كيف حالكم بنات لها الغاليات؟؟
كثير نسمع من الحريم كلمة <<لساني يحكني>>
وكثير نسمع من الحريم ان فلانة ثرثارة ,,نقالة كلام,, تفتن بين الناس
وكثير نسمع من الرجال وعلماء النفس ان المرأة ثرثارة وماتمسك لسانها
وللأسف هذا الكلام صحيح المرأة تحب تتكلم اكثر من الرجل ويمكن هذا يرجع لطبيعة المرأة لكن هل صحيح ان المرأة ماتمسك لسانها عن الكلام
وفيه امور حرام تتحدث بها مثل مايكون بين المرأة وزوجها ونجد الكثير من النساء تتحدث فيه وايضا الرجال وخاصة المنتديات تلقين النساء والرجال يتحدثون عن زوجاتهم وكأنه شيء عادي والمرأة نفس الشيء وتعتقد انه عادي دام مافيه احد يعرفها !!
والحديث في اعراض الناس حدث ولاحرج تلقين الحريم يجلسون يتقهوون وحش في العالم واعراضهم فلانة تطلقت ,,فلانة ماتجيب عيال ,,فلانة جابت اربع بنات ,,
وتلقين الناس يشيلون هم إذا عندهم بنت مطلقة او عانس يخافون يصيرون علك في حلوق الحريم
ولا فيه بعض الحريم مايمديك تجلسين بالمجلس إلا وتبداء الأسئلة والتحقيق !!
أوتلقينها تفسد بين الصديقات والأخوات !!
لدرجة اني صرت اخاف اسولف واتكلم قدام الحريم واكون حذرة اخاف اقول كلمة ويقعدن الحريم يألفن وتصير سالفة
اذكر دكتور عندنا في الجامعة يعجز يشرح من قرق البنات نأخذ ساعة جالسين وسواليف وكان دائما يقول :المرأة ثرثارة وعين ثرثارة اي :تنضح بالماء !!
والمرأة ثرثارة كثيرة الكلام !!
ومع ذلك تشوفين حريم ماشاء الله ثقل وهدوء وإذا تكلمت تتكلم بصوت واطي يالله تسمعينها
وهذا النوع من الحريم مريح ماتشيلين هم إذا جلستي معها او جت عندكم في البيت تضمنين انها عاقلة ومو من النوع اللي ينقل الكلام وتسولفين معها وانت مرتاحة
وش رأيكم أنتم؟؟
انتظركم
ملطوش