السلام عليكم ورحمة الله وبركاته
هاي الاكلة مهداة الى عشاق الفول الاخضر متلي يعني هههههههه
بما انه هلا موسم الفول الاخضر او بالاحرى اخر موسم الفول الاخضر
وبما اني من عشاقه وبعمله باكتر من طريقة قلت انزل لكم اليوم الفول الاخضر بالزيت
وهي طبخة خفيفة لطيفة ما بتحتاج شغل كتير لكن الطعم يمي يممممممممممممممي يجنن
قبل ما نبدى بالمقادير والطريقة في عندي شوية ملاحظات>>>> بدت الفلسفة :27:
اول شي الفول الاخضر اشتريه ببداية موسمه بكون طري ولزيز لانه في نهاية الموسم
بصير مخشب وقاسي ومو طيب عالطبخ انا استنيت كتير ومش كاينين ينزلوا هالفول
السنة وما شفته الا من قريب ولما شريته لقيته شوي قاسي
لما تكون حبة الفول كبيرة وقاسية كتير الافضل انك تقشريها وتاخدي الحبوب
منها فقط اما الحبات الطرية بنخلي قشرة الفول لانها روعة
انا بجيب كمية كبيرة وبقطعها وبغسلها وبفرزها على طبخات لوقت الحاجة طبعا انت
لما تشتري الفول مثلج بكون بس حبوب لكن مع القشرة ما بتلاقي ومع القشرة طبخ الفول
بكون اطيب بس يكون طري زي ما اتفقنا قبل>>>>متى اتفقنا:humm:
المقادير
ما في مقدار محدد حسب عدد الاشخاص عندك في العيلة انا مش عارفة كم كانت
كمية الفول اللي استخدمتها>>>>لكان لشو جاي هههههه:024:
استخدمي قد ما بتحبي فول وفي شغلة كتير مهمة الفول لازم تشيلي الخيط اللي على الجنب
لانه هاد مهما طبختيه بضل قاسي وطعمه مو طيب وعشان تفهموا قصدي
شوفوا الصورة انا حاطة دائرة حوالين الخيط اللي عالجنب انا شايلته ازا ملاحظين
لازم تعملوه من الجهتين مو من جهة وحدة وزي ما قلت ازا كانت حبة الفول
مو طرية الافضل تتخلصي من القشر وتخلي الحب بس
نيجي لباقي المقادير
حبتين بصل متوسطات مفروم ناعم
اربع او خمس حصوص توم مفروم ناعم
زيت زيتون وكتري منه لانه بدنا نقلب الفول فيه
لحمة مقطعة صغير واحنا بنحكيلها راس عصفور مش عارفة
ليش هالاسم البشع بس يعني قد راس العصفور <<<وحدة بتكره هالتشبيه بتحب العصافيرههههه
ملح وفلفل
وبس شايفين شو المقادير بسيطة >>>>يلا بكفي حكي هاتي الطريقة:angry:
الطريقة
بعد ما تقطعي الفول وتقيمي الخيطان تبعه اغسليه اكتر من مرة وصفيه من المي منيح
وهاي اللحمة مقطعة صغير والافضل تكون لحمة غنم هبرة ما فيها دهن كتير
بنحط زيت زيتون ولا تستعملي زيت ذرة لانه ما راح يطلع بنفس الطعم
زيت الزيتون هو اللي بيعطيه الطعم الطيب
ضيفي البصل وحركي وخليه حتى يدبل
بس تدبل البصلة ضيفي التوم المفروم وحركي
حبيباتي لا تردوا ليكمل الموضوع
ضيفي اللحمة وطبعا النار بتكون عالية وبتحركي حتى تنشف مية اللحم في عندي
ملاحظة تانية <<<هلكتينا بملاحظاتك
ازا كانت اللحمة عندك بتستوي بسرعة يعني ساعة او اقل حطيها مع الفول مباشرة
ازا بتحتاج وقت اطول الافضل انك تسلقيها نص سلقة وبعدين بتضيفيها للفول
انا اللحمة عندي ما بتطول لتستوي بحطها مع الفول على طول وبيستوا مع بعض
بس يتغير لون اللحم وتنشف ميته بنضيف الفول ازا شايفين الزيت كميته كبيرة
لانو بالعادة احنا بنقلي الفول قبل ما نحطه انا بستغني عن هالخطوة بإني اقلب
الفول بالزيت منيح لحد ما يبدا يدبل
لما كنت افرز الفول كنت اقليه وبعدين افرزه ووحدة الله يجزيها الخير
نصحتني ما اقلي اشي واحطه بالفريزر لانه بتحول لمادة مسرطنة والعياذ بالله
عشان هيك هلا بحط الفول متل ما هو بالفريزر ولما اجي اطبخه بقلبه بالزيت
هيك بتكون نشفت اللحمة وتغير لونها
نضيف الفول ونقلب كيتر نقلب حتى نحس انه الفول تدبل بالزيت بعد ما نشوف الفول تدبل
هلا بنتخلص من اغلب الزيت لانه ما بنحتاج كل هالزيت للطبخة خلي بس شوية
عشان الطعم النهائي
رشي رشة فلفل اسود ولا تضيفي الملح هلا لانه اللحمة ما بتستوي بسرعة لو
ضفتيلها الملح من البداية
ضيفي الماء على الطنجرة ولا تكتري ماء بس غمرة الطبخة ما بدنا سوائل كتير
لو حسيتي انه اللحمة او الفول ما استوى ممكن ترشي ماي بزيادة بس لا تكتري
بس تغلي المي غطي الطنجرة وخليها عنار هادية وتفقديها من وقت للتاني ازا استوت
بالعادة بتاخد اقل من ساعة حسب نوع اللحمة
بس تستوي اللحمة والفول ضيفي الملح وحركي ودوقيها وخليها شوي عالنار وبعدين قدميها
في ناس بتحب تضيف بندورة مفرومة لهاي الطبخة انا بحبها بدون بندورة لكن اللي بتحب طعم
البندورة ممكن تضيف البندورة في مرحلة ما قبل الاستواء الكامل وبتقلب وبتتركها شوي حتى تستوي
مع الطبخة وتتسبك
وهاد شكلها بعد ما استوت ما بقدر احكيلكم كيف الريحة طيييييييييييييييييبة
شايفين فيها سائل بس مو كتير يعني لا تخلوها تسبح>>> قرقر كتير
اسكبيها بالصحون وتقدم مع الخبز العربي والزيتون والمخللات وتمتعي باطيب طعم يمي يمي
معلش سامحوني عالقرقر الكتير بس لازم اوضحلكم كيف الفول احسن ما بعدين تطبخوه وتلاقوه
مش طيب وما يعجبكم تقولوا فراشة بدها :024:
ترى الحكي كتير بس الطريقة سهلة وما بدها شغل
وصحتين وهنا عقلوبكم