كنت اشتري انواع الستيك ودايما لما اطبخها تكون يابسه وما تنأكل لين مره جزاها خير اخت زوجي انصحتني بهالنوع من اللحم وهو tenderloin اطلبه من اللحام ويكون في بلاستيك اغسله في البيت واقطعه شرايح واضربه علشان افرد اللحم المهم نجي حق مقادير طبقنا
طبعا انا اليوم مسوية طبقين لاهل زوجي فالمقادير بتكون على اساس صحنين بايركس
المقادير :
3 بصل متوسطة مفرومه ناعمة
5 بطاطس متوسطة تحطونها في ماي لين تستوي وبعدين تقشرونها وتهرسونها
تقريبا 15 شريحة الى 20 من الستيك tenderloin طبعا يقطع ويضرب علشان نسويه خفيف ويكون حجمة اكبر
بصل اخضر مقطع شرايح
يقدونس مفروم
صلصة الافوكادو
جبن مبشور
صلصة الوبينج الكريم (( اللي استخدمتها في معكرونة الاصداف الجمبو وفي الكانولوني )) عجزانه اعيد كتابة الوصفه
فلفل احمر واسود وملح
صلصة ثوم سائل
زبدة
الطريقة:
بعد ما نقطع الستيك ونضربه نحطه في زبدية وننزل علية البصل وتقريبا 4 ملاعق من صلصة الافوكادو نحط عليه البهارات الفلفل الاحمر الجاف ملعقة صغيرة فلفل اسود وملح وملعقتين صلصة ثوم سائل وندعكهم مع بعض
ثم نحضر المقلاة ونحط فيها ملعقة زبدة وننزل عليها الستيك لمدة دقيقتين تقريبا ونقلب على الوجه الاخر ونشيلها يعني ما نحمرها وايد بس شوي وبعدين نكرر الخطوات حتى نخلص من كمية الستيك كلها
نحضر البطاطا المهروسة ونحط عليها 3 ملاعق اكل جبن شدر نوع راجو سائل وملعقتين بصل اخضر تقريبا 4 ملاعق من صلصة الويبنج فلفل اسود وملح وفلفل احمر جاف ونقلب المقادير على بعضها
نفرد الستيك ونحط عليه من طرف الحشوة مالت البطاطا ونطويها ونسكرها بعود الاسنان ونصفها في البايركس مثل الصورة
بعد ما نصفهم في البايركس نصب عليهم صلصة الوبينج كريم تقريبا نشرب كل الستيك بس ما نغطيها كامل وننثر عليه البقدونس المفروم والبصل الاخضر المقطع شرايح ونحط على وجه كل استيك ملفوف جبن مبشور طبعا انا شاريه النوع اللي من الاساس يكون مخلوط موزيريلا وتشدر ابيض وصفر
بعد ما نخلص من هالمرحلة نغطيه بالقصدير وندخل الصينيه الفرن نكون مشغلينه من فوق ومن تحت على حرارة 125 لمدة نصف ساعه ومن ثم نشيل القصدير ونزيد الحرارة على 150 تقريبا
وهذي الصور بعد ما طلعتها من الفرن وبالعافيه على قلوبكم
ماشاء الله تبارك الله رووووعـــــــــــــــــــة,,
تسلم الايــــااااادي حبيبتي..