لعشاق الأكلات الجديده أجمل أكله مكسيكيه أكلتها في أمريكا وبالأسرار

هلا وغلا بكل الي دخلوا ... ماراح اطول عليكم بقولكم السالفه من الاوووووول


هذا الله يسلمكم انا ادرس بامريكا ..الله يرجعنا لأهلنا بالسلامه يارب ..وينولنا الي نبيه ..

المهم مثلكم عارف امريكا خاصه تذوقين فيها كل انوااااااااااااااااااااااع الأكل العالمي ..لأن كل الجنسيات موجوده هنا ..

وغالبا جنسيات كثير تفتح مطاعم ..


انا سويت مشروع الذواقه خخخخخخخ دخلت كل انواع المطاعم هنا .. الهندي والعربي والياباني والصيني والمكسيكي والايطالي ووووو

وبصراحه اكثر اكل عجبني المكسيكي ..مادري ليه ..لأن أكلهم قريب من مكوناتنا .. على فكره هالشعب أحس انهم عرب ..

اشكالهم وثقافتهم قريبه مرررره مننا .. المهم ماطول عليكم .. رحت أكثر من مطعم مكسيكي ..


لكن في واحد (ابدااااااااااااااااااااااااااع) اكلهم غير شكل ..

ذقت عندهم طبق اسمه (لوكو ) ..بغيت اصيح في المطعم من حلاوته ... يهبببببل مع اني اول ماشفته حسيت

شلون هالأشياء مع بعض ..


وصرت كل اسبوع اكل عندهم ... واعزم صديقاتي على هالطبق .. او نطلع انا وزوجي وناكل عندهم .. والله صارت الموظفه بس تشوفني تضحك وتقولي طلبك بيكون جاهز ...


اخر مره ..سألتها قلت لها قوليلي شلون تسوون هالطبق .. قالت تعالي معاي المطبخ واوريك الشيف شلون
يسويه .. انا حسبت انها تاخذني على قد عقلي .. الا ولله البنت دخلتني المطبخ .. وكتبت لكم كل المكونات

وعطيته اهلي وسويته في البيت طلع نفسسسسسسسسه .. قلت والله ماابخل عليكم خليكم تكشخون

بأكله جديده .. تصلح غدا او عشا ...


ادري طولت عليكم بس ذابحني الحماس ... وهذي هي طريقة اللوكو


طبعا راح اقول المقادير مع الطريقه


1- تسلقين كوب رز ابيض مع قطعة زبده وبهارات وملح وبقدونس ..


2- تتبلين صدرين دجاج بـ( ملعقتين زبادي- نص ليمونه - بهارات - ملعقة زيت زيتون -ثوم -سبايسي ) تقطعين الدجاج مكعبات وتتركينه يتبل لمدة ساعه ونصف الى ساعتين بعدين تحطينه في صينيه وتشوينه في الفرن لحد ما ينضج ..


3- جهزي (خس مقطع مكعبات - طماطم مكعبات - فاصوليا حمرا - بقدونس مفروم - جبنه كرفت مبشوره )

4- الصوص .. وهنا اللعبه كل الطعم بالصوص ... ( زيت زيتون - ملعقتين صوص سيزر سلت - ملعقتين صوص فرنسي-ملعقة خل ابيض - نص ليمون -ملح - ملعقتين مايونيز - ملعقة زبادي )




الحين كل شي جاهز جيبي صحن يكون مجوف شوي



اول طبقه حطي الرز المبهر .. بعدين حطي الدجاج بعدين حطي الطماطم والفاصوليا الحمرا والبقدونس بعدين حطي الخس اخر شي حطي الجبنه المبشوره ودخلي الصحن في المايكرويف لحد ماتذوب الجبنه


والصوص حطيه على جنب مع الصحن الرئيسي ... أنا احط الصوص قبل الجبنه يطلع شي ماااااااااحصل




والف صحه وعاااااافيه عليكم ... بنات بليز ادعولي ان الله ييسر اموري ويهون علي الغربه وارجع لاهلي سالمه غانمه


والي تجرب هالأكله تقولنا رأيها



فمان الله