السلام عليكم جميعا
تجاوبا مع موضوع الاخت احب جده
الي كانت تستفسر عن النشاف الحراري من حيث المميزات والعيوب
حبيت استعرض لكم تجربتي مع نشافتي وحبيبة قلبي
مايتاج- MAYTAG
اشتريتها من اكسترا من حوالي سنه
صناعتها امريكيه للاسف
السعر ماني متاكده منه بصراحه بس بحدود 1800-2000ريال
حبيت اقدم لكم بعض النصايح من حيث مواصفات النشافه الي تحبون تشترونها
اول ميزه اشوف انها ضروريه انه يكون لها مفتاح للتحكم بدرجة حرارة التنشيف
مثل ما انتم شايفين بالصوره فيها اربع درجات حراره عادي- متوسط-خفيف- بارد
هالميزه جدا ضروريه لان بعض الملابس ماتتحمل درجه حرارة عاليه
لان الحراره قد تؤثر عليها من حيث تبهت الوانها او ينكمش حجمها
المفتاح الاخر الموجود هو اختيار نوعية التنشيف
فيها ثلاث انواع من التنشيف
الوظيف الي على اليمين تشوفونها
auto dry wrinkle control
وهذا معناتة تنشيف وفرد للملابس وهذه الوظيفه الي دايم اختارها
auto dry regular
وهذه معناتها تنشيف عادي
time dry - air fluff
وهذه معناتها التنشيف بالتوقيت يعني انتي تحددين الوقت الي تقعده بالنشافه وتستخدمين الخيار هذا ايضا لو انك اخترتي التنشيف البارد
من المواصفات الي تلقونها ايضا باغلب النشافات وظيفه فلتر الوبر
الفلتر وظيفته يجمع الوبر الي علق بالملابس اثناء عملية التنشيف وهذه الوظيفه جدا جميله
يجب تنظيف الفلتر قبل كل استعمال لان تركه بدون تنظيف ممكن يخرب عليك النشاف
بعض النشافات تحتوي على انبوب تصريف
نشافتي مايوجد فيها واعتقد وظيفة هالانبوب انه يصرف الوبر الي تجمعه النشافه
بس انا نشافتي فيها فتحه من ورا يطلع منها الوبر فلازم احركها كل فتره عشان انظف وراها
مميزات النشافه
* ممتازه للي ساكنين بشقق او ماعندهم مكان لنشر الغسيل
*ممتازه خصوصا لتنشيف الشراشف واللحف والمناشف لانها تاخذ مكان على المنشر والنشاف يوفر عليك هالمساحه غير ان الشراشف تطلع شبه مكويه وريحتها تفتح النفس
كذلك مريحه للي عندها اطفال ويوصخون كثير اعزكم الله من استفراغ وبول وغيره فيمديك تغسلين مفرش الطفل وترجعينه لسريره خلال ساعتين بالكثير
* ممتازه و مريحه لملابس زوجك الداخليه لانها توفر عليك النشر والكوي -بس لازم تطلعينها لحظة ماتوقف وتطوينها -ملاحظه ثياب الرجال ماتصلح تنحط بالنشاف لانه يخرب عليك ياقة الثوب
*حلوه ومريحه في الشتاء لان الملابس ماتنشف مع البرد
طبعا فيه اشياء كثيره يمكن اكون نسيتها بس هذا الي اذكره حاليا
عيوب النشافه من وجهة نظري
* ممكن الوان الملابس تبهت بسبب تعرضها لدرجة حراره عاليه ولتفادي ذلك اختاري درجة الحراره الخفيفه اذا كانت الملابس غامقه وعموما لاتستعملينها لملابس الطلعات والاشياء الي تخافين عليها وغاليه وايضا العبايات والشيل ممكن تبهت وتخرب في بعض المرات
*بعض الملابس قد تنكمش بسبب الحراره وممكن تعرفين الملابس الي ممكن تنكمش من انك تشوفين ارشادات الغسيل الي على قطعة الملابس قبل لاتحطينها في النشاف
ورمز النشافه عباره عن مربع داخله دائره مثل كذا
في المربع هذا تشوفون نقطه واحده معناتها ان درجة الحراره المناسبه لقطعه الملابس هذه لازم تكون بارده
ولو كان المربع مافيه نفطه معناتها ان ممكن تستخدمين درجة حراره عاليه
اما لو كان المربع عليه خطأ مثل كذا
فمعناتها ان القطعه هذه ماتصلح تنحط بالنشافه
من جهة ثانيه النشافه حلوه للملابس الي تتمط مثل عندي لعيالي بيجامات اخذتها من مذركير قطنها يمط بسرعه بس لما احطها بالنشافه مع الحراره ترجع تلم وتصير زينه
ختاما احب اقول لكم ان النشافه جهاز حلو ومفيد خصوصا للي ماعندها شغاله لانه يطيح عنك جزء كبيييييييييير من الغسيل مثل البيجامات وملابس البيت الي ماتخلص خصوصا للي عندها اطفال
عموما حبيباتي هذا الي عندي من معلومات اتمنى اني اكون مانسيت شي والي عندها اضافه ممكن تفيدنا ياليت تقلط معنا
واي استفسار حبيباتي من عيوني وانا حاضره
ولاتنسوني من دعواتكم
:26:
يا مال العافية