حلوين ومطلوبين وبعد مايقصرون في الكلام اللي يجرحك ويخليك تبكين من القهر ومثل ماقلتي اولادهم يخبونهم عنك ولو قلتي شيء عن اعيالهم فهموها انك حاسدتهم ومقهوره منهم و حتى حياتهم مايتكلمون عنها لابخير ولاشر خايفين من العين اخواتهم اذا انخطبوا تسمعين من الجيران والبعيد وهم مايعلمونك حتى اشياء عادية مايقولونها خايفين منك واذا صار لهم شيء على طول انتي بوجه المدفع انتي الحسوده اللي عطيتيهم عين ليش لانك ماتزوجتي بصراحة ظالمين البنات الغير متزوجات اللي البعض يطلق علينا عانسات ظلم كبير يعني مو شرط اللي ماتزوجت حاسدتك انا اشوف بالنسبة لي اللي الناس اللي اعرفهم متزوجات هم اللي يحسدون بعض لان هذي زوجها احسن من ذي او راتبه الخ او هذي حامل وذي ميته تبي اعيال مع انها عندها اعيال الخ
انا والله مثلك انظلمت بكلام كثير يجرحك يعني تجيك وحده مثلاً تقول مابقى احد بالعايلة ماتزوج خلصنا!!!!! طيب وانا ايش!
ولا تجيك وحده ثانية تجيب لك واحد فيه علل الدنيا كلها تقول اخذيه احسن من جلستك كذا وبكره انتي عدليه!!!!
او يجيك ناس يغثونك بالكلام والهمز واللمز !
بعضهم مرضى نفسيين الله لايبلانا ماخذين اللي ماتزوجت مسوية جرم عظيم لايغتفر وكأن هالشيء بيدها هذا نصيب ورزق من رب العالمين مو كلن ياخذه في ناس ترزق بالمال او الوظيفة او ترزق بالاولاد او ترزق بالحب من الناس وفيه ناس عندها بعضهم وفيه ناس ولاشيء ليش لانه رزق والرزق مو كلن يحصل عليه !!!!
بس فيه شيء بعد ان ماتموت اي نفس الا مستوفية رزقها ومااحد يدري ايش مخبي له القدر سبحان الله يغير من حال الى حال افضل احنا يبي لنا نحسن ظنا بالله والله مايخيب ظن عبده فيه !
اذا احد قال ماراح نتزوج نقول لا حتى لو بين انفسنا ونردد في انفسنا ان ربي يارب بيرزقنا بزوج واحسن زوج بعد وحنا واثقين بالله !
لازم مانحطم انفسنا اناوالله تمر علي لحظات ضعف والشيطان اعوذ بالله منه يزيد هالواساوس الكل يرمي عليك كلام من الناس اللي تقول امك ربطتيها فيك ماتقدر تروح مكان وتتركك في البيت لحالك واللي تقول لاتزعجين امك واللي امك محتاجة ترتاح وترفه على نفسها وانتي كلا منك مانعتها من هالاشياء الخ !!!! طيب انا شسوي اذا مااحد يتقدم لي اصلاً مااحد يفكر فيني شسوي طيب علموني والله صدق مااكذب عليكم اني اجلس ابكي من القهر اللي يقولونه مااحد يقدر يتحمله !
الوالده الله يحفظها يارب ويطول بعمرها ويكفيها كل شر ويطول بعمر امهاتكم وامهات المسلمين جميعاً ويحفظهم ماعمرها رمت علي كلمه حتى وانا اشوف وجهها متغير وتحاتيني اني ماتزوجت وان مااحد يتقدم لي بس ماتجرح بالكلام ابداً على اني اشوف صدرها ضايق علي حالها حال اي ام عندها بنات ماتزوجوا وكبار بالعمر !
طيب ليش تتدخلون بيني وبين امي وتبون تخربون علاقاتنا ببعض وتذكرونها كل شوي اني ماتزوجت واني هم مايحتمل وان هي اللي مانعتك من كثير اشياء تسوينها يعني وصل الحسد لهالدرجة يعني يبون اهلنا مثلاً يرمونا بالشارع حتى يرضون !
خليها على الله بس والله لو تكلمتي من هنا الى عشر سنوات قدام ماراح تخلصين الناس مايتغيرون ويحبون الكلام اللي طالع ونازل واللي لايودي ولايجيب تطفل ولقافة !
همنا حنا العانسات واحد ومايعلم فيه الا الله ودنا بزوج واولاد يكونون لنا عزوه لما تكبرين بالسن والكل مشغول ولاهي بحياته عنك
بس هالشيء مو بعيد على رب العالمين ولا صعب اللي رزق غيرنا باذنه تعالى بيرزقنا وبنتزوج ونتوفق في حياتنا مع احسن الازواج واخيرهم ديناً وخلقاً وخُلقاً
الله يارب بيوم الاثنين الفضيل اللي ترفع فيه الاعمال ترزقنا يارب بالازواج الصالحين التقيين النقيين الغنيين اللي تقر به اعيننا ويقر بنا اعينهم وترزقنا منهم بالذرية الصالحة الطيبة يارب اللهم آمين ولجميع بنات المسلمين
اللهم لاتدع لنا حاجة الا قضيتها ولاهماً الا فرجته ولا ديناً الا قضيته اللهم اننا صبرنا وانت سبحانك بشرت الصابرين اللهم ان نستودعك حياتنا جميعها فاااكتب لنا فيها كل خير واكفنا يارب وجميع عائلتنا شرور الدنيا ومصائبها اللهم آمين
اختي فضفضتنا جميعنا وحده وهدفنا واحد وباذن الله يتحقق

الله يصلح حالك وحال كل مهموم لكن حاولي تعيشين حياتك وما تلتفتين لكلام احد لانه لو التفتي لكلامهم بتزيد همومك وحتى لو تزوجتي لا تستبعدين ابدا انه كلام الناس يبي يلاحقك كلامهم ما له حل الا عدم الاهتمام له ولو اهتميتي بتدفنين نفسك وانتي حيه والله يهدي ابوك ويحنن قلبه عليك واقترح عليك انك تبحثين عن صديقات جديدات لين تلقين وممكن مثلا تسجلين بالتحفيظ او تدورين وظيفه او ممكن مثلا اذا كان عندك امكانيه مثلا عندك خبره بشي زي الطبخ مثلا انه تفتحين حساب بالانستقرام وتبيعين

او مو شرط طبخ اذا عندك خبره بالحلويات مثلا سوي وبيعي