بالنسبة لرمضان
من أول مايثبت رؤية الهلال بحس بشعور غريب بكون فرحانه بنفس الوقت بهيء حالي لشي جديد وواجبات لازم أئئديها
أول ماتثبت رؤية الهلال لازم أستلم التلفون ونبعت تهاني لكل اللي بعرفهم
هاي السنه غير مجبورة أحكي مع خطيبي وأهله حكي مو مسجات مع إنه حماتي رح تكون بالعمرة
بعد التهاني
مابيخطر ببالي النوم يومها بضل للسحور (هاي السنه الفجر بطول ليأذن فما أتوقع نضل صاحيين)
لاااازم أتسحر عكل الأحوال أول شي سنه وبركة وتاني شي معدتي بتوجعني إذا ماتسحرتي لأنه معدتي لما ما آكل بيصيبني وجع غير شكل لأنه وأنا توجيهي كان عندي بداية قرحة بس إتعالجت منها لأنه كانت ببدايتها
بعد السحور بقرأ قرآن لحتى يأذن الفجر مهما طالت المدة بضل أقرأ بعدين بصلي وبستغفر وبسبح وبنام بصحى مابعرف إذا كان في شي عالتلفزيون بحضره مابنكر بس مابيأثر على عبادتي
وببدأ أحضر الفطور مع إمي عفكرة في من إخواني إذا كانوا موجودين بالبيت بيساعدوا بتحضير السفرة
عند الفطور تمر وشوربة وعطول بئوم بصلي المغرب وبرجع بتمزمز عالأكل هههههههههههه
جد برمضان بناكل على مهلنا بعد الصلاة ولازم اهلي يحضروا كميرا خفيه
وبنئوم بنجلي وبيروحوا بصلوا
القطايف بعد صلاة التراويح وأول أيام بيكون تعب ومابنطلع بعد أكم يوم بنطلع بعد التراويح بيكون الجو حلو وأجواء حلوه وعجئة

هلأ للي بالأردن برمضان لأول مرة في قرية إسمها القرية الرمضانية (عند نادي الجواد العربي) بس مابعرف موقعه بالزبط متل القرية العالمية بس مصغره بمشاركة 10 دول عربية فأكيد رح نروح عليها
وبس
اللي كتبته برنامجي السنه الماضية لأنه اللي قبلها كنت بسكن الجامعه وأرجع يومين بالأسبوع

في نونو إزا بتدوري بتلائي خصوصآ بالمحلات المتخصصه متل الكرنك وساجدة والكرم

رح أحاول أدور على شي رايق عنودة
ما بحب الصرعات
إن شاء الله ألاقي

أنا متلك على فكرة لازم أتسحر و الا كتير بجوع و بتعب

بتعرفي أنا مو جوع بس وجع بحس معدتي متل النار بمجرد ما أفطر بتبدأ تروء شوي شوي

إلا صحيح إمبارح سمعت فتوى لشيخ وعلامة مصري عمل بلبلة طلع فتوى إنه الدخان مابيفطر لأنه مو أكل ولاشرب ومابيدخل المعدة وجاب أحاديث إنه مافي دليل على حرمته ومارضي يناقش شيوخ تانيين وبيحكي في شباب كتير مابيصوموا عشان الدخان ... الله أعلم بس لخمني حكيه إمبارح

فعلا أنا قرأت الفتوى على موقع العربية
و على أولت الكبيسي و غيره من العلماء بأنه هادا الموضوع تم مناقشته و إجتهاد حكمه من زمان
و إنه لازم نناقش مواضيع بتفيد أكتر من هيك
ﻷنه برأي العلماء التانيين إنه الدخان شيء مشتهى
يعني المدخن بشتهي السيجارة فبدخن و بالزبط نفس اﻷكل أو الشرب لما نشتهيه
هدول ناس فاضية ما وراهم إشي , بحبوا يعملوا لنفسهم هالة و إنهم بفتحوا مواضيع بتخفف من عناء هاﻷمة , بس ناقص يحكولنا إنه اﻷكل و الشرب حلال
و على رأي الناس الي علقت على الموضوع , حكوا إنه جمال البنا شيخ ما إله صيت و لا حتى حدا بستمد حكم شرعي منع أصلا في مصر

و الله زمن يا عنودة ! أصلا مش كل من أفتى صار بفهم بالفتوى و لا لازم الناس تسمع لكل اﻷحكام
بس هو و العلم عند الله إنه رح يتحمل وزره و وزر كل الي رد عليه