أم غيث 9 @am_ghyth_9
محررة برونزية
لـطـــفل ..يدوخ العالم من حلاتـــه.. منقول
أطفالنا
فرحة الحياة وبسمتها
وحلى هالدنيا وغنوتها
الموضوع من جهد اخت لناااا اسمهااا( ام شوشو ودنو ) بصراحه اعجبني وحبيت تقرونه والعذر والسموحه منهاا ولو كنت مسجله بالمنتدى كان استذنت منهاا
أتمنى من كل قلبي يوصل لكل أم وأب وكل مربي يهتم بالطفل وحياته غمضوا عيونكم لحضة وتخيلوا حياتكم من غير أطفال...
الله لايحرمكم منهم ...
" هدوء يكاد يكون قاتل .....مافيه بسمه ولا ضحكه ولا أنس
من دونهم ماللحياة طعم ....
فعشان كذا يالله تعالو معي وشدو حيلكم وجيبوا الورقة والقلم وسجلوا الأشياء اللي تحبون تنفذونها في حياتكم مع أطفالكم الغالللين....
كيف نخلي أطفالنا الأجمل والأحلى والأكمل والأروع ..
قلبناها صدى الملاعب...
بس والله من جد كيف نخليهم زي الأعلام الكل يشوفهم ويتمنى يصير مثلهم ويتمنى أي طفل تكون هذي الأم أو هذا الأب أمه وأبوه
....................
طبعا أول شي لازم نعطيه اهتمام اللي هو موضوع
التربية وما أدراك مالتربيه
طبعا التربية البعض منا من كثر مايقرأ مواضيع التربية والمربين وماتنفاع معاه يمل ويطفش وهذا شي طبيعي
بس لو فكرنا إنها تبدى منا إحنا والأشياء اللي تعودنا عليها كان صاروا عيالنا مثلنا لأن الأطفال كربون لنا إحنا
فلو كنا مثلا متعودين نبوس راس الماما والبابا وأيديهم لما نزورهم ونروح من عندهم كان الطفل يقلدنا ويسوي مثلنا
فنحاول إحنا نكون قدر الإمكان قدوة حسنه لهم و نسوي الأشياء اللي نحب أبنائنا يسوها فينا أو نلمسها فيهم طبعا عشان نربيهم لازم نعلمهم الأشياء المهمه في حياتهم...
ومن الأشياء الحلوة والضرورية اللي نعلمها الطفل:
السلام
فلو دخلنا أي مكان أو جينا ندخل غرفهم أو نروح نجلس في الصالة أو رحنا للمحل أو البقاله أو أي مكان يصلح نقول فيه السلام ...نسلم سلام كامل ..! صدقوني مع التعود يصير شيء رائع في حياتكم اليوميه ..ونفس الشيء برد السلام... لاتقولون لأطفالكم قولوا السلام...... انتو قولوه بالأول ثم تشوفون كيف هم يقلدونكم .. ويتعودون أطفالكم على إلقاء التحية على اللي يعرفون واللي مايعرفون
البشاشه
لما نكلم أطفالنا خلينا نكلمهم وفينا ابتسامه ولما نعاتبهم تكون فينا رقه
تخيلوا عيالكم على طول معبسين حتى أشكالهم تصير شينه بس لما نتعود ونعودهم على البشاشة وطلاقة الوجه ونخلي البسمة ماتفارقنا ولاتفارهم ..صدقوني تكسبون اجر وحسن مظهر، وحتى أطفالكم تزين وجيههم وتصير منورة بالضحكه.
الاحتضان
الاحتضان ياعالم شي عجيب يخلي طفلك يتنهد ويحس براحه مابعدها راحة
احضنوا عيالكم مرة و2 و5 و10 في اليوم لاتقولون 5 سنين كبير ولا حتى أبو 12 صدقوني الاحتضان معناه انك تحبينه وتحسسين الطفل انه غالي عليك وقولي له مع كل لمه لصدرك انك تحبينه صدقيني مع الوقت هو اللي بيجي يحضنك ويقول يمه أبي حضنك
حتى الأبحاث أكدت فوائد جمه لاحتضان الطفل وأبرزها تعزيز الثقة في النفس اللي هو أهم دعامة في الطفل.
الأكل
الأكل شيء أساسي في حياتنا اليوميه لكن من منا فكر ولو لحضه هل الأكل عادة أم عبادة؟
الأكل طبعا إذا احتسبنا فيه الأجر يكون عبادة كيف؟ إذا احتسبنا إن الأكل يساعدنا على الطاعة من صلاة وتعلم وتربية أبناء وغير ذلك
لكن ..هل فكرتو ايش في الأكل من الكم الهائل من الآداب والتربية ...
ونقدر نخلي الأكل متعه بعد
أول حاجه لما يجي وقت الأكل ليش ماندخلهم المطبخ ونخليهم يساعدونا نعطي هذا الملاعق ووهذي السفرة وهذي الصحون ونخليهم يساعدوننا في ترتيب الطاولة أو حتى بالأرض تكون السفرة مرتبه
ثاني حاجه الكل لازم يلتم وقت الأكل ...
ثالث حاجة تعويدهم على البسمله عند بداية الطعام والحمد في نهايته
ورابعا نلم السفرة مع بعض ويكون الكل متشارك واللي يرفض خليه يرفض صدقوني بالأخير بيغار وبيساعد
وخامسا :إذا كانوا الأطفال كبار شوي خلي كل واحد يغسل صحنه وكاسه وملعقته "و لو كان الغسل مش ولابد " ...حتى لو كان فيه خادمه صدقوني حاجه روعه لما يكون الطفل يخدم نفسه ويخدم غيرة بخدمته لنفسه
وآخر حاجه في الأكل اسأليهم عن طبخ اليوم اش رايكم فيه "عوديهم على الحوار" اش أكثر شي عجبك وش ماعجبك تنمية الحوار شيء حيوي في حياتهم ويتعودون على اللباقة بعد عند الناس مو يصيرون فاهيين .
مبدأ الثواب والعقاب
اذا غلط طفلك عليك أو على إخوانه أو على أي شخص ولو كان بالشارع علميه الخطاء ولاتتجاهلينه أو تقولين صغير بكرة يتعلم لا ..علميه الخطاء وانه إذا تكرر رح أعاقبك بحرمانك من شي معين أنت تحبه مثل لعبه أو حاجه يحبها وانتبهي من ضرب الطفل ...ضرب الأطفال هو دمارهم ودمار أحاسيسهم يصير الطفل متبلد لو تقطعينه من الطق مارح يفيد ....طيب مانفع العقاب نروح مبداء الثواب إذا سمعت الكلام رح اشتري لك هديه أو حلاوة أو امشيك برا ...المهم أنفذ لك الشيء اللي تحبه من غير ماتكذبين في تنفيذ طلبك له.. طبعا هذا المبداء مهم في التربية ونعممه على التعامل مع الطفل بشكل عام..
تنظيم غرفهم
عودي أطفالك إن غرفهم دايم تكون مرتبه والخادمة ماتدخل غرفهم ابد
_ونعودهم إذا قامو من النوم يرتبون السرير بأنفسهم ماياخذ ولا 5 دقايق
_والحمام أعزكم الله يكون نظيف
_وغرفتهم مرتبة وكل شي في مكانه والزباله فاضية
_ومكتبهم مرتب
_ويحرصون على تنظيف أسنانهم بعد النوم وقبله
_قبل النوم ياخذون شور للجسم
وبعد المدرسة أو بذل مجهود مثل اللعب أو الركض ياخذون شور كامل وفي الحر كل يوم شور
_ويحرصون على نظافة أنفسهم من أسنان ومظهر وملابس
_الدواليب تكون مرتبة وإذا اخذ لبس من الدولاب مايحوس كل الملابس.
_الملابس إذا تغسلت خليهم هم اللي يصفطونها ويرتبونها في الدولاب "لاتقولين صغير مايفهم حرام أعذبه" بكرة يكبر ويكبر حب النظام والترتيب في حياته
_إذا جا وقت نزهة أو زيارة خارج البيت خليهم يشاركونك في اختيار اللبس المناسب لهم ولاتفرضين عليهم شي في بالك فمثلا إذا كنت رايحه عزيمه واختارت بنتك بنطلون قولي لها هذا مايناسب العزيمه واقترحي لها فستانين أو خيارين وخليها تختار صدقوني مبداء الحوار مطلوب ورح تشوفونه اذا طبقتوه وإذا لبست ملابسها امدحي اللبس عليها ورفعي معنوياتها ...رح تتطير من الفرحه.
تابعوني
32
3K
يلزم عليك تسجيل الدخول أولًا لكتابة تعليق.
موضوع ولااروع ونبهتني على اشياء ماكنت القي لها بال
بارك الله فيكم واصلح لناابنائنا وابناءكم
بارك الله فيكم واصلح لناابنائنا وابناءكم
الصفحة الأخيرة
إذا كانو الأهل نظامييين بحياتهم صدقوني أطفالهم مايخرجون عن هذي القاعدة
فالنظام في كل شي
_في النوم:البيت الساعه 9 الكل في غرفته اذا حابوا الأهل يشوفون برنامج في التلفزيون مثلا مايمنعهم يروحون غرفتهم ويحطون فيها تي في ولا يقعدون بغرفتهم الين ينامون أطفالهم
فالطفل إذا اخذ كفايته من النوم صدقوني هو اللي يجيكم اليوم الثاني يقومكم للمدرسة ، فمسألة النوم تأرق كثير من الأهالي لكن هذا الشيء يعتمد على حزم الوالدين في نظام البيت
طيب إذا مارضى طفلك ينوم وش تسوين:أولا اخلي بجنب السرير رفوف عليها بعض القصص اللي تناسب عمر الطفل واقرأ له قصة قبل النوم
إذا مانام؟ ابدأ اقوله عن برنامجنا بكرة ممكن نطلع نتمشى او نروح لمدينة الألعاب عطيه بعض الأشياء المحببه له مع قدرتك التامة على الوفاء بها مو تقولين له بكرة خلها يوم ثاني لا...
_من ناحية الدراسة:حاولي تناقشينهم في الدروس اللي أخذوها اليوم في المدرسة وحل جميع الواجبات اللي أخذوها اليوم والتأكد من فهمهم لدروس اليوم وتحضير بعض الدروس إن أمكن مع الحرص على تخصيص وقت للدراسة ووقت للعب ووقت لمشاهدة أفلام الكرتون والتلفزيون مع الانتباه لهم في الأشياء والبرامج اللي يشاهدها طفلك مو تخلينه يشوف مسلسل رومانسي وتقولين خليه يتسلى ...انتبهو لعيالكم في هذا الجيل معد فيهم براءة صار بعضه يعرف أكثر من الكبار..
_ومن ناحية نظافتهم الشخصية في ملابس المدرسة:نحرص على إن أبنائنا يطلعون في أبهى حلة فلازم تكون ملابسهم نظيفة وإذا رجعوم من المدرسة وكانت ملابسهم فيها بعض الرائحة أو الوسخ نقوم ونغسلها مو نقول نهاية الأسبوع صدقوني حتى طفلك يتعود على نظافة ملابس المدرسة وخليهم مرتبين في مظهرهم من تنويع في الحقيبة وجزم.. أعزكم الله.. تكون رياضية ومريحة للقدم والجوارب كل يوم تتغير مو تنلبس لين تتطلع ريحتها ..الشعر بالنسبه للبنات غيري في تسريحة شعرها مرة شباصات ومرة ربطات و مرة عناقيص ..خليها في احلي طله ..وخلي ريحة عيالك نـــظـــافة .
_ومن ناحية الاحترام:عودي أطفالك على زرع الاحترام للمعلم حتى لو كان قاسي بعض الشيء ولا تصيرين مع أطفالك ضد المعلم حتى لو أخطاء المعلم فأنت قاعدة تزرعين مبدءا الاستهتار في أطفالك من غير ماتشعرين
خليهم يحترمون أي شخص كبير ويقدرونه.
_عودي أطفالك على شكر الناس إذا خدموهم في أي شيء ولو كان بسيط فمن لايشكر الناس لايشكر الله ....خلي لسانهم يتعلم الذرابة منذ نعومة اظفارهم .
ثانيا ..
اهتمي الاهتمام الكافي بغذاء طفلك ابتداءا من الفطور الصبح.. مو تحطين لهم كورن فليكس وتقولين لهم يالله .... وتعطينهم كم ريال يشترون بها السموم الموجودة في المقصف من شوكلاته وشبس وغيرها من السموم اللي ياكلها الطفل على جوع وماتعطيه أي فايده غذائيه
فاحرصي على ان يكون إفطار أطفالك متنوع لأن أهم وجبه في اليوم هي الفطور لأان المعده تكون فاضيه والجسم في أوج نشاطه فيحتاج الغذاء الصحي حتى يفيد عقولهم وأجسامهم وزي مايقولون العقل السليم في الجسم السليم
فمثلا : يكون الإفطار بيضة إما مسلوق أو مقلية _ وكاس عصير برتقال طازج ليساعد على امتصاص الحديد الموجود في البيض ويمد الجسم بفيتامين سي _زيتون_(( حليب مع ملعقة عسل) هذي شيء خرافي تخلي طفلك مفعم نشاط وحيويه وتعطيه مناعه طبيعيه _كم تمرة تغذيهم وتنفعهم
وخلي فسحتهم بالمدرسة أيضا صحية ..أنواع الساندويتشات تسويها لهم بحيث مايملون من نوع واحد فمثلا مرة تحطين لهم جبن ومرة زبدة الفول السوداني ومرة لبنه وزيتون ومرة سبانخ ومرة زعتر وشوفي ايش يحب طفلك ودلليه بالنوع اللي يحبه بشرط يكون صحي ، إما العصير فالحذر الحذر من العصيرات المعلبه واخطر شيء المكتوب عليها شراب برتقال أو شراب العنب أو المانغا وغيرة لأنها بالحقيقة مويه وسكر ولون ولا فيها ولا 1% فاكهه طبيعية غير المواد الحافظة اللي فيها وإذا تبين تعطينهم عطيهم العصيرالطازج اللي يجي بالثلاجات في السوبر ماركت اللي مكتوب علية عصير وعلبته تجي بلاستك مو كرتون فهذي فيها نسبه بسيطه من الفاكهه ...هذي تعطينهم أطفالك مع الفسحة وإذا حبيت حطي لهم حليب اللي يجيك طازج مو معلب ويكون حجمه صغير عشان يحببهم لشربه..
اما "وجبة الغدا" :
فحاولي قدر الإمكان التنويع ثم التنويع فيها وعندك خيارت كثيرة في هالوجبه وياحبذا تكون مشتملة على السلطات لأحتوائها على الفيتامينات الضرورية لهم وغير أنها تفرز إنزيمات تساعد على استرجاع القيمة الغذائية في الغذاء المطبوخ لأان الأكل والخضار إذا طبخت يصعب امتصاصها في الجسم فالسلطات تفرز الإنزيمات اللي تساعد على الامتصاص والاستفادة من الغذاء المطبوخ..
والسلطة ياليت تنوعين مرة سلطة سيزر مرة سلطه مع اللبن مرة سلطة بقول وهكذا .. إما الوجبة الرئيسية فتكون إما رز مع دجاج أو لحم ..أو معكروهن مع الجبن وطبعا أنواع طبخات الرز كثيرة ..بس أهم حاجه صينية خضار تكون موجودة مع الطبق الرئيسي زيها زي السلطة عشان القيمة الغذائية العالية في الخضار والسلطات..
"مابين الوجبات"
عصير بأنواعه واشكاله وياحبذا مايكون مع الأكل يشرب كوجبة لوحدة والأفضل يعمل في البيت
ومن امثلة العصيرات اللي تسوينها بالبيت وسهله ...عصير الحليب بالموز
أو الحليب مع الفراولة المجمدة...عصير المانغا.. عصير برتقال...عصير التفاح مع البرتقال ةغير ذلك ...
الزبادي...احرصي على هذا الصنف لأطفالك لاحتوائه على كميه عاليه من الخمائر والبكتيريا النافعة لمعدتهم ....مرة مفيد مع ملعقة من زيت الزيتون (الأصلي) مو المكرر أو التقليد وإذا تحبين تعرفين الأصلي الأصلي مكتوب عليه "عصرة أولى"
"وجبة العشا"
ياحبذا تكون خفيفه لأنها آخر وجبة وبعدها بينام الطفل واذا نام الطفل ماتهضم المعده الطعام زين غير ان الطعام الثقيل يثقل على معدة الطفل وكبدة وجسمه فاحرصي يكون إما خبز مع الجبن أو خبز مع الحليب أو زبادي مع الخبز المهم لاتخلين طفلك بأكل مقال أو شيء فيه دجاج أو لحم لأن الدجاج يحتاج أربع إلى خمس ساعات عشان ينهضم فما بالك بمعدة الطفل ...
احرصي على إذا عيالك فالأكل الصحي يبين في الوجه والجسم والعقل..
لطائف وخفائف
*أحبك ..شكرا ...تسلم لي ...ياقلبي..ياحياتي...ياعمري...سم ...تفضل ...ياحبيني لك....خذ بوسه........... كلمات تحلو بها حياتكم مع أطفالكم..وتحلو ألسنتهم بها.
*ايش رايك بلبسي ....وش رايك تساعدني ... ساعدني بترتيب الصالة ... كلمات تقوى بها صلتكم مع أبنائكم.
*أنت حلو ..تجنن....يازينك بس....أنت قمر....لبسك حلو ... غرفتك مرتبه ... شكلك حلو................كلمات تطيرهم من الفرحة لاتبخلون عليهم بها.
وفي نهاية هذا الجهد البسيط أتمنى يارب الكل يستفيد ويفيد ودعوة محب منكم على حسن تربية عصفوراتي شوشو ودنو ,,,
وأعانكم الله على تربية أطفالكم.